"Müasir gənclik və İKT sahəsində innovasiyalar" mövzusu müzakirə olunub

Yanvarın 31-də Gənclər və İdman Nazirliyinin nəzdində fəaliyyət göstərən Gənclərin Problemləri üzrə Elmi-Araşdırmalar Mərkəzinin təşkilatçılığı ilə "Müasir gənclik və İKT sahəsində innovasiyalar" mövzusunda "dəyirmi masa" keçirilmişdir.

AzərTAc xəbər verir ki, tədbirdə çıxış edən mərkəzin direktoru Qədəmşah Sadıqov dövlət siyasətinin prioritet istiqamətlərindən birinə çevrilən informasiya-kommunikasiya texnologiyalarının (İKT) və yeni innovasiyaların tətbiqindən danışmışdır.

Qeyd olunmuşdur ki, dövlət başçısı İlham Əliyev tərəfindən 2013-cü ilin Azərbaycanda "İnformasiya-kommunikasiya texnologiyaları ili" elan edilməsi bu proseslərin daha sürətlə inkişaf etməsi üçün şərait yaradır.

Gənclər və idman nazirinin müavini İntiqam Babayev ölkədə gənclər siyasəti sahəsində mühüm fəaliyyət sənədi olan "Azərbaycan gəncliyi 2011-2015-ci illərdə Dövlət Proqramı"nda yeni texnologiyaların tətbiqini nəzərdə tutan ayrı-ayrı bəndlərin olduğunu bildirmişdir.

Gənc nəslin davamlı inkişafı istiqamətində innovasiyaların tətbiqinin mühüm əhəmiyyət kəsb etdiyini deyən nazir müavini gənclərin müasir texnologiyalardan istifadəsi sahəsində bilik və bacarıqlarının artırılması üçün maarifləndirmənin vacibliyini qeyd etmişdir.

Dövlət orqanlarının, qeyri-hökumət təşkilatlarının və ictimaiyyətin nümayəndələrinin iştirakı ilə keçirilən tədbirdə qanunvericiliyin tətbiqində İKT-nin rolundan, elektron-hökumət və bu resurslardan istifadənin zəruriliyindən bəhs olunmuşdur. Təhsil sistemində elektron innovasiyaların tətbiqindən, "ASAN xidmət" mərkəzlərinin yaradılmasının əhəmiyyətindən danışılmış, sosial şəbəkələr vasitəsi ilə göstərilən xidmətlərdən gənclərin səmərəli faydalanmasının vacibliyi vurğulanmışdır.

Azərbaycan müəllimi.- 2013.- 1 fevral.- S.3.