Uşaqların əl işlərindən ibarət rəsm sərgisi

Fevralın 1-də Bakıdakı "Buggy Bug" Uşaq Tədris Əyləncə Mərkəzində 4-12 yaşlı uşaqların əl işlərindən ibarət rəsm sərgisi keçirildi. Sərgidə mərkəzin müəllimləri, dərnək rəhbərləri, dərnək üzvləri, valideynlər və digər şəxslər iştirak edirdilər. Öncə iştirakçılar dərnək üzvlərinin əl işlərindən ibarət sərgiyə baxış keçirdilər.

Tədbirdə çıxış edən "Buggy Bug" Uşaq Tədris Əyləncə Mərkəzinin təsisçisi və direktoru Aysu Bayramzadə iştirakçıları salamlayaraq sərginin böyük əhəmiyyət kəsb etdiyini və dərnək üzvlərinin bacarıq və qabiliyyətlərinin aşkara çıxarılmasında mühüm rol oynadığını nəzərə çatdırdı. Mərkəzin qısa müddət ərzində fəaliyyətə başlamasına baxmayaraq yüksək nəticələr əldə olunduğunu nəzərə çatdıran A.Bayramzadə qeyd etdi ki, mərkəz öz işini xüsusi istedada malik uşaq və gənclərin yaradıcılıq potensialının inkişafı istiqamətində qurur.

Tədbirdə iştitak edən valideynlər mərkəzdə yaradılan şəraitdən məmnunluq hissi keçirdiklərini bildirdilər. Mərkəzin işini yüksək qiymətləndirən valideynlər belə sərgilərin keçirilməsinin faydalı olduğunu söylədilər və mərkəzə gələcək fəaliyyətlərində uğurlar arzuladılar.

Sonda sərgidə fərqlənən dərnək üzvlərinə hədiyyələr verildi. Xatirə şəkli çəkildi.

Azərbaycan müəllimi.- 2013.- 8 fevral.- S.3.