Azərbaycan Müəllimlər İnstitutu Tələbə Gənclər Təşkilatı diplomla təltif olundu

1996-cı il fevral ayının 2-də ümummilli lider Heydər Əliyevin təşəbbüsü ilə Bakıda müstəqil Azərbaycan Respublikası gənclərinin I Forumu keçirildi. Həmin günün əhəmiyyətini nəzərə alaraq, 2 fevral tarixi Azərbaycan Gəncləri Günü kimi elan edilərək milli tariximizə yazıldı. O vaxtdan başlayaraq hər il Azərbaycan Gəncləri Gününün respublikada geniş şəkildə qeyd olunması məqsədilə müxtəlif tədbirlər həyata keçirilir.

2013-cü ildə də gənclərin iştirakı ilə bir sıra tədbirlər həyata keçirildi. Bu tarixi günün gənclər arasında geniş şəkildə qeyd olunması məqsədilə təşkil edilmiş tədbirlər fevralın 2-də Buta Palasda keçirilən yaradıcı gənclərin mükafatlandırılması mərasimi ilə yekunlaşdı. Qeyd edək ki, hər il 2 fevral - Azərbaycan Gəncləri Günü ərəfəsində elm, texnika, təhsil, mədəniyyət və incəsənət sahəsində nailiyyətlər qazanmış, respublikamızı xarici ölkələrdə yüksək səviyyədə təmsil etmiş istedadlı və yaradıcı gənclər Gənclər və İdman Nazirliyi tərəfindən təsis edilmiş "Gənclər mükafatı" ilə təltif edilir.

2012-ci ildəki uğurlu fəaliyyətinə görə bir sıra gənclər və tələbə gənclər təşkilatları da təltif olundu. Fevralın 2-də Azərbaycan Müəllimlər İnstitutunun (AMİ) Tələbə Gənclər Təşkilatı (TGT) 2012-ci ildəki uğurlu fəaliyyətinə görə gənclər və idman naziri Azad Rəhimov tərəfindən diplomla təltif olundu. Diplom AMİ-nin Tələbə Gənclər Təşkilatının sədri Nərmin Ərəbliyə təqdim edildi.

Qeyd edək ki, AMİ-nin TGT 2005-ci ildə təsis edilmişdir. TGT ümumi maraqlar və könüllülük prinsipi əsasında birləşən tələbələrin ictimai həyatda fəal iştirakını təmin edir. Azərbaycan Müəllimlər İnstitutunun gənc tələbələrinin bütün təşəbbüsləri institutun rektoru, Milli Məclisin deputatı, professor Aqiyə Naxçıvanlı tərəfindən daim dəstəklənir və onların fəaliyyəti üçün geniş şərait yaradılır.

Son bir ildə AMİ TGT-nin təşkilatçılığı ilə tələbələrimiz ali məktəb tələbələri arasında, institutdaxili müsabiqələrin, bir neçə intellektual və idman yarışının keçirilməsində, eləcə də müxtəlif respublika, şəhər və rayon tədbirlərində çox fəal iştirak edib, diplom və fəxri fərmanlarla təltif olunub. Təşkilatın yeni strukturuna əsasən Elm və təhsil, İdman, İctimaiyyətlə əlaqələr, Beynəlxalq əlaqələr, İnsan resursları departamentləri, Ekoklub, Ümumi şöbə yaradılıb. Tələbə dostlarımıza yeni-yeni nailiyyətlər arzulayırıq.

AMİ-nin Tələbə Gənclər Təşkilatı

Azərbaycan müəllimi.- 2013.- 8 fevral.- S.3.