Şagirdlər fəallığı ilə seçilirdilər

Tarix humanitar elmlər sırasında mühüm yer tutur. Bu fənnin müasir tələblər səviyyəsində tədrisi dövlətçilik tariximizin vacib ənənələrini yaşadır. Tarix fənnini dərindən öyrənmək, dövlətçilik ruhunda tərbiyə olunmaqla bərabər, şagirdlərimiz həm də dünya tarixinin əsasları ilə yaxından tanış olur, ictimai-milli şüurlarını inkişaf etdirirlər.

Bu yaxınlarda Bakıdakı 163 nömrəli tam orta məktəbdə tarix fənni üzrə "açıq dərs"lər təşkil olunmuşdu.

Ötən ilin dekabrında məktəbdə keçirilmiş "Azərbaycan tarixi fənn aylığı" da fənnin tədrisi səviyyəsini müəyyənləşdirmək, şagirdlərimizdə tarixi biliklərin gücləndirilməsi və dövlətçilik təfəkkürünün formalaşdırılması məqsədinə xidmət edirdi. Bu baxımdan fənnin tədrisi və təşkili sahəsində fəaliyyət göstərən tarix kabineti və tarix metodbirləşməsinin işi xüsusi qeyd olunmalıdır.

Məktəbin tarix kabineti müasir təlim texnologiyaları əsasında qurulmuş, əyani və texniki vasitələrlə kifayət qədər təchiz olunmuşdur. Bu sahədə kabinetin rəhbəri Elşad Məmmədovun böyük əməyi vardır. E.Məmmədov həm də tarix fənni üzrə metodbirləşmənin rəhbəridir. Metodik vəsaitlərin və fənn proqramlarının müzakirəsi və təbliği sahəsində belə birləşmələrin əhəmiyyəti böyükdür.

"Açıq dərs"lərdə məktəbin rəhbərliyi, Bakı Şəhəri üzrə Təhsil İdarəsinin nümayəndəsi və b. iştirak etmişlər.

Əvvəlcə intellektual viktorina keçirilmişdir. Elşad Məmmədovun təşkilatçılığı ilə yarışlar VII, VIII və IX sinifləri əhatə etmişdir. Qruplara müxtəlif mövzular üzrə test-suallar paylanmış və yazılı cavablar alınmışdır. Sonra yarışın nəticələri müzakirə olunmuş, şagirdlərə tövsiyələr verilmişdir.

Aylıq ərzində 3 "açıq dərs" dinlənilmişdir. Könül Səfərovanın IX "a" sinfində keçdiyi "açıq dərs"in mövzusu "Nadir şah dövlətinin süqutu. Azərbaycan xanlıqlarının yaranması", Arzu İsgəndərovanın VII "b" sinfindəki "açıq dərs"inin mövzusu "Azərbaycanda azadlıq mübarizəsi. Xürrəmilər hərəkatı. Babək", Yeganə Əsgərovanın VIII "a" sinfində "açıq dərs"inin mövzusu isə "Azərbaycan Atabəylər dövləti. Azərbaycan dövlətçilik tarixinin ənənəsi" olmuşdur. Dərslərdə qruplarla iş formasından istifadə edilmişdir. Dərslər yüksək səviyyədə aparılmış, mühüm nəticələr əldə olunmuşdur. Dərslərdə motivasiya, inteqrasiya, diferensiasiyadan, əyani-texniki vasitələrdən geniş istifadə olunmuş, şagirdlərə zəngin informativ biliklər verilmiş, vətənpərvərlik hissi aşılanmışdır. Dərslərin gedişi lentə alınmış, müzakirəyə təqdim edilmişdir. Dərslərin gedişi prosesində "Babək" filmindən, N.Nərimanovun "Nadir şah" faciəsindən, N.Həsənzadənin "Atabəylər" dramından fraqmentlər verilmiş, eyni zamanda şagirdlərin iştirakı ilə Arzu İsgəndərovanın apardığı "açıq dərs"də "Babəkin oğluyla son görüşü" hissəsinə aid səhnəciklər göstərilmişdir.

Hər bir "açıq dərs"in yekunu olaraq müasir Azərbaycanın memarı, ümummilli liderimiz Heydər Əliyev və onun layiqli davamçısı Azərbaycan Respublikasının Prezidenti cənab İlham Əliyevin dövlətçilik fəaliyyəti və onların tarixi xidmətləri yüksək qiymətləndirilmiş, bu barədə şagirdlərə geniş məlumat verilmişdir.

IX "a" sinfindən İsa Məmmədov, Çilənay Məmmədova, Vüsalə Daşdəmirova, Murad Hüseynov, Şəbnəm Xudayarlı, Vüsalə Əliyeva, VII "b" sinfindən Zaur İsayev, Faiq Canbaxşiyev, Qəndab Nağıyeva, Əvəz Yusifov, VIII "a" sinfindən Aqil Əlizadə, Nigar İmanova, Allahverdi İmanov, Şəhla Süleymanova, Cəmil Məmmədli və Ayişə Quliyeva fəallıq göstərmişlər.

Sonda "açıq dərs"lərin keyfiyyət səviyyəsi barəsində fikir və mülahizələr bildirilmiş, müəllimlərə müvafiq tövsiyələr verilmişdir.

Səkinə ƏLİZADƏ,

Bakı Dövlət Universitetinin bakalavrı

Azərbaycan müəllimi.- 2013.- 8 fevral.- S.6.