"Sehrbaz qadın" tamaşası maraqla qarşılanıb

A.Şaiq adına Azərbaycan Dövlət Kukla Teatrında dünya uşaq ədəbiyyatının korifeyi, məşhur Fransa yazıçısı S.Perronun eyniadlı nağılı əsasında Ələsgər Qurbanovun səhnələşdirdiyi "Sehrbaz qadın" adlı tamaşanın premyerası olmuşdur. Balaca tamaşaçılar tərəfindən maraqla qarşılanan bu yeni səhnə əsərinin quruluşunu gənc və istedadlı rejissor Anar Məmmədov vermişdir. Onu da qeyd edək ki, "Sehrbaz qadın" Mingəçevir Dövlət Dram Teatrının aktyorlarının ifasında da tamaşaya qoyulmuşdur.

Ə.Qurbanov bir neçə orijinal və tərcümə etdiyi səhnə əsərlərinin müəllifidir. Belə ki, "Azadın qoçaqlığı" və "Kələkbaz" nağıl pyesləri Salyan Dövlət Kukla Teatrında, "Ceyranı oğurladılar və ya ayı balasının qoçaqlığı" pyesi Gəncə Dövlət Dram Teatrında göstərilmişdir. Bundan başqa onun tərcümə etdiyi məşhur gürcü dramaturqu Otia İoselianinin "Kaş araba aşmayaydı" tragikomediyası Azərbaycan Dövlət Akademik Milli Dram Teatrında, görkəmli Amerika yazıçısı Con Qolsiorsinin "Birincilər və sonuncular" adlı psixoloji dramı Sumqayıt Dövlət Musiqili Dram Teatrında tamaşaya qoyulub. "Kaş araba aşmayaydı" və "Birincilər və sonuncular" tamaşaları Türkiyədə keçirilən beynəlxalq teatr festivalında uğur qazanmış, diplomlara, mükafatlara layiq görülmüşdür.

Müəllif bu günlərdə Çexiya dramaturqu Karel Çarekin "Ağ xəstəlik" psixoloji dramını tərcümə etmişdir.

Sifai SƏFƏROVA

Azərbaycan müəllimi.- 2013.- 8 fevral.- S.7.