Gənc cüdoçunun uğurları

Qurbanlı Ayşə Ələddin qızı 1993-cü ildə Bakıda müəllim ailəsində anadan olub. Uşaqlıqdan idmana böyük həvəsi olan Ayşə valideynlərinin dəstəyi ilə 2005-ci ildə idmanın cüdo bölməsinə yazılıb. Təcrübəli müəllimlərindən cüdo idman növünün sirlərini öyrənən Ayşə 2006-cı ildə ilk uğuruna imza atıb.

Belə ki, A.Qurbanova "Bakı open" Bakı çempionatında rəqiblərinə qalib gələrək I yerə çıxıb. 2007-ci ildə isə yeniyetmələr arasında Azərbaycan çempionu olub. Həmin ildə Sovet İttifaqı Qəhrəmanı Həzi Aslanovun xatirəsinə həsr olunmuş ölkədaxili turnirdə II yeri tutub. 2008 və 2009-cu illərdə Ayşə böyüklər arasında keçirilən Azərbaycan çempionatlarında əsas mükafata sahib çıxıb. O, milli yığma komandanın üzvüdür. 2009-cu ildə Türkiyənin Antalya şəhərində keçirilən Avropa kuboku yarışlarında III, dünya çempionatında isə V yerləri tutub. Ayşə Qurbanova hazırda dünya və Avropa çempionatlarına ciddi hazırlaşır. Ona çətin və şərəfli yarışlarda uğurlar arzulayırıq.

Rəşad ZİYADOV

Azərbaycan müəllimi.- 2013.- 8 fevral.- S.7.