Naxçıvan Özəl Universiteti ilə daha üç ali təhsil müəssisəsi arasında əməkdaşlıq müqavilələri imzalandı

Bu günlərdə Naxçıvan Özəl Universitetinin bir qrup əməkdaşı Azərbaycan Turizm İnstitutunda, Xəzər və Qafqaz universitetlərində olmuş, hər üç ali təhsil ocağı ilə əməkdaşlıq müqaviləsi imzalamışlar. Müqavilələr universitetlərarası əməkdaşlığın inkişafında mühüm əhəmiyyət kəsb edir.

Universitetlər arasında bağlanan əməkdaşlıq müqavilələrində tələbə mübadiləsi proqramının həyata keçirilməsi, uyğun ixtisaslarda mütəxəssislərin mübadiləsi, eləcə də müxtəlif aspektli birgə simpoziumların, konfransların, treninqlərin, kursların təşkili və digər məsələlər öz əksini tapmışdır.

Naxçıvan Özəl Universitetinin rektoru, professor İsmayıl Əliyev hər üç ali təhsil ocağının rektoru ilə keçirilən görüşlərdə keyfiyyətin idarə edilməsi, 1+4 sisteminin tətbiqi məsələlərinə toxunmuşdur. Rektor çıxışında vurğulamışdır ki, ikili və ya ortaq diplom layihələrinin həyata keçirilməsi sahəsində işlərin daha da dəqiqləşdirilməsi və intensivləşdirilməsi qarşıda duran vacib məsələlərdən biridir. Bağlanan əməkdaşlıq müqavilələrinin uğurla həyata keçirilməsi onu deməyə əsas verir ki, hər üç ali təhsil ocağı arasında daha geniş əməkdaşlıq əlaqələri yaradılacaqdır.

Nuray ƏSGƏROVA,

Naxçıvan Özəl Universitetinin əməkdaşı

Azərbaycan müəllimi.- 2013.- 15 fevral.- S.3.