Dilimizi sevək və sevdirək!

"Ey türk oğulları, bir ovuc torpağımızı dünyanın var-dövlətinə, dilimizin bir sözünü ləl-cavahirata dəyişməyin".

Ş.İ.XƏTAİ

Dünyada məhv olmaq təhlükəsi ilə üzləşən dillərin qorunması məqsədilə hər il keçirilən Beynəlxalq Ana Dili Günü hər kəsə öz doğma dilinin varlığını hiss etmək, onunla qürur duymaq, onu qorumaq, inkişaf etdirmək hüququ olduğunu bir daha xatırladır. Dil hər bir millətin, xalqın varlığı deməkdir. Dünyada yüzlərlə dil mövcuddur. Doğma Azərbaycan dilimiz isə bu dillərin sırasında ən möhtəşəmidir. Əlbəttə, hər bir dilin özəlliyi və özünəməxsus gözəlliyi var. Bunu kimsə inkar edə bilməz. Amma vətəndaş olaraq bizim üçün Azərbaycan dilinin əvəzi yoxdur. Bu dilin cazibəsini heç bir dildə tapmaq olmaz.

Dilimizin yad təsirlərdən qorunması, mənəvi dirilik atributuna çevrilməsi yolunda böyük fədakarlıqlar göstərmiş M.Füzuli, Ş.İ.Xətai, M.P.Vaqif, C.Məmmədquluzadə, N.Nərimanov, M.Ə.Sabir, B.Vahabzadə, X.Ulutürk özlərini bu dilin ən layiqli daşıyıcıları və qoruyucuları kimi təsdiqləmişlər.

Bu gün dilimizin dövlət statuslu dillər arasında olmasına görə, millətin öz taleyinə sahibliyinə, millətin millət olaraq təsdiqinə görə "Dilimiz çox zəngin və ahəngdar dildir, dərin tarixi köklərə malikdir. Şəxsən mən öz ana dilimi çox sevir və bu dildə danışmağımla fəxr edirəm" deyən ümummilli lider Heydər Əliyevə minnətdar olmalıyıq.

Ölkəmizdə ana dilinin hərtərəfli inkişafı, işlək dilə çevrilməsi, beynəlxalq münasibətlər sisteminə yol tapması ana dilinin gözəl bilicisi, mahir natiq, ulu öndər Heydər Əliyevin dilin qorunmasına yönələn düşünülmüş siyasətinin nəticəsidir. Bu gün hər bir azərbaycanlının, xüsusilə də biz müəllimlərin üzərinə böyük bir missiya düşür: Dilimizi sevmək və sevdirmək! Dilimizi göz bəbəyimiztək qoruyaraq gələcək nəsillərə ötürmək!

Çalışdığım Hacıqabul şəhər 8 nömrəli humanitar fənlər təmayüllü məktəb-liseydə də bu məqsədlə rəngarəng tədbirlər - "Ana dilimiz mənəvi diriliyimizdir" devizi altında ədəbi-bədii gecələr, "dəyirmi masa"lar, diskussiyalar, şeir və inşa müsabiqələri və s. keçirilir. Bu tədbirlərdə bütün məktəb kollektivi həvəs və məhəbbətlə iştirak edir, dilimizə olan böyük sevgilərini nümayış etdirməyə çalışırlar. Başqa cür ola da bilməz, çünki dilimiz mənəviyyatımızdır.

Məktəbimiz Beynəlxalq Ana Dili Günü ilə bağlı keçirilən bütün rayon və respublika miqyaslı tədbir və müsabiqələrdə həmişə yaxından iştirak etmiş və yüksək nəticələr göstərmişdir. 2011-2012-ci dərs ilində ana dili aylığı ilə bağlı keçirilən ədəbi-bədii gecə rayon müsabiqəsində I yerə layiq görülmüşdür. Məktəbimizin şagirdləri inşa müsabiqələrində də yüksək nəticə əldə edərək I və II yerləri tutmuş, qaliblər sırasına yüksəlmişlər.

2012-2013-cü tədris ilində "M.F.Axundzadə Azərbaycan dramaturgiyasının banisidir" respublika inşa müsabiqəsində X sinif şagirdi Haqverdiyeva Fidan İltizam qızı II yerə layiq görülmüşdür. Məktəbin şagirdləri Azərbaycan dili və ədəbiyyat fənləri üzrə keçirilən bilik yarışlarında, olimpiadalarda da yüksək bilik nümayiş etdirirlər. Builki tədris ilində məktəbin şagirdi Azərbaycan dili və ədəbiyyat fənni üzrə olimpiadanın rayon turunun qalibi olmuş və olimpiadanın respublika turunda iştirak etmək hüququ qazanmışdır.

Məktəbdə tez-tez İKT-nin tətbiqi ilə açıq və nümunəvi dərslər keçirilir. Bu dərslərdə rayonun digər məktəblərindən gələn nümayəndələr də iştirak edir. Şagirdlər dilimizi, ədəbiyyatımızı, ənənələrimizi necə həvəslə və böyük məhəbbətlə öyrəndiklərini və sevdiklərini nümayiş etdirirlər. Məktəbimizdə "Bizi millət kimi qoruyub saxlayan məhz dilimiz, ədəbiyyatımız, ənənələrimizdir" (H.Ə.Əliyev) mövzusunda "dəyirmi masa", "Öz ana dilini bilməyən adamlar şikəst adamlardır" mövzusunda diskussiya, "Dilimiz mənəviyyatımızdır" adlı şeir müsabiqəsi doğma dilimizə sonsuz məhəbbət və qayğının təzahürü kimi meydana çıxır. Bir Azərbaycan dili və ədəbiyyat müəllimi kimi öz fəaliyyətimdə şagirdlərimi milli mənəvi dəyərlərimizi, xüsusilə milli varlığımızın daşıyıcısı, mənəvi pasportu sayılan dilimizi sevməyi və sevərək qorumağı təlqin etməyə çalışıram. Böyük demokrat C.Məmmədquluzadənin aşağıdakı sözləri bu gün bu dili sevənlər üçün əsl nümunədir: "Məndən soruşsalar ki, dövlətdən, naz-nemətdən nəyin var, qürur hissi ilə deyərdim: bütün kainatı, yer üzünü təsvir və tərənnüm etməyə qadir sözüm, ana dilim var".

Yasəmən MƏMMƏDOVA,

Hacıqabul şəhər 8 nömrəli humanitar

fənlər təmayüllü məktəb-liseyin

Azərbaycan dili və ədəbiyyat müəllimi

Azərbaycan müəllimi.- 2013.- 22 fevral.- S.6.