AMİ-də elmi-praktik seminar

Martın 1-də Azərbaycan Müəllimlər İnstitutunda 1 mart - Ümumdünya Mülki Müdafiə Gününə həsr olunmuş elmi-praktik seminar keçirildi. Tədbiri giriş sözü ilə açan institutun tədris işləri üzrə prorektoru, dosent Razim Məmmədov bildirdi ki, müasir dövrdə insanların təhlükəsizliyinin təminatı çox mühüm əhəmiyyət kəsb edir. Azərbaycan Prezidenti cənab İlham Əliyevin müvafiq sərəncamı ilə Fövqəladə Hallar Nazirliyinin yaradılması ölkəmizdə bu sahəyə xüsusi diqqətin göstəricisidir. Bildirildi ki, AMİ-nin mülki müdafiə, tibbi biliklərin əsasları və fiziki tərbiyə kafedrasının əməkdaşları mülki müdafiənin əhatə etdiyi mövzuları tələbələrimizə, eləcə də ixtisasartırma təhsilinə cəlb edilmiş müdavimlərə tədris edirlər.

Qeyd olundu ki, institutun rektoru, Milli Məclisin deputatı, professor Aqiyə Naxçıvanlının xüsusi diqqət və qayğısı ilə AMİ-də mülki müdafiəyə dair təlimlərin keçirilməsi üçün "Fəlakət riskinin azaldılması üzrə təlim və resurs mərkəzi" yaradılmışdır, eyni zamanda institutda fiziki tərbiyə dərslərinin keçirilməsi məqsədilə çox gözəl idman zalı, tibb məntəqəsi fəaliyyət göstərir.

Mülki müdafiə, tibbi biliklərin əsasları və fiziki tərbiyə kafedrasının müdiri, professor Hənifə Qurbanov mülki müdafiənin yaranmasından və onun əhəmiyyətindən bəhs edərək bildirdi ki, 1972-ci ildən etibarən Beynəlxalq Mülki Müdafiə Təşkilatının Baş Məclisinin qərarı ilə hər il martın 1-i Ümumdünya Mülki Müdafiə günü bütün qitələrdə kütləvi humanitar tədbir kimi qeyd olunur. Azərbaycan Respublikasının 1993-cü ildən daxil olduğu bu təşkilata üzv olan dövlətlərdə keçirilən tədbirlərin builki mövzusu "Mülki müdafiə və əhalinin fəlakət riskinin qarşısının alınmasına hazırlığı" adlanır.

Baş müəllim Faiq Manafov "Mülki müdafiə və onun vəzifələri" mövzusunda çıxış etdi, çox vacib və aktual problem olan mülki müdafiənin təşkili və idarə olunmasından danışdı, təbii fəlakətlər haqqında dünya statistikasından məlumatlar çatdırdı, fövqəladə hallar haqqında videoçarx təqdim etdi.

Baş müəllim Həsən Əliyev "İlk tibbi yardım aparılması" mövzusunda çıxış edərək bildirdi ki, düzgün və vaxtında göstərilən ilk tibbi yardımdan insanın həyatı, sağlamlığı və sonrakı müalicəsinin səmərəliliyi asılıdır. Bədbəxt hadisələr və qəfləti xəstəliklər nəticəsində yaranan vəziyyətdə xəstənin həyatı ətrafdakı insanlardan asılı olur.

Mülki müdafiə üzrə mühəndis Teymur Qurbanov "Mülki müdafiə və əhalinin fəlakət riskinin qarşısının alınmasına hazırlığı" mövzusunda çıxış etdi, Beynəlxalq Mülki Müdafiə Təşkilatının yaranma tarixindən, ölkəmizdə mülki müdafiə ilə bağlı qəbul edilmiş qanunlardan, Fövqəladə Hallar Nazirliyinin fəaliyyətindən danışdı.

Filologiya və təhsildə psixoloji xidmət fakültəsinin I kurs tələbəsi Aytac Gərayzadə ilk tibbi yardım haqqında videoçarx təqdim edərək bədbəxt hadisələr zamanı süni nəfəsvermə, qanaxmaların dayandırılması, yumşaq sarğıların qoyulma üsulları, sınıqlar və çıxıqları olan insanlara ilk tibbi yardım tədbirlərindən bəhs etdi.

Rəşad SADIQOV,

AMİ-nin tərbiyə işləri üzrə prorektoru

Azərbaycan müəllimi.- 2013.- 8 mart.- S.5.