Respublika inşa yazı müsabiqəsinin qalibləri

Artıq yeddinci ildir ki, müasir müstəqil Azərbaycan dövlətinin yaradıcısı, ümummilli lider Heydər Əliyevin anadan olmasının ildönümü münasibəti ilə məktəblilər arasında "Heydər Əliyev məktəblilərin gözü ilə" mövzusunda respublika inşa yazı müsabiqəsi keçirilir. Ulu öndərin zəngin irsinin məktəblilər tərəfindən dərindən öyrənilməsinə, onların Heydər Əliyevin mənalı və şərəfli ömür yolu, çoxcəhətli fəaliyyəti nümunəsində tərbiyəsinə geniş imkanlar açan müsabiqə bu il bir özəlliyi ilə fərqlənmişdir. Builki müsabiqə ulu öndərin 90 illik yubileyinə həsr olunmuşdur. Hər il olduğu kimi, bu il də ilk mərhələdən müsabiqəyə qoşulan minlərlə gənc - orta ümumtəhsil məktəblərinin yuxarı sinif şagirdləri öz inşa yazılarında ulu öndərə olan hədsiz məhəbbətlərini səmimi sözlərlə ifadə etmişlər. Ümummilli lider haqqında səmimi fikirlərin öz əksini tapdığı bu inşaları oxuduqca adamın ürəyi qürur hissi ilə dolur.

Müsabiqənin yekun-respublika turuna vəsiqə qazanmış iştirakçıların inşa yazıları Təhsil Nazirliyində təşkil olunmuş komissiya tərəfindən yoxlanılıb qiymətləndirilmişdir. Nəticədə 85 nəfər müsabiqənin son turunun qalibi elan olunmuşdur. Onlardan 8 nəfər I, 7 nəfər II, 16 nəfər III, 54 nəfər isə həvəsləndirici IV yerə layiq bilinmişdir.

Mayın 4-də "Gülüstan" sarayında qaliblərin mükafatlandırılmasına həsr olunmuş təntənəli mərasim keçirilmişdir. Mərasimdə qaliblərin adları açıqlanmış və layiq görüldükləri mükafatlar onlara təqdim olunmuşdur. Qəzetimizin bu sayında I yerin qaliblərini oxucularımıza təqdim edirik.

Birinci yerə layiq görüldüyümü eşidəndə qəhər məni boğdu

İlahə BAĞIROVA,

Bakı şəhəri, akademik Zərifə Əliyeva adına liseyin X sinif şagirdi

- Mən - Bağırova İlahə Vahid qızı 1996-cı il iyunun 20-də Naxçıvan şəhərində ziyalı ailəsində anadan olmuşam. İlk təhsilimi Sabunçu rayonu Bakıxanov qəsəbəsində yerləşən 94 nömrəli tam orta məktəbdə almışam. 2011-ci ildə müsabiqə yolu ilə akademik Zərifə Əliyeva adına liseyin IX sinfinə qəbul olunmuşam. Hazırda liseyin X sinfində oxuyuram.

Oxuduğum müddət ərzində həmişə "yaxşı" və "əla" qiymətlər almış, təlim müvəffəqiyyətimə və nümunəvi davranışıma görə tərifnamələrə layiq görülmüşəm.

2012-ci ildə Təhsil Nazirliyi tərəfindən M.Ə.Sabirin 150 illik yubileyi ilə əlaqədar keçirilən inşa yazı müsabiqəsində iştirak etmiş, respublika üzrə II yerə layiq görülmüş və diplomla təltif edilmişəm.

"Heydər Əliyev məktəblilərin gözü ilə" mövzusunda keçirilən inşanı yazmağa başlayarkən böyük məsuliyyət hiss edirdim. Ümummilli liderin uğur və nailiyyətlərini, keçdiyi mənalı həyat yolunu sözlə ifadə etməkdə şagird qələmi aciz idi. Digər tərəfdən isə qarşımda həm dahi öndərin tərənnümü, həm liseyin şərəfi, həm də mənə dərs deyən müəllimlərimin inamı dururdu.

İlk növbədə, görkəmli şəxsiyyətin həyat və fəaliyyətindən bəhs edən yazıları diqqətlə oxudum, haqqında çəkilmiş filmlərə baxdım. Aldığım təəssüratlar inşanı hansı istiqamətdə yazacağımı müəyyənləşdirdi.

Oxuduğum liseyin direktoru Məhəbbət Vəliyeva mayın 4-də "Gülüstan" sarayına gedəcəyimizi deyəndə əvvəlcə heç nə anlamadım. Adətən, fəxri qonaqların iştirak etdiyi bu sarayda inşa müsabiqəsinin qalibi kimi birinci yerə layiq görüldüyümü eşidəndə məni qəhər boğdu. Sevinc göz yaşlarının nə olduğunu onda bildim. Deməli, məqsədimə çata, ulu öndərimizi ona layiq olan söz və ifadələrlə tərənnüm edə bilmişdim.

Təbii ki, hər bir şagirdin ən böyük arzusu yüksək balla ali məktəbə qəbul olunmaqdır. Amma mən həm də istərdim ki, torpağıma, elimə, vətənimə layiq vətəndaş olum.

Mən hüquqşünas olmaq istəyirəm. Ən böyük arzum insanların hüquq və mənafelərini müdafiə etmək və çətinə düşənlərə işığın yolunu göstərməkdir.

Birinci olmağım ən xoş xatirə kimi yaddaşımda qalacaq

Leyla BABAYEVA,

Şuşa rayonu, Quşçular kənd tam orta məktəbinin IX sinif şagirdi

- Mən - Babayeva Leyla Ehtiram qızı 1998-ci il iyulun 2-də Ağdam rayonunun Quzanlı qəsəbəsində anadan olmuşam. 2004-cü ildə Ağdam rayonu Baharlı kənd tam orta məktəbinin I sinfinə daxil olmuşam. Hazırda Şuşa rayon Quşçular kənd tam orta məktəbinin IX sinfində oxuyuram.

Humanitar elmlərə, xüsusən də ədəbiyyata həvəsim var. İndiyədək bu fənn üzrə keçirilən bir neçə bilik, yaradıcılıq yarışmasında özümü sınamışam.

2011-ci ildə, VII sinifdə oxuyarkən fənn olimpiadalarının rayon mərhələsində Azərbaycan dili və ədəbiyyat fənnindən fərqlənmiş və Şuşa RTŞ-ın fəxri fərmanı ilə təltif edilmişəm. Həmin ildə Heydər Əliyevin həyat və fəaliyyəti ilə bağlı keçirilmiş inşa müsabiqəsində iştirak edərək həvəsləndirici yerə layiq görülmüşəm. VIII sinifdə oxuyanda da yenidən fənn olimpiadalarında iştirak etmiş və rayon mərhələsinin qaliblərindən olmuşam. 2012-ci ildə "Müasir Azərbaycan Heydər Əliyevin şah əsəridir" mövzusunda inşa yazı müsabiqəsinin iştirakçısı olmuşam. Müsabiqənin rayon mərhələsində II yeri tutmuşam. Bu il də Azərbaycan dili və ədəbiyyat fənnindən keçirilmiş olimpiadada iştirak etmişəm.

Məktəbdə bizə Azərbaycan xalqının ümummilli lideri Heydər Əliyevlə bağlı inşa yazmağı tapşırarkən çox sevindim. Əslində bu çətin, məsuliyyətli iş olsa da mənə gözəl hisslər yaşatdı. Çünki düşünürdüm ki, hər bir məktəbli müstəqil Azərbaycanın banisi haqqında bilməlidir.

Bu il "Heydər Əliyev məktəblilərin gözü ilə" mövzusunda inşa yazı müsabiqəsinin ilkin mərhələsində bildiyimə görə, 300 mindən çox şagird iştirak etmişdir. Bu onu göstərir ki, Azərbaycan gəncləri ulu öndərimizi çox sevir və hər bir məktəbli ümummilli liderimizi tanımağa çalışır. Mən də bir məktəbli kimi ulu öndərimiz haqqında səmimi fikirlərimi yazmağı özümə borc bildim.

Mayın 4-də "Gülüstan" sarayında müsabiqənin qalibləri elan olundu. Qalib olduğumu eşidərkən çox sevindim. Təqdimat zamanı təhsil nazirimiz cənab Mikayıl Cabbarov mənə diplom, hədiyyə təqdim etdi. Bu, həyatım boyu keçirdiyim ən xoş anlarım idi. Odur ki, cənab nazirə bu xoş anları mənə yaşatdığı üçün ürəkdən minnətdaram.

Mən bu uğuruma görə valideynlərimə, müəllimlərimə və Şuşa Rayon Təhsil Şöbəsinin rəhbərliyinə dərindən minnətdaram.

Ümummilli liderimizin həyat və fəaliyyəti ilə bağlı inşa müsabiqəsinə qatılaraq respublika qalibi olmağım həyatımın ən uğurlu anı kimi yadımda qalacaqdır.

Həmin gün sevincimin həddi-hüdudu yox idi

Nicat SƏMƏDOV,

Bakı şəhəri, Abil Səfərov adına 114 nömrəli tam orta məktəbin VIII sinif şagirdi

- Mən - Səmədov Nicat Natiq oğlu 1999-cu ildə Bakı şəhərində anadan olmuşam. 2005-ci ildə Suraxanı rayonundakı A.Səfərov adına 114 nömrəli tam orta məktəbin I sinfinə daxil olmuşam, hazırda həmin məktəbin VIII sinfində təhsil alıram.

Təhsildə ilk uğurum IV sinifdə olmuşdur. 2008-2009-cu tədris ilini uğurla bitirdiyimə görə məktəb müdiriyyəti tərəfindən fəxri fərmanla təltif olunmuşam. 2011-ci ildə "Mənim bayrağım" mövzusunda Suraxanı rayon orta məktəb şagirdləri arasında keçirilən inşa yazı müsabiqəsində II yerə layiq görülmüşəm. 2012-ci ildə 31 mart - Azərbaycanlıların soyqırımı gününə həsr olunmuş inşa yazı müsabiqəsində fərqlənmişəm. 2012-ci ildə məktəblilərin fənn olimpiadasının rayon mərhələsində Azərbaycan tarixi fənni üzrə I yerə layiq görülmüşəm. 2012-ci ildə "Azərpoçt" MMC tərəfindən keçirilən inşa müsabiqəsində II yeri tutduğuma görə diplom və qiymətli hədiyyələrlə təltif olunmuşam. 2012-ci ildə 28 may "Respublika günü" münasibəti ilə Azərbaycan Respublikasının Dövlət himninin sözlərindən ibarət bədii qiraət, "Heydər Əliyev və müstəqil Azərbaycan" mövzusunda keçirilmiş inşa yazı müsabiqələrində fərqlənmişəm. 2013-cü ildə "Beynəlxalq ana dili günü"nə həsr olunmuş inşa yazı müsabiqəsində I yerə layiq görülmüşəm. 2013-cü ildə Bakı Slavyan Universitetində "Müasir Azərbaycan ulu öndər Heydər Əliyev ideyaları işığında" Şagird-Tələbə Elmi Konfransında II yerə layiq görülmüş, fəxri fərman və sertifikatla təltif edilmişəm. Nəhayət, həyatımda silinməz iz qoyan tarix 2013-cü ildə gerçəkləşdi. Heydər Əliyevin 90 illik yubileyinə həsr olunmuş inşa yazı müsabiqəsində I dərəcəli diplomla təltif olundum və qiymətli hədiyyələrlə mükafatlandırıldım.

Ümummilli lider Heydər Əlirza oğlu Əliyevdən yazmaq çox çətindir, lakin çətin olduğu qədər də şərəflidir. Bu inşa üzərində çox çalışırdım. Arzu edirdim ki, mən də qaliblər siyahısında olum. Arzuma çatdım.

Mükafatlandırma mərasimi "Gülüstan" sarayında keçirildi. İnanın, həmin gün sevincimin həddi-hüdudu yox idi. Bəlkə də həyatımda bu qədər sevinməmişdim. Nazir Mikayıl Cabbarov bütün qalibləri təbrik etdi. Mən də qaliblər sırasında idim. I dərəcəli diplom və qiymətli hədiyyələrlə təltif olundum. Kitabda şəklimi və inşa yazımı görəndə yerimdəcə bir anlıq dondum. İstərdim ki, bütün şagirdlərə mənim yaşadığım həyəcan və sevinc nəsib olsun.

Arzularım tükənməzdir. Ən böyük arzularımdan biri orta məktəbi qızıl medalla bitirmək və ali məktəbə qəbul olmaqdır.

Ürəyimdə qalib olacağıma inanırdım

Aydan NAĞIYEVA,

Bakı şəhəri, N.İsmayılov adına 80 nömrəli tam orta məktəbin IX sinif şagirdi

- 1997-ci il iyulun 5-də Bakıda doğulmuşam. 3 yaşında ikən Bakıxanov qəsəbəsindəki 133 nömrəli bağçaya getmişəm. 2004-cü ildə Sabunçu rayonundakı N.İsmayılov adına 80 nömrəli məktəbin birinci sinfinə qəbul olunmuşam. Hazırda həmin məktəbin IX sinfində oxuyuram.

Elmə, biliyə marağı məndə, ilk növbədə, anam oyadıb. Məktəbə qədəm qoyduğum gündən məqsədim "əla" qiymətlərlə oxumaq, əlaçı olmaq idi. İbtidai sinif müəllimim Xatirə Bağıyeva bu istəyimi daha da qüvvətləndirdi.

İbtidai sinfi "əla" qiymətlərlə bitirmişəm. Beşinci sinifdən başlayaraq Azərbaycan dili və ədəbiyyat fənlərinə marağım çox artdı. Bunun ən böyük səbəbi anam Rasimə Nağıyevanın həm Azərbaycan dili və ədəbiyyat müəllimim, həm də sinif rəhbərim olması idi. Bəzən deyirlər ki, ananın öz övladına dərs deməsi səmərəli olmur. Bacım Günellə mən bunun tam əksini gördük. Anamın dərslərində daha çox məsuliyyət hiss edir, Azərbaycan dili və ədəbiyyat fənlərini hamıdan yaxşı öyrənməyə çalışırıq.

Yəqin elə bunun nəticəsi idi ki, V sinifdə oxuyarkən "Bilik yarışması"nda məktəb turunun, VIII sinifdə isə rayon turunun birincisi oldum.

Amma ən böyük arzum ulu öndərin xatirəsinə həsr olunmuş inşa müsabiqəsində iştirak etmək idi. Ötən il məktəbimizin direktoru Əlislam Abasquliyev etimad göstərərək məni Azərbaycan xalqının ümummilli lideri Heydər Əliyevin anadan olmasının 89-cu ildönümü münasibətilə keçirilmiş müsabiqəyə göndərdi. Həmin il müsabiqənin diplomuna layiq görüldüm.

Bu il isə məqsədim yalnız və yalnız qalib olmaq idi. Müsabiqəyə hazırlaşarkən anamdan kömək istədim. Ulu öndər haqqında öyrəndiklərim, anamın söhbətləri məni belə bir yazını yazmağa həvəsləndirdi.

Nə qədər həyəcan keçirsəm də ürəyimdə qalib olacağıma inanırdım. Amma yenə də müsabiqənin nəticələrini inanılmaz həyəcan və səbirsizliklə gözləyirdim.

Nəhayət, məktəbimizə zəng vurub dedilər ki, mən birincilər sırasına düşmüşəm. Nə qədər sevindiyimi sözlə ifadə edə bilmirəm.Təkcə onu deyə bilərəm ki, indiyədək bu qədər böyük sevinc yaşamamışam.

Bu qeyri-adi böyük sevinci mayın 4-də "Gülüstan" sarayındakı təqdimat mərasimi bir az da artırdı. Çox xoş oldu ki, mənə mükafatı təhsil naziri cənab Mikayıl Cabbarov özü təqdim etdi. Həmin anlarda yaşadıqlarım, yəqin ki, bir ömür bəs edəcək. O qədər fərəhlənirdim ki...

Bu il, hər şeydən öncə, buraxılış imtahanlarını müvəffəqiyyətlə verməli, oxuduğum 4 nömrəli musiqi məktəbini bitirməliyəm. Arzum hüquqşünas olmaq, ulu öndərin qurduğu dövlətin qanunlarının keşiyində dayanmaqdır.

Ulu öndərimizə sevgini mənə müəllimim aşılamışdır

Fəridə QULUZADƏ,

Şirvan şəhəri, T.Bağırov adına 11 nömrəli tam orta məktəbin IX sinif şagirdi

- Mən - Fəridə Bəhruz qızı Quluzadə 1998-ci il sentyabrın 1-də Şirvan şəhərində anadan olmuşam. Həyatımın məktəbəqədər dövrü 1 nömrəli "Qızılgül" uşaq bağçasında keçmişdir. 2004-cü ildə Şirvan şəhər T.Bağırov adına 11 nömrəli tam orta məktəbin 1-ci sinfinə daxil olmuşam. Hazırda IX sinifdə oxuyuram. Gündəlik dərslərimdə yalnız "əla" qiymətlər almışam.

Müsabiqələrdə, olimpiadalarda iştirak etmişəm. Məktəb və şəhər birinciliyini qazanmışam. Şahmat yarışlarında iştirak etmiş və III yerin qalibi olmuşam. Musiqi məktəbinin fortepiano şöbəsini "əla" qiymətlərlə bitirmişəm.

Ulu öndər Heydər Əliyevin anadan olmasının 86-cı ildönümünə həsr olunmuş "Gözəl Vətən, mənan dərin" ədəbi-bədii gecəsində fəal iştirakıma görə fəxri fərmanla təltif olunmuşam. 2013-cü ildə Şirvan şəhərində keçirilən inşa müsabiqəsində yer tutdum. Ən böyük uğurum isə 2013-cü il 6 aprel tarixində Bakı şəhərində keçirilən "Heydər Əliyev məktəblilərin gözü ilə" inşa müsabiqəsində respublika birinciliyini qazanmağım oldu.

Ulu öndər haqqında inşa yazmaq məni duyğulandırır, həm də qəlbim iftixar hissi ilə dolurdu. Yekun müsabiqəni böyük həyəcanla gözləyirdim. Hətta inşanı yazacağım qələmi də xüsusi qayğıyla əzizləyirdim.

Müsabiqə aprelin 6-da Bakıda, akademik Zərifə Əliyeva adına liseyin binasında keçirildi. Bir müddətdən sonra nəticələr elan olundu. I yerə layiq görülmüş 8 nəfərdən biri mən idim. İnana bilmirdim. Əvvəlcə həvəsləndirici yerə layiq görülənlərin adı oxundu. Sevincdən göz yaşlarım gözlərimdə donmuşdu, ayaqlarım sanki sözümə baxmırdı, tez bir zamanda səhnəyə qalxmaq, "Mən 8 nəfərdən biriyəm" demək istəyirdim. Nəhayət, I yerə layiq görülənlərin adları sadalandı... Quluzadə Fəridə Bəhruz qızı. Keçirdiyim hissləri, təəssüratları sözlə ifadə etmək çətindir. Bu hissləri bütün həmyaşıdlarıma arzu edirəm.

Bu sevinci mənə yaşadan müəllimim Güllü Rzayevaya dərin minnətdarlığımı bildirirəm. Ulu öndərə olan bu sevgimi o mənə aşılamışdır. Şirvan Şəhər İcra Hakimiyyətinin başçısı Mərdan Camalovla görüşümüz zamanı uğurlarımı gələcək təhsilimdə daha da artıracağıma söz vermişəm.

Arzum təbabətə yeniliklər gətirən göz həkimi olmaqdır

Vüqar XƏLİLLİ,

Sumqayıt şəhəri, 24 nömrəli tam orta məktəbin IX sinif şagirdi

- Mən - Xəlilli Vüqar Nemət oğlu 1998-ci ildə Sumqayıt şəhərində anadan olmuşam. İlk təhsilimə Sumqayıt şəhər 21 nömrəli tam orta məktəbdə başlamışam, V sinifdən təhsilimi 24 nömrəli tam orta məktəbdə davam etdirmişəm. Hazırda IX sinif şagirdiyəm.

Oxuduğum müddətdə bir çox təhsil uğurları əldə etmişəm. Belə ki, hələ III-IV siniflərdə oxuyarkən kompüterin sirlərini öyrənməyə çalışmış, ondan müstəqil istifadə etmək bacarığı əldə edərək "Gənc informatiklər" müsabiqəsində iştirak etmişəm.

Bütün fənlərə marağım var, ancaq dəqiq fənlərə isə daha çox üstünlük verirəm. Oxuduğum 9 il müddətində hər ili təhsil uğuruna görə fəxri fərmanla mükafatlandırılmışam.

ABA Celli - "Canlı hüquq" proqramında "A" dərəcəli diplom almışam. "Tullantıların ikinci həyatı" adlı layihə çərçivəsində keçirilmiş müsabiqədə II yeri tutaraq ARDNŞ-ın diplomunu qazanmışam. "Sabahın alimləri" II Respublika müsabiqəsinin iştirakçısı olmuşam.

"Azərpoçt" MMC tərəfindən keçirilən inşa müsabiqəsində II yeri tutaraq II dərəcəli diploma layiq görülmüşəm.

Ümummilli liderimiz Heydər Əliyevin anadan olmasının 90 illiyinə həsr olunmuş 7-ci İNEPO olimpiadasında iştirak edərək II yeri tutmuş və gümüş medal əldə etmişəm.

Ən böyük uğurum isə ümummilli liderin 90 illik yubileyinə həsr edilmiş inşa müsabiqəsində I yerə layiq görülməyim olmuşdur.

Mən Heydər Əliyev haqqında nənəmdən, babamdan çox eşitmişəm.

İnşamı yazanda çox arzulayırdım ki, I yeri tutum və mənə elə gəlirdi ki, bu mövzuda hamı kimi mən də çox bilirəm. Amma həyəcan da keçirirdim. İnşam I yerə layiq görüləndə sanki bütün yaşıdlarıma bunu demək istəyirdim, sevindiyimdən gözlərim doldu. Bütün qohumlarımıza xəbər verdim, hətta xaricdə yaşayanlara belə...

Möhtəşəm "Gülüstan" sarayında mükafatlandırma mərasimi həyatım boyu yadımdan çıxmayacaq. Sevindiyimdən əllərim titrəyirdi, mənə bağışlanan hədiyyələri əlim tutmurdu. Fikirləşirdim ki, bu dahi şəxsiyyət mən və mənim kimi yüzlərin, minlərin beyninə əbədilik həkk olunmuşdur.

Gələcəkdə Zərifə xanım Əliyevanın davamçısı kimi, öz ixtiraları ilə tibbə yeniliklər gətirəcək göz həkimi olmaq arzusundayam.

İnşamı ulu öndərimizə sonsuz sevgi ilə qələmə almışam

Nərmin ƏFƏNDİZADƏ,

Təhsil Nazirliyi "Tərəqqi" texniki-humanitar liseyinin IX sinif şagirdi

- Mən - Əfəndizadə Nərmin Davud qızı 1999-cu ildə Bakı şəhərində anadan olmuşam. 2004-cü ildə "Tərəqqi" texniki-humanitar liseyinin I sinfinə qəbul olunmuşam. Hazırda IX sinif şagirdiyəm.

Hələ kiçik yaşlarımdan nənəmin söylədiyi şirin nağıllar, dastanlar, lətifələr, bayatılar məndə ədəbiyyata böyük maraq oyatmışdı. Məktəbdə oxuyub-öyrəndiyim hekayələr, şeirlər həvəsimi daha da artırmışdır. Nəticədə özümdə bədii yaradıcılıqla məşğul olmağa ehtiyac duydum və kiçik hekayələr yazmağa başladım. Yazılarımın ilk oxucusu ədəbiyyat müəllimim olmuşdur. O mənə faydalı məsləhətlər vermiş və özümə inamımı artırmışdır. 2011-ci ildə "Liza Bleskin həyatı" adlı hekayəm mənim ilk uğurum olmuşdur.

Artıq iki ildir ki, Azərbaycan dili və ədəbiyyat fənni üzrə olimpiadada iştirak edirəm. Həm keçən il, həm də bu il olimpiadanın respublika mərhələsində II yerə layiq görülmüşəm.

Ulu öndərimiz, bütün uşaqların sevimlisi olan Heydər Əliyevin 90 illiyinə həsr olunmuş inşa müsabiqəsinin keçiriləcəyini öyrəndikdə mən də böyük həvəslə bu yarışa qatıldım. Keçən il də bu müsabiqədə iştirak etmiş və həvəsləndirici mükafata layiq görülmüşdüm. Bu il yarışa daha səylə hazırlaşdım. Kitabxanalara gedib ulu öndərimizə aid şeirləri, poemaları, hikmətli sözləri, yazıları oxudum, İnternetdən məlumatlar topladım, onun haqqında xatirələrlə maraqlandım, televiziya verilişlərini izlədim. Sonra Fəxri xiyabana gedib Heydər babamızın qəbrini ziyarət etdim. Sanki ondan xeyir-dua aldım. Dahi öndərimiz haqqında zəngin təəssüratımı ona olan sonsuz sevgimə qatıb ürəyimi boşaltdım, şagird ömrümün ən maraqlı inşasını yazdım.

Nəhayət o gün gəlib çatdı. Möhtəşəm sarayda toplantı başlandı. Mənə elə gəlirdi ki, həyatımın ən böyük, ən çətin imtahanındayam. Eyni zamanda düşünürdüm ki, bu qədər məsul şəxsin biz şagirdlərin inşa müsabiqəsinin yekununda iştirakı məhz Heydər Əliyevin təməlini qoyduğu azad dövlətimizin gənc nəslə qayğısının nəticəsi, davamıdır. Mən adımı birincilər sırasında eşidəndə çox həyəcanlandım, özümü uca zirvələr fəth etmiş qəhrəman kimi hiss etdim. Axı, mənim kimi dahi rəhbərimizə sevgisini bildirməyə çalışan yüzlərlə şagirdin içərisindən seçilmişdim! "Heydər Əliyev məktəblilərin gözü ilə" kitabında şəklimin və inşa yazımın çap olunması isə ən böyük hədiyyəm oldu. Bizə belə sevincli anlar yaşatdığına, təhsilimizdə hər cür uğurlar qazandığımıza imkan yaratdığına görə dövlətimizə, Təhsil Nazirliyimizə sonsuz minnətdarlığımı bildirirəm. Mənə bilik verən, mənə arxa olan müəllimlərimə təşəkkür edirəm.

Arzularım çoxdur. Gələcəkdə Bakı Dövlət Universitetinin beynəlxalq hüquq fakültəsinə daxil olmaq, ulu öndərimiz kimi tanınmış siyasi xadim olmaq istəyirəm.

Bu sınaqdan alnıaçıq, üzüağ çıxdım

Bətulə HÜSEYNZADƏ,

Cəlilabad şəhəri, akademik Zərifə Əliyeva adına 7 nömrəli tam orta məktəbin XI sinif şagirdi

- Mən - Hüseynzadə Bətulə Sabir qızı 1995-ci ildə Cəlilabad rayonunda ziyalı ailəsində anadan olmuşam. Cəlilabad şəhər akademik Zərifə Əliyeva adına 7 nömrəli tam orta məktəbin XI "b" sinfində təhsil alıram.

Məktəbin ictimai-siyasi işlərində yaxından iştirak etməklə yanaşı, dərslərimdən "4" - "5" qiymətlər alıram. Dəfələrlə şeir, inşa, qrammatika və bədii qiraət müsabiqələrində I yeri tutmuşam. Ən böyük təhsil uğurum isə 2011-2012-ci dərs ilində respublika fənn olimpiadalarında Azərbaycan dili və ədəbiyyat fənnindən III yeri tutmağım olub.

Ümummilli lider Heydər Əliyevin 90 illik yubileyi ilə bağlı keçirilən inşa müsabiqəsində qazandığım uğur isə onların birincisidir və həmişə xatirimdə qalacaq.

Respublika inşa müsabiqəsində iştirak etmək hüququ qazananda, düzü, həm sevindim, həm də həyəcanlandım. Qərara aldım ki, Azərbaycanın dövlət müstəqilliyinin bu günündən duyduğum və keçirdiyim sevinc və qürur hisslərini ulu öndərin ruhuna məktub şəklində ünvanlayım. Yazdığım fikirlər tarixi reallıqdır və həmyaşıdlarımın ürəyindən keçən hisslərdir.

"Mən bu kiçik inşa-essemi ad gününüzdə Sizin heç vaxt ölməyən ruhunuza müraciətlə yazıram. Varlığından xəbərsiz olduğunuz və heç vaxt Sizə çatmayacaq məktublarımı keçmiş günlərin, ayların, illərin tarixi salnaməsi kimi həmişə qoruyub saxlayacağam".

Bakının gözəlliyi məni valeh etdi. Doğrudan da, Bakı nağıllar şəhəridir. "Gülüstan" sarayında ilk dəfə olmağım da böyük marağıma səbəb oldu. Minlərlə şagird arasından seçilərək I yeri tutmaq, fərqlənmək, doğrudan da böyük uğurdur. Bu həm də mənim həyatda ilk ciddi sınağım idi. Bu sınaqdan alnıaçıq, üzüağ çıxdım. Sevinirəm ki, müəllimlərimin və valideynlərimin mənə bəslədiyi ümidi doğrulda bildim.

Qarşıdan məni buraxılış imtahanları gözləyir. Arzum gələcəkdə Azərbaycan dili və ədəbiyyat müəllimi olmaqdır. Hesab edirəm ki, millətimizin, xalqımızın adına layiqli övlad olmaq üçün mükəmməl ali təhsil almaq, sənətin, peşənin əsgəri olmaq lazımdır. Fikrimi ulu öndər Heydər Əliyevin bir müdrik kəlamı ilə tamamlamaq istəyirəm: "Gələcək bilikli, elmli insanların çiyni üstündə qurulacaqdır".

Hazırladılar: Y.ƏLİYEV, Ş.CƏFƏROV, R.ZİYADOV.

Azərbaycan müəllimi.- 2013.- 17 may.- S. 5.