Azərbaycanlı yeniyetmə İtaliyada keçirilən beynəlxalq "San-Remo-Junior" müsabiqəsinin əsas mükafatını almışdır

13 yaşlı vokalçı Yasin Həsənov İtaliyada keçirilən beynəlxalq "San-Remo-Junior" müsabiqəsində iştirak etmişdir. O, ilk dəfə bu möhtəşəm musiqi yarışmasına qatılmasına baxmayaraq vətənə qələbə ilə qayıtmışdır. Yasin İtaliyada müxtəlif nominasiyalar üzrə keçirilən və təxminən dünyanın 300-dən artıq istedadının qatıldığı müsabiqədə vokal kateqoriyası üzrə əsas mükafat - "Qran-pri"-yə layiq görülmüşdür. O, müsabiqədə "Qranada" adlı ispan mahnısını ifa etmişdir.

Dörd mərhələdən ibarət olan müsabiqədə Yasin ilk çıxışından sonra bütün münsiflərin birmənalı rəyi ilə finala birbaşa vəsiqə qazanmışdır. Müsabiqənin əsas təşkilatçılarından sayılan münsiflər heyətinin sədri Raolo Alberto Yasinin ifasından çox təsirləndiyini söyləmişdir. Tanınmış musiqiçi qeyd etmişdir ki, bu günə qədər Azərbaycandan müsabiqəyə bir çox namizədlər təqdim edilsə də, heç biri musiqi yarışmasında iştirak etmək şansı əldə edə bilməmişdir. Yalnız fitri istedadı və səsi olan iştirakçılar bu şansı əldə edə bilmişlər.

Qeyd edək ki, Yasinin təhsil aldığı Bakıdakı 6 nömrəli məktəb-liseyin direktoru Gülşən Orucova müsabiqəyə qatılmaq üçün Həsənovlar ailəsinə maddi köməyini əsirgəməmişdir. Yasinin anası Rəna xanım söyləmişdir ki, İtaliyada olarkən Yasinin ifası hamının sevgisini qazana bilmişdir. Hətta münsiflər heyətinin sədri Raolo Alberto müsabiqə bitdikdən sonra bizimlə söhbətində Yasinin qeyri-adi səsə malik olduğunu da demişdir.

Bu günlərdə isə keçirilmiş mətbuat konfransında iştirak edən Yasinin vokal müəllimi Solmaz Yolçuqızı şagirdinin potensialına inandığını, onun hər zaman öz üzərində çalışdığını, beynəlxalq müsabiqələrdə ölkəmizi bundan sonra da layiqincə təmsil edəcəyini xüsusilə vurğulamışdır. Qeyd etmişdir ki, Yasini gələcəkdə İtaliya Konservatoriyasında təhsil almaq şansı da gözləyir.

Mətbuat konfransında Yasinin İtaliyadakı "San-Remo-Junior" müsabiqəsindən olan videogörüntüləri də jurnalistlərə təqdim olunmuşdur.

Musiqi sahəsində bir çox uğurlara imza atmış, dəfələrlə diplom və fəxri fərmanlara layiq görülmüş Yasinin 20 mahnıdan ibarət olan 2 albomu və "Vətənim" adlı klipi işıq üzü görmüşdür. Sevindirici haldır ki, ölkə Prezidenti İlham Əliyevin müvafiq sərəncamına əsasən Yasin Etibar oğlu Həsənovun adı Azərbaycanın gənc istedadlarının "Qızıl kitab"ına yazılmaqla o, Prezidentin xüsusi aylıq təqaüdünə layiq görülmüşdür.

SİFAİ

Azərbaycan müəllimi.- 2013.- 17 may.- S.11.