Qürur mənbəyimiz

Noyabrın 7-də Bakı Modern Məktəbinin 2 A1 sinfində 9 noyabr - Dövlət Bayrağı Gününə həsr olunmuş tədbir keçirildi. Sinif müəllimi, "Ən yaxşı müəllim" müsabiqəsinin 2012-ci il qalibi Sevinc Əliyevanın təşkilatçılığı ilə keçirilən bayram tədbiri Azərbaycan Respublikasının Dövlət himninin səslənməsi ilə başladı. Sonra əsgər paltarı geyinmiş 3 şagird "Azərbaycan" mahnısının sədaları altında əlində bayraq zala daxil oldu. Onlar Azərbaycan, rus və ingilis dilində qonaqları salamladılar.

Nəzrin, Hüseyn, Sənan vətənpərvərlik mövzusunda şeirlər söylədilər. Sonra balacalar maraqlı səhnəcik nümayiş etdirdilər. Azərbaycan Respublikasının gerbi və bayrağı haqqında şeirlər söylədikdən sonra şagirdlər "Azərbaycanım mənim" mahnısının sədaları altında rəqs təqdim etdilər.

Daha sonra yenidən bir neçə şeir söyləndi, mahnı və rəqs ifa olundu, səhnəcik göstərildi.

Tədbir iştirakçıları uşaqların Dövlət bayrağı və Dövlət Bayrağı Meydanı haqqında səsləndirdikləri məlumatları maraqla dinlədilər. Monitorda şəhid oğullarımızın qəhrəmanlığını əks etdirən şəkillərdən ibarət slaydlar nümayiş etdirildi. Sonda şagirdlər Dövlət Bayrağının önündə diz çökərək ana vətənə layiq olacaqlarına and içdilər.

Tədbirdə iştirak edən qonaqlar şagirdləri Dövlət Bayrağı Günü münasibətilə təbrik edərək onların çıxışlarından razı qaldıqlarını bildirdilər.

Hicran ƏKBƏROVA

Azərbaycan müəllimi.- 2013.- 8 noyabr.- S.8.