Azərbaycan təhsilinin uğurları

Prezident təqaüdçüləri

Anar DADAŞZADƏ,

Azərbaycan Respublikasının Prezidenti yanında

Dövlət İdarəçilik Akademiyasının tələbəsi

1995-ci ildə Bakı şəhərində anadan olub. 2013-cü ildə paytaxtdakı 32 nömrəli tam orta məktəbi bitirib. Bu il ali məktəblərə III qrup üzrə keçirilən qəbul imtahanında 670 bal toplayaraq Azərbaycan Respublikasının Prezidenti yanında Dövlət İdarəçilik Akademiyasının dövlət və bələdiyyə idarəetməsi ixtisasına daxil olub. 2013-cü ildə ulu öndər Heydər Əliyevin 90 illik yubileyinə həsr olunmuş olimpiadada rayon üzrə III yeri qazanıb.

Təhsilini ABŞ və ya Almaniyada davam etdirmək istəyir. Ən böyük arzusu ona göstərilən etimadı doğruldaraq ixtisası üzrə savadlı mütəxəssis olmaqdır.

Şamxal HACILI,

Azərbaycan Respublikasının Prezidenti yanında

Dövlət İdarəçilik Akademiyasının tələbəsi

1996-cı ildə Bakı şəhərində anadan olub. 2013-cü ildə Bakı şəhərindəki 32 nömrəli tam orta məktəbi bitirib. Ən çox sevdiyi fənn riyaziyyatdır. IX sinifdə oxuyarkən Bakının Nizami rayonu üzrə keçirilən "Breyn-rinq" yarışmasının qalibi olub. Uşaqlıqdan DİA-nın tələbəsi olmaq arzusunda olub. Qəbul imtahanında 670 bal toplayaraq DİA-nın inzibati idarəetmə fakültəsinə qəbul olub.

Akademiyanın tələbəsi olduğu üçün özünü çox xoşbəxt hesab edir. Prezident təqaüdçüsü adını ləyaqətlə daşımağı və seçdiyi ixtisasın incəliklərinə dərindən yiyələnərək peşəkar mütəxəssis olacağını qarşısına məqsəd qoyub.

Xəyalə İSMAYILOVA,

Qafqaz Universitetinin tələbəsi

1996-cı ildə Sumqayıt şəhərində anadan olub. 2002-ci ildə Sumqayıt şəhər 31 nömrəli orta məktəbin I sinfinə daxil olub. 2013-cü ildə Sumqayıt şəhərindəki N.Gəncəvi adına texniki və təbiət elmləri liseyini bitirib. Orta məktəbdə oxuduğu müddətdə keçirilən bilik yarışlarında iştirak edib və uğurlar qazanıb. Bu il III qrup üzrə ali məktəblərə qəbul imtahanında 695 bal toplayaraq Qafqaz Universitetinin dil və ədəbiyyat müəllimliyi ( ingiliscə) fakültəsinə daxil olmaqla öz arzusuna çatıb.

Prezident təqaüdünə layiq görüldüyünə görə ailə üzvləri adından Prezident cənab İlham Əliyevə öz minnətdarlığını bildirir.

Ən böyük arzusu ona göstərilən etimadı doğruldub Azərbaycanda tanınmış müəllim olmaqdır.

Cavid QƏDİROV,

Qafqaz Universitetinin tələbəsi

1996-cı ildə Bakı şəhərində anadan olub. 2002-ci ildə Bakıdakı 14 nömrəli orta məktəbin I sinfinə daxil olub. Sonra təhsilini 204 nömrəli məktəbdə davam etdirərək 2013-cü ildə həmin məktəbi bitirib. Orta məktəb illərində "Araz" kurslarında fəal iştirak edib və tarix fənnindən olimpiadada Xətai rayonu üzrə I yeri tutub.

Ali məktəblərə qəbul imtahanında II qrup üzrə 680 bal toplayaraq Qafqaz Universitetinin maliyyə (ingiliscə) fakültəsinə qəbul olub.

Prezident təqaüdünə layiq görulməsindən qürur hissi duyur. Universiteti fərqlənmə diplomu ilə bitirmək üçün səylə çalışır. İxtisasını dərindən öyrənmək üçün dərsə başladığı ilk gündən ingilis dilində keçirilən kurslarda fəal iştirak edir.

Samir BABAYEV,

Azərbaycan Tibb Universitetinin tələbəsi

1995-ci ildə Bərdə şəhərində anadan olub. 2013-cü ildə Laçın rayon Çıraqlı kənd tam orta məktəbində təhsilini başa vurub. Orta məktəb illərində iki dəfə "Yolumuz Heydər yoludur, bu yol vətənə doğrudur" adlı ümumrayon şeir müsabiqəsinin qalibi, məktəblilər arasında keçirilən "Cəsurlar" hərbi-idman yarışlarının mükafatçısı olub.

Bu il IV ixtisas qrupu üzrə keçirilən qəbul imtahanında 681 bal toplayaraq ATU-nun müalicə- profilaktika fakültəsinə qəbul olub. Prezident təqaüdünə layiq görüldüyünə görə üzərinə düşən məsuliyyəti ciddi dərk edir. Tələbəlik illərində daha böyük uğurlar qazanmaq üçün səylə çalışır.

Hazırladı: Şakir CƏFƏROV

Azərbaycan müəllimi.- 2013.- 15 noyabr.- S.5.