Bakı Pedaqoji Kadrların İxtisasartırma

və Yenidənhazırlanma İnstitutunda Dövlət

Bayrağı və Konstitusiya günləri qeyd edilib

Noyabrın 8-də Bakı Pedaqoji Kadrların İxtisasartırma və Yenidənhazırlanma İnstitutunda ümumxalq bayramları - Dövlət Bayrağı və Konstitusiya günlərinə həsr edilmiş təntənəli yığıncaq keçirildi. İnstitutun professor-müəllim heyətinin, Gənclər Təşkilatının üzvlərinin qatıldığı tədbiri açıq elan edən rektor, professor Asəf Zamanov iştirakçıları bayramlar münasibətilə təbrik etdikdən sonra Dövlət himni səsləndirildi.

Natiq çıxışına davam edərək vurğuladı ki, qürur mənbəyimiz olan və hazırda başımız üzərində dalğalanan bayrağımızın xalqımızın taleyi kimi keşməkeşli, lakin şanlı tarixi vardır.

Bildirildi ki, 28 may 1918-ci il tarixdə Tiflis şəhərində Azərbaycanın Dövlət Müstəqilliyi elan olunduqdan sonra Gəncədə fəaliyyət göstərmək məcburiyyətində qalan Azərbaycan Xalq Cümhuriyyətinin müvəqqəti hökuməti iyunun 24-də dövlət atributları haqqında qərarlar qəbul etdi ki, onlardan birincisi dövlət bayrağı ilə bağlı idi. Lakin Dövlət bayrağının üzərindəki təsvirlər hökumət Bakıya köçdükdən sonra da müzakirə mövzusu olaraq qalırdı. 9 noyabr 1918-ci ildə, nəhayət ki, üç üfiqi göy, qırmızı və yaşıl rəngli zolaqlardan ibarət, mərkəzində ağ aypara və səkkizguşəli ulduz olan milli bayrağımız təsdiq edildi.

Diqqətə çatdırıldı ki, türkçülüyü, müasirləşməni və islam sivilizasiyasına mənsub olduğumuzu təsdiqləyən bu bayraq 28 aprel 1920-ci il çar Rusiyasının Azərbaycana qarşı işğalçılıq yürüşlərinə qədər məmləkətimizin başı üzərində dalğalandı. Sonrakı 70 ildə SSRİ-nin tərkibində olarkən respublikamızda yeni sosial quruluşu özündə əks etdirən və bir neçə dəfə dəyişikliklərə məruz qalan Dövlət bayrağı qəbul edildi.

1990-cı ildə isə SSRİ-nin süqutu ərəfəsində uzun illərdən sonra üçrəngli milli bayrağımız noyabrın 17-də Naxçıvan Muxtar Respublikası Ali Sovetinin qərarı ilə dövlət bayrağı kimi rəsmən elan edildi və Azərbaycan SSR Ali Soveti qarşısında vəsatət qaldırıldı ki, üçrəngli, ay-ulduzlu bayraq Azərbaycanın dövlət bayrağı kimi qəbul edilsin. Ulu öndər Heydər Əliyev burada Azərbaycan Xalq Cümhuriyyətinin bayrağını Dövlət bayrağı kimi rəsmən elan etdi. O vaxt hələ Sovet İttifaqının dağılmasına bir ildən də çox vaxt qalırdı. Bizim müstəqilliyə gedən yolumuz o gündən başladı. Elə o vaxtdan da Azərbaycanımızın işıqlı gələcəyinin təməli qoyuldu.

Professor Asəf Zamanov onu da vurğuladı ki, ulu öndər Heydər Əliyevin siyasi kursunu uğurla davam etdirən möhtərəm Prezidentimiz İlham Əliyev də bu mühüm dövlət atributu ilə bağlı taleyüklü qərarlar qəbul edib. O, 2009-cu il 17 noyabr tarixli sərəncamı ilə noyabrın 9-nu rəsmən Dövlət Bayrağı Günü elan edib.

2010-cu il sentyabrın 1-də isə Dövlət Bayrağı Meydanının açılış mərasimi oldu. İndi bu meydanda dünyanın ən hündür bayrağı dalğalanır. Dövlətimizin hər bir uğurunun, hər bir qələbəsinin başı üzərində üçrəngli, ay-ulduzlu bayrağımız dalğalanır. Hazırda dünyanın 70 ölkəsində Azərbaycanın müxtəlif statuslu diplomatik nümayəndəlikləri üzərində də Dövlət bayrağı dalğalanır. Əminik ki, tezliklə bu bayraq Xankəndi və işğal olunmuş digər rayonlarımızın başı üzərində dalğalanacaq.

Natiq çıxışını daha bir bayramın tarixi ilə davam etdirərək bildirdi ki, 12 noyabr - Milli Konstitusiyamızın qəbul edildiyi gündür. Hər iki mühüm dövlət atributunun qəbulunun bir həftəyə düşməsi simvolik olduğu qədər də qanunauyğundur. Çünki onlar bir-birini tamamlayırlar. Müstəqil və müasir Azərbaycanın memarı olan ümummilli lider Heydər Əliyev digər milli qürur günlərimizlə yanaşı, konstitusiya ilə bağlı da milli maraqları rəhbər tutan mühüm qərarlar qəbul etmişdir. Hələ 1978-ci ildə ölkəmiz Azərbaycan SSRİ tərkibində olarkən yeni qəbul edilmiş Azərbaycan SSR Konstitusiyasında Azərbaycan dili dövlət dili kimi yer almışdır. Müstəqillik dövründə isə 1995-ci ildə Prezident Heydər Əliyevin rəhbərliyi altında yeni konstitusiyanın hazırlanması ilə bağlı xüsusi işçi qrupu yaradıldı və çoxsaylı müzakirələrdən sonra - 1995-ci il noyabrın 12-də ümumxalq referendumu ilə Azərbaycan Respublikasının yeni konstitusiyası qəbul edildi. Sonrakı dövrdə ölkəmizin inkişafı ilə bağlı yaranan zərurətlər nəticəsində Əsas Qanunda müvafiq dəyişikliklər edildi.

Preambula, 5 bölmə, 12 fəsil və 158 maddədən ibarət olan Azərbaycan Respublikasının Konstitusiyası ölkəmizin əsas qanunu kimi vətəndaşların həyat və fəaliyyətini tənzimləyir. Demokratik dəyərlərə əsaslanan konstitusiyamızda xalqımızın bütün hüquqları, o cümlədən təhsil almaq hüququ geniş əks olunub. Təhsil sahəsinin işçiləri kimi, biz Əsas Qanunun qarşımızda açdığı geniş imkanların şahidiyik. Son dövrdə Prezident İlham Əliyev cənablarının "Azərbaycan Respublikasında təhsilin inkişafı üzrə Dövlət Strategiyası"nın təsdiq edilməsi haqqında sərəncamı bu həqiqəti bir daha təsdiqləyir. Biz də çalışacağıq ki, ölkə başçımızın bizim üçün yaratdığı münbit şəraitdən faydalanaq, vətənimizə yeni-yeni dəyərli töhfələr verək.

Sonra tədbirdə institutun professor-müəllim heyətinin digər üzvləri çıxış edərək Dövlət bayrağı və Konstitusiya kimi mühüm atributların hər bir Azərbaycan vətəndaşının qürur mənbəyi olduğunu, gənc nəslin vətənpərvərlik ruhunda formalaşmasında böyük rol oynadığını vurğuladılar.

Tədbirin sonunda institutun Gənclər Təşkilatının üzvləri də çıxış edərək hər iki bayram münasibətilə institut kollektivini və xalqımızı təbrik etdilər.

BPKİYİ-nin Mətbuat xidməti

Azərbaycan müəllimi.- 2013.- 15 noyabr.- S.3.