Yaponiyanın "Tokyo Boeki Technology Ltd" şirkətinin

nümayəndələri Bakı Dövlət Universitetində olublar

Yaponiyanın "Tokyo Boeki Technology Ltd" şirkətinin prezidenti Kazuey Uçida, satış və marketinq şöbəsinin direktoru Keiji Takigawa, şirkətin Ukrayna ofisinin direktoru Aleksey Şpak və mühəndisi Vitaliy Tinkov Bakı Dövlət Universitetində olublar. Qonaqlar BDU-nun Nano araşdırmalar laboratoriyasına baş çəkib və "Tokyo Boeki Technology Ltd" şirkətindən alınmış cihazların hazırkı vəziyyətləri ilə tanış olublar. Nano araşdırmalar laboratoriyasında professor Məmmədəli Ramazanov cihazların texniki vəziyyəti və bu cihazlar vasitəsi ilə aparılan tədqiqatlar barədə onlara ətraflı məlumat verib.

Sonra qonaqları BDU-nun rektoru, akademik Abel Məhərrəmov qəbul edib. Görüşdə Bakı Dövlət Universitetində elektron mikroskopunda işləmək üçün treninq mərkəzi yaratmaq, gələcəkdə müxtəlif sahələrdə, materialşünaslıq, nanotibb, nanotoksikologiya və neftçıxarmada nanotexnologiyanın tətbiqi istiqamətlərində danışıqlar aparılıb və razılığa gəlinib. Qeyd edilən istiqamətlərdə treninqlər aparmaq üçün Yaponiyanın nüfuzlu şirkət və universitetlərindən mütəxəssislərin, professorların dəvət olunması üçün müzakirələr aparılıb.

BDU-nun bilikli və bacarıqlı tələbələrinin elmə həvəsinin artırılması məqsədi ilə "Tokyo Boeki Technology Ltd" şirkətinin xüsusi təqaüdünün verilməsi qərara alınıb. BDU-da təbiət elmləri istiqamətində elm muzeyinin, innovasiya texnologiyalarının elektron nümayişi üçün xüsusi sahənin yaradılması məsələləri, skanedici elektron mikroskopunun daha geniş imkanlarla işinin təmin edilməsi və nümunələrin tədqiqata hazırlanması məqsədilə xüsusi qurğunun alınması barədə də razılıq əldə edilib.

BDU-nun Mətbuat və informasiya şöbəsi

Azərbaycan müəllimi.- 2013.- 15 noyabr.- S.2.