"Ötən il bir neçə uğura imza atmışam"

Respublikamızın yeniyetmə gəncləri incəsənətin müxtəlif sahələrində öz istedad və bacarıqlarını nümayiş etdirərək xarici ölkələrdə keçirilən beynəlxalq müsabiqə və festivallarda Azərbaycanı layiqincə təmsil edirlər. Yeniyetmə və gənclərimizin mötəbər müsabiqələrdən xoş soraqlarını eşidəndə qürur hissi keçiririk. Belə istedadlı gənclərimizdən biri də haqqında söhbət açmaq istədiyim Nəcəfli Nərmin Etibar qızıdır.

Nərmin 1996-cı ildə Bakıda anadan olub. Bülbül adına Orta İxtisas Musiqi Məktəbinin X sinfində fortepiano ixtisası üzrə Ədilə Rəhimovanın sinfində təhsil alır. O, 2004-2007-ci illərdə Bakı şəhərində keçirilən müxtəlif müsabiqə və festivalların, Moskva şəhərində 8-12 yaşlı uşaqlar arasında keçirilən beynəlxalq müsabiqənin qalibi, Tbilisidə keçirilən beynəlxalq musiqi festivalının laureatı, II və IV beynəlxalq Rostropoviç, 2011-ci ildə III beynəlxalq Üzeyir Hacıbəyli festivallarının iştirakçısı olub. Yeniyetmə fortepianoçu 2008-ci ilin mayında ümummilli lider Heydər Əliyevin 85 illik yubileyinə həsr olunmuş I respublika müsabiqəsində Qran-pri mükafatına layiq görülüb.

Nərmin Nəcəfli 2006-cı ildə Parisdə YUNESKO-nun baş qərargahında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın təşəbbüsü ilə keçirilən "Azərbaycan mədəniyyətlərin və sivilizasiyaların kəsişmə nöqtəsi", 2008-ci ildə Strasburqda və Brüsseldə "Azərbaycanın xoşməramlı mələkləri" adlı konsert proqramlarında məharətlə çıxış edib. N.Nəcəfli İtaliyanın Azərbaycandakı səfirliyinin təşkilatçılığı ilə İtaliyada Forte dey Marmi şəhərində təşkil olunan solo konsertlərdə öz istedadını nümayiş etdirib. 2010-cu ildə isə Almaniyada keçirilən beynəlxalq müsabiqədə xüsusi prizə layiq görülən Nərmin İtaliyanın Eppan şəhərində 30 dəqiqəlik solo konsert proqramı ilə çıxış edib. Qeyd edək ki, akademiyada çıxış etmək üçün müsabiqəyə dünyanın bir çox ölkələrindən - ABŞ, Almaniya, Böyük Britaniya, Belçika, Yaponiya, Bolqarıstan, Polşa, Rumıniya, Rusiya, İsveç, Portuqaliya, İndoneziya və sair ölkələrdən qatılan 38 iştirakçıdan yalnız 8 nəfər seçim turundan qalib çıxıb. Sevindirici haldır ki, 8 nəfərdən biri Nərmin olub, o, Mədəniyyət və Turizm Nazirliyinin dəstəyi ilə İtaliyada Azərbaycanı layiqincə təmsil edib. Nərminin çıxışını professor Andrea Bonatta bəyənib və onu Polşaya Paderevski Piano Akademiyasına dəvət edib. Nərmin Polşanın Bıdqoş şəhərində Paderevski Akademiyasında professorlar İlya Şeps və Robert McDonalddan ustad dərsləri alıb, həm də Bıdqoş şəhərində keçirilən Qala konsertdə Polşa Dövlət Simfonik orkestrinin müşayiəti ilə Çaykovskinin 1 nömrəli konsertini ifa edib.

N.Nəcəfli 2011-ci ildə Paris Konservatoriyasının professoru Muza Rubatskitenin dəvəti ilə Fransanın Bagneres de Bigorre şəhərində keçirilən Piano Pic, Litvada isə II beynəlxalq Vilnüs fortepiano musiqisi festivallarında iştirak edib.

Gənc fortepianoçu Nərmin Nəcəfli 2012-ci ili uğurla başa vurub. Özünün dediyi kimi, bir neçə uğura da imza atıb. O, İtaliyanın Seregno şəhərində keçirilən beynəlxalq müsabiqədə böyük yaş qrupunda, Estoniyanın Narva şəhərində keçirilən IX beynəlxalq Şopen müsabiqəsində qalib adını qazanaraq diplom və hədiyyələrlə mükafatlandırılıb. Ən sevindirici anları isə Böyük Britaniyanın Nyukasl şəhərində keçirilən gənc pianoçuların V beynəlxalq müsabiqəsində iştirak etməsi və I yerə layiq görülməsi olub.

Azərbaycan Respublikası Prezidentinin 14 iyun 2007-ci il tarixli sərəncamı ilə Nərmin Nəcəfli xüsusi aylıq təqaüdə layiq görülüb və adı Azərbaycanın gənc istedadlarının "Qızıl kitab"ına yazılıb.

Sifai SƏFƏROVA

Azərbaycan müəllimi.- 2013.- 11 yanvar.- S.7.