Şamaxı şahmatçısı 6-cı dəfə finalda

Yanvar ayının 2-12-si tarixlərində Kürdəmir şəhərində yaş qrupları üzrə Azərbaycan birinciliyinin seçmə oyunları keçirilmişdir. Yarışda Bakı şahmatçıları istisna olmaqla respublikanın bütün şəhər və rayonlarının şahmatçıları təmsil olunmuşdur.

5 yaş qrupu üzrə oğlanlar və qızlar arasında finalda mübarizə aparacaq şahmatçıların adları məlum olmuşdur. Yarışlar İsveçrə sistemi üzrə keçirilmiş və əksər yaş qruplarında 9 tur oynanılmışdır. Şamaxı şahmatçıları uğurla yarışmışlar. Niyaz Məmmədov xüsusilə fərqlənmişdir. 14 yaşlı şahmatçımız bütün turnir boyu liderlər sırasında olmuş, Quba şahmatçısı Şəhriyar İsgəndərov və Şəki şahmatçısı Faiq İmamverdiyevlə birlikdə 7 xal toplayaraq turnirin qalibləri kimi finala vəsiqə qazanmışlar. Əlavə göstəricilərə görə Niyaz Məmmədov ikinci mükafata layiq görülmüşdür. Xüsusilə qeyd edilməlidir ki, bu, Niyazın final mərhələsinə 6-cı vəsiqəsidir. O, 2008, 2009-cu illərdə 10 yaşlıların, 2010-cu ildə 12 yaşlıların (finalda Niyaz V yeri tutmuşdur), bu il isə 14 yaşlıların turnirində qalib gəlmişdir. 2011-2012-ci illərdə isə Niyaz finala vəsiqəni Şamaxının oğlanlardan ibarət komandasının tərkibində qazanmışdır.

Niyaz Məmmədov 2010-cu ildə Gürcüstanın Batumi şəhərində keçirilən yeniyetmə şahmatçıların Avropa çempionatında da uğurla yarışmışdır.

14 yaşlılar arasında digər Şamaxı şahmatçısı Saleh Abdulrəhmanov da uğurla yarışmışdır. Saleh 4 şahmatçı ilə yanaşı 6.5 xal toplayaraq IV-VI yerləri bölüşmüşdür və yalnız əlavə göstəricilərə görə finala düşə bilməmişdir. Digər Şamaxı şahmatçıları - Asim Sərxanov, Cavanşir Məmmədov, Mənsur Sərxanov və İlahə Xudiyeva da turnirdə uğurla çıxış etmişlər.

Şahmatçılarımızı, onların məşqçisi - məktəbin baş məşqçi-müəllimi Yaşar Məmmədovu təbrik edir və onlara yeni-yeni uğurlar arzulayırıq. Niyazın mart ayında Bakı şəhərində respublika birinciliyinin finalında çıxış edəcəyi dördüncü cəhdində daha böyük qələbəyə nail olacağına inanırıq.

Asif AĞAYEV,

Şamaxı Şahmat

Məktəbinin direktoru,

əməkdar müəllim,

fəxri bədən tərbiyəsi və idman işçisi

Azərbaycan müəllimi.- 2013.- 18 yanvar.- S.7.