"İntellektə gedən yol" adlı müsabiqəyə yekun vuruldu

Tədbirdə Bakı Şəhəri üzrə Təhsil İdarəsinin müdiri Nailə Rzaquliyeva, Təhsil Nazirliyinin nümayəndəsi Adilə Mahmudova, Milli Məclisin deputatı Məlahət İbrahimqızı, Bakı Pedaqoji Kadrların İxtisasartırma və Yenidənhazırlanma İnstitutunun rektoru, professor Asəf Zamanov, Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə, məktəb direktorları, valideynlər və digər şəxslər iştirak edirdilər. Qeyd edək ki, müsabiqə ötən ilin dekabr ayında keçirilib. Məktəb, rayon və şəhər mərhələlərindən ibarət olan müsabiqədə yüksək nəticələr göstərənlər fərqləniblər. Müsabiqədə 47 nəfər qalib seçilib ki, onlardan 10-u "Qızıl onluğ"a daxil edilib.

Tədbiri giriş sözü ilə açan Bakı Şəhəri üzrə Təhsil İdarəsinin müdiri Nailə Rzaquliyeva qeyd etdi ki, BŞTİ-nin fəaliyyət istiqamətindəki prioritet sahələrdən biri də istedadlı şagirdləri üzə çıxarmaq və onların potensialını inkişaf etdirməkdən ibarətdir. Bu istiqamətdə bir çox tədbirlərin keçirildiyini bildirən N.Rzaquliyeva belə tədbirlərin təşkilində əsas məqsədin müstəqil Azərbaycanın gələcəyi və qarantı olan şagirdləri aşkar etməklə yanaşı, onlara dəstək olmaqdan ibarət olduğunu diqqətə çatdırdı. "İntellektə gedən yol" müsabiqəsinin də bu istiqamətdə atılan addımlardan biri olduğunu deyən N.Rzaquliyeva daha sonra çıxışında ümummilli lider Heydər Əliyevin uşaqlara və xüsusi istedada malik şagirdlərə göstərdiyi diqqət və qayğıdan söz açaraq ulu öndərin layiqli davamçısı ölkə Prezidenti İlham Əliyevin bu istiqamətdə gördüyü işlərdən bəhs etdi. Belə müsabiqələrin şagirdlərin həyatında xüsusi önəm daşıdığını bildirən Nailə Rzaquliyeva qalibləri təbrik edərək onlara gələcək həyatlarında uğurlar arzuladı.

Tədbirdə digər çıxış edənlər müsabiqənin əhəmiyyətindən danışaraq qalibləri təbrik etdilər.

"Qızıl onluq" kimi seçilən və müsabiqə iştirakçıları arasında ən intellektual hesab olunan şagirdlərə BŞTİ tərəfindən diplom, ensiklopediya və videokamera hədiyyə edildi. Müsabiqənin yarım final mərhələsinə çıxan 37 qalibə isə diplom və ensiklopediya təqdim olundu. Qaliblərlə xatirə şəkli çəkdirildi.

Niyazi RƏHİMOV

Azərbaycan müəllimi.- 2013.- 18 yanvar.- S.5.