Bakı Modern Məktəbi –

ibtidai siniflərdə müasir təlim

Son illər təhsilimizdə tətbiq olunmuş yeniliklərdən biri də Avropa standartlarına uyğun müasir tipli məktəblərin fəaliyyətə başlamasıdır. Belə məktəblərdən biri də ötən ilin sentyabrında açılmış Bakı Modern Məktəbidir.

Müasir dizaynlı, yeni texnologiya ilə təmin olunmuş sinif otaqları, "İCT News" elektron xəbər xidməti, hər fənn üzrə müxtəlif resurslarla təmin olunmuş bölmələr, musiqi, incəsənət, idman, tibb və digər yaradıcılıq mərkəzləri məktəbdə şagirdlərin istifadəsinə verilmişdir. Məktəbimiz təlim prosesini ABŞ-ın Kaliforniya Universitetinin (Los-Anceles) məktəblər üçün yeni tətbiqi metodologiyası əsasında aparır. Tədris ocağımız həmçinin Kaliforniyanın Santa Monika kolleci ilə də əməkdaşlıq edir. "Webinar" sistemi ilə müəllimlərimiz digər ölkələrin məktəbləri ilə onlayn əlaqəsi yaradır, fikir mübadiləsi edir, Azərbaycan təhsil sisteminə müsbət aura və dəyişikliklər gətirirlər. Beynəlxalq təcrübə əsasında yeni fikir və ideyaları Məktəb İnkişaf Proqramına daxil edirlər.

Azərbaycan və rus bölmələri ilə yanaşı, məktəbimizdə 1-ci siniflər üçün ingilis bölməsi də açılıb. Bundan başqa, müəssisədə dərsdən sonra şagirdlərin rəsm, musiqi, rəqs, şahmat, üzgüçülük dərnəklərində məşğul olması üçün hərtərəfli şərait yaradılıb. Məktəbimizdə Kaliforniya Universitetinin professoru, doktor Tamar Endryus və Morqan Hakiminin treninqləri davam edir və bütün müəllimlər bu treninqlərə cəlb olunurlar. Treninqin mövzularından biri də "Medical First Aid" təliminin keçirilməsidir. Bu dərslərin tətbiqində uşaqlar təcili ilk tibbi yardım göstərilməsi bacarıqları əldə edirlər. Apardığım bir ingilis qrupunda ingilis dilini tədris edirəm və dərslərimi müasir ingilis dili metodologiyası üzrə Böyük Britaniya, Kembricdə qazandığım bilik və bacarıqlar əsasında qururam. Məktəbimizdə dərsin məşhur rus pedaqoqu Lev Vqotskinin və isveç filosofu Jan Piajenin müasir ingilis dilinin tətbiqi nəzəriyyələri əsasında praktiki şəkildə keçilir. L.Vqotskiyə görə, şagirdlərə sərbəst fəaliyyətləri üçün ilkin istiqamətlər verilməli, Jan Piajeyə görə isə şagirdlər qazandıqları biliklər əsasında özləri sərbəst yaradıcılıq işlərinə qoşulmalıdırlar. Bundan başqa, məktəbdə şagird nailiyyətlərinin qiymətləndirilməsi 50 ballıq cədvələ əsasən aparılır. Buna görə də şagirdlərin əldə etdiyi nəticələr "İnkişaf kartı" vasitəsilə izlənilir. İngilis dili qruplarında bütün dərslər ingilis dilində aparılır və demək olar ki, müasir ingilis dilinin kurikulumlarına istinad edərək şagirdlər ilkin dinləyib-anlama və danışma bacarıqları qazanırlar. Rollu oyunlar, dairələrdə musiqi səsləndirmək, rəqs, riyaziyyat, təbiət və əl işləri üzrə yaradıcılıq dərslərimiz vardır. Şagirdlər çox böyük həvəs göstərərək bir-birlərinə bu dildə müraciətlər edir, ev tapşırıqlarını məktəbdə birgə əməkdaşlıq şəraitində yerinə yetirir və asudə vaxtlarını səmərəli keçirirlər. İngilis dili bölməsinin öz resurs mərkəzi, "Oyun otağı" (Play room) vardır. Resurs Mərkəzində ingilis dili müəllimləri müzakirələr, "dəyirmi masa"lar keçirir, treninqlərə cəlb olunur, xarici ədəbiyyatlardan istifadə edirlər.

Mən dərslərimi kiçikyaşlılarla yeni təlim üsulları əsasında aparıram, "Circle time" üsulunu motivasiya yaratmaq üsulu kimi tətbiq edərək şagirdləri salamlaşma, dairədə bir-birləri ilə qısa vaxt ərzində hal-əhval tutmağa cəlb edirəm. Bu zaman uşaqlar daha çox hava, təqvim və həftənin günləri haqqında söhbətlər aparır, demək olar ki, əyləncəli şəkildə ünsiyyət qururlar. Demək olar ki, hər gün dərslərimdə "Smart-notebook 2011" texnologiyasına əsasən lövhədə elektron dərslərin yığılması, tapşırıqların yerinə yetirilməsi və sərbəst işlər həyata keçirilir. Mən təbiət, riyaziyyat, texnologiya dərslərini də ingilis dilində aparıram. Şagirdlər dərslərdə qrup və individual işlərdə planşet və noutbuklardan istifadə edirlər, müxtəlif məntiqi çalışmaları, riyazi tapşırıqları yerinə yetirir, oyunlar oynayır, musiqi parçalarını dinləyir və ifa etməyi öyrənirlər. Buna baxmayaraq, mən çox dərslərimi məktəb avtobusundan istifadə etməklə təbiətin qoynunda, muzey, zoopark və parklarda və digər əyləncəli yerlərdə aparıram. Uşaqlar real həyat hadisələrini öz gözləri ilə görür, təmiz havada sağlam böyüyür, çoxlu məlumat əldə edirlər. Məsələn, həyat bilgisində "Canlılar və cansızlar aləmi" mövzusunda dərsimi zooparkda keçərkən uşaqlar canlıların həyat tərzini öyrənir, onların vərdişləri ilə yaxından tanış olurlar. "Play room"da uşaqlar müxtəlif dərs nümunələrini oyun formasında keçirlər. Məsələn, "Pul vahidi" mövzusunun tədrisində "shopping" oyununu keçirirlər. "Kukla Teatrı"nda (Puppet Theatre) isə nağıllara qulaq asır, özləri nağıllar qurur və kiçik kuklalardan istifadə edərək nağılları personallaşdırırlar.

İngilis dili dərslərimdə səhnəciklər hazırlayır, uşaqları rollu oyunlara cəlb edirəm. Bu dərsin əsas xüsusiyyəti odur ki, uşaqlar daha çox sərbəst olur, özlərini şəxsiyyət kimi hiss edir, utancaqlıqdan uzaqlaşır, sanki həyatda reallıqla üzləşir, problemin həllinə qoşulur və səmimi ünsiyyət yaradırlar.

Mən bir azərbaycanlı müəllim kimi fəxr edirəm ki, bu məktəbdə arzularımı həyata keçirir və Azərbaycanın gələcəyi olan kiçikyaşlılara ingilis dilini həvəslə öyrədirəm.

Samirə TEYMUROVA,

Bakı Modern Məktəbinin ingilis

dili bölməsinin baş müəllimi

Azərbaycan müəllimi.- 2013.- 25 yanvar.- S.5.