Azərbaycanlı şagird və tələbə Vyanada

keçirilmiş Gənclər Forumunda iştirak ediblər

Təhsil Nazirliyinin dəstəyi ilə Bakı şəhəri 189 nömrəli məktəbin şagirdi Afət Məmmədova və Azərbaycan Dövlət Neft Akademiyasının tələbəsi Salman Babazadə Birləşmiş Millətlər Təşkilatının Narkotik Vasitələr üzrə Komissiyasının Avstriyanın paytaxtı Vyanada keçirilmiş Gənclər Forumunda iştirak ediblər.

Dünyanın 30-dan çox ölkəsindən 60 nəfərin qatıldığı forumun əsas məqsədi gənclərin cəmiyyətdə narkomaniya ilə mübarizə tədbirlərinə cəlb edilməsindən və bu sahədə fikir mübadiləsi aparmaqdan ibarət olub.

Azərbaycan gəncləri forum çərçivəsində keçirilən qrup müzakirələrində öz təkliflərini səsləndiriblər. Narkomaniya ilə mübarizədə təbliğat vasitələrindən səmərəli istifadə və Azərbaycanın işğal altında olan Dağlıq Qarabağ bölgəsində narkomaniyanın yayılması ilə bağlı tədqiqat işlərinin aparılmasını əhatə edən təkliflər müsbət qarşılanıb.

Tədbirdə İsveç kraliçası Ülyahəzrət Silvia, Birləşmiş Millətlər Təşkilatının Narkotik Vasitələr üzrə Komissiyasının icraçı direktoru Yuri Fedotov da iştirak ediblər.

Azərbaycan müəllimi.- 2014.- 4 aprel.- S.4.