Yeniyetmə şahmatçının uğurları

Nail Qoşqar oğlu Bəşirli 2000-ci ildə Bakıda anadan olub. Hazırda 54 nömrəli tam orta məktəbin VII sinif şagirdidir. Uşaq yaşlarından idmanın şahmat növünə maraq göstərib. Valideynlərinin dəstəyi ilə Bakıdakı 1 nömrəli İxtisaslaşdırılmış Olimpiya Ehtiyatları Uşaq-Gənclər Şahmat-Dama İdman Məktəbində əməkdar məşqçi, beynəlxalq qrossmeyster Rəsul İbrahimovdan bu idman növünün sirlərini öyrənməyə başlayıb. İlk uğuru 2012-ci ilin yanvarında Bakı çempionatında iştirak edərək II yerə çıxması olub. Həmin ilin martında keçirilən Azərbaycan çempionatında da II yerə layiq görülüb. Ən böyük nailiyyəti isə 2013-cü ilin oktyabr ayında kişilər arasında keçirilən Bakı çempionatında I yerə çıxmasıdır. 2014-cü ilin yanvarında Bakı çempionatında iştirak edərək I yerin sahibi olub. Həmin ilin fevral ayında Belarusun Minsk şəhərində məşhur şahmatçı David Branşteyn adına keçirilən beynəlxalq turnirdə II yeri öz adına yazdırıb. 2014-cü ilin martında 14 yaşadək oğlanlar arasında keçirilən Azərbaycan çempionatında iştirak edərək II yerdə qərarlaşıb.

Nail şahmatda kifayət qədər uğur əldə etməklə yanaşı təhsil aldığı 54 nömrəli tam orta məktəbin əlaçıları sırasındadır. Məktəbin direktoru Sahibə Abbasova Nail haqqında danışarkən bildirdi ki, şahmatçımız güclü zəkası, təlim-tərbiyəsi ilə müəllimlərinin sevimlisidir. Biz də ona gələcək həyatında uğurlar arzulayırıq.

R.RAMAZANOĞLU

Azərbaycan müəllimi.- 2014.- 11 aprel.- S.9.