Mərkəzin yetirmələri

müsabiqə qalibləridir

Bakıdakı 21 nömrəli Uşaq-Gənclər Yaradıcılıq Mərkəzinin başlıca vəzifəsi hərtərəfli biliyə və bacarığa, dünyagörüşünə malik olan, onu daim inkişaf etdirən, müstəqil və yaradıcı düşünən, yüksək əxlaqi və mənəvi keyfiyyətləri özündə əks etdirən vətənpərvər gənclər yetişdirməkdir. Mərkəzdə 20 dərnəkdə 1100 nəfər uşaq, yeniyetmə və gənc məşğul olur. Burada "Milli rəqs", "Xor", "Musiqisevərlər", "Gənc dizaynerlər", "Azəri" və "Vokal" instrumental ansambllar, "İnci" rəqs qrupu, "Ekologiya", "Bədii gimnastika", "Bədii qiraət", "Rəsm", "Təsviri incəsənət", "Sağlam həyat tərzi" və sair dərnəklər fəaliyyət göstərir.

Mərkəzin rəhbəri Fatma Təhməzova bildirdi ki, yetirmələri beynəlxalq müsabiqə və festivallarda, müxtəlif nominasiya üzrə keçirilən müsabiqələrdə daim qalib adını qazanıblar, diplom, medal, kuboklarla mükafatlandırılıblar. Mərkəzin istedadlı yetirmələrindən olan Cavid Məmmədov təsviri incəsənət dərnəyi üzrə Hindistanda keçirilən "Şankar" rəsm müsabiqəsində II yerin qalibi olaraq medalla təltif olunub və adı "Uşaq ensiklopediyası"na düşüb. Hər il Türkiyədə keçirilən ənənəvi 23 Aprel beynəlxalq uşaq festivalının iştirakçısı olan istedadlar diplom və fəxri fərmanlara layiq görülüblər. Aydan Hətəmli, Leyla Əkbərova, Nərgiz Zeynalova, Nurana Manafova, Elşən Fətullayev, İbrahim Əzizov, Üzeyir Bayramov, Nigar Əliyeva, Məhəmməd Behbudov, Elnurə Zalova, Eldar Hüseynov, Toğrul İbrahimli və Səid Quluzadə mərkəzin fəxridirlər.

Qeyd edək ki, 2014-cü ilin mayında Beynəlxalq Biomüxtəliflik Günü münasibətilə paytaxtın uşaq və gənclər yaradıcılıq mərkəzləri arasında "Dünyanın mədəniyyət rəngləri" mövzusunda müxtəlif xalqların milli kuklalarının hazırlanması və bədii kompozisiyasının təqdimatı üzrə keçirilən yarışmada mərkəzin yetirmələri fəallıq göstərərək məktəb ləvazimatları ilə mükafatlandırılıblar.

2014-cü ilin oktyabrında Bakıda Avropa Şurasının "Hər beş uşaqdan biri" kampaniyası çərçivəsində "Biz zorakılığa yox deyirik!" mövzusunda "Rənglərin dili ilə" adlı rəsm müsabiqəsində mərkəzin təsviri incəsənət dərnəyinin üzvlərindən Murad və Emin Şahvələdov qardaşları, Həcər Aslanlı, Aytən Ələkbərli diplom və xatirə hədiyyələri qazanıblar.

Gənclər və İdman Nazirliyinin 9 Noyabr - Dövlət Bayrağı Gününə həsr etdiyi tədbirdə bədii qiraət dərnəyinin üzvü Gülü Rüstəmli I dərəcəli diploma layiq görülüb.

F.Təhməzova yaxın günlərdə mərkəzin yeni binaya köçürüləcəyi, orada yaradılacaq şəraitdən maksimum bəhrələnərək yetirmələrinin daha yüksək uğurlar qazanacaqları barədə inamla danışdı.

Sifai SƏFƏROVA

Azərbaycan müəllimi.- 2014.- 19 dekabr.- S.11.