İkinci sinif şagirdi

böyük uğurlar sorağında

Qaflan Abbasov 2007-ci ildə Bakıda anadan olub. Paytaxtdakı 210 nömrəli tam orta məktəbin II sinif şagirdidir. Yaşının az olmasına baxmayaraq qeyrı-adi istedad sahibidir. 5 yaşından Nizami rayon Uşaq -Gənclər Yaradıcılıq Mərkəzində "Bal" rəqsləri qrupunda məşğul olur. "Milli rəqs", "Azəri inciləri" rəqs qruplarının,"Çiçəyim" uşaq teatr studiyasının üzvüdür. 2013-cü ildə ilk uğuruna imza atıb. Milli Konservatoriyada bal rəqsləri üzrə keçirilən müsabiqədə I yeri tutaraq diplom və medalla təltif olunub. 2014-cü ilin noyabrında Azərbaycan kuboku və idman rəqsləri üzrə keçirilən müsabiqədə I yerə layiq görülüb.

Mərkəzin sevimli və bacarıqlı üzvü olan Q.Abbasov müxtəlif telekanallarda ayrı-ayrı uşaq verilişlərində iştirak edib. Mədəniyyət telekanalında "Dərsdən sonra" verilişində moda nümayiş etdirərək tamaşaçı sevgisi qazanıb. Space telekanalında yayımlanan "Mən böyümüşəm" uşaq verilişində maraqlı çıxışı ilə tamaşaçılarda xoş ovqat yaradıb. Qaflan bir çox tədbirlərdə məharətlə çıxış edib. Hər ilin mayında ulu öndər Heydər Əliyevin doğum günü münasibətilə təşkil olunan Gül bayramlarında, Heydər Əliyev Fondunun təşkil etdiyi uşaq tədbirlərində, Fondun yeniyetmələr üçün keçirtdiyi Yeni il şənliklərindəki çıxışları maraqla qarşılanıb.

Böyük istedad sahibi olan Qaflan dərs əlaçısıdır. Rus və ingilis dillərində sərbəst danışır. İdmanın taekvando növü ilə də məşğul olur. Gələcəkdə diplomat olmaq arzusu ilə yaşayır. Bu müqəddəs arzusuna qovuşmaqda Qaflana uğurlar arzulayırıq.

Sifai SƏFƏROVA

Azərbaycan müəllimi.- 2014.- 26 dekabr.- S.7.