Mahir tar ifaçısı Azərbaycan Milli

Konservatoriyasında oxumaq arzusundadır

Məhəmməd Xanlarov 1996-cı ildə Bakıda müəllim ailəsində anadan olub. Paytaxtdakı 126 nömrəli tam orta məktəbi bitirib. Uşaqlıqdan musiqiyə, xüsusilə tar alətinə böyük həvəsi olub. Valideynləri musiqiyə yüksək dəyər verdiyinə görə ona dəstək olublar. 2005-ci ildə L. və M.Rostropoviçlər adına 21 nömrəli onbirillik musiqi məktəbinə Zamin Rzayevin sinfinə qəbul olub. Zamin müəllim bu sənətin sirlərini ona dərindən öyrətməyə çalışıb. Musiqi məktəbində oxuyarkən bir çox tədbir və konsertlərdə iştirak edib. O, 2010-cu ildə II Respublika müsabiqəsinin laureatı adını qazanıb. Musiqi məktəbini əla qiymətlərlə bitirib. 2011-ci ildə Azərbaycan Milli Konservatoriyası tərkibində Musiqi Kollecinin xalq çalğı alətləri ixtisası üzrə tar sinfinə daxil olub. Burada ona ixtisas fənnindən Samir Şahbəddinov və muğam fənnindən Sabir Ələkbərov dərs deyib.

Məhəmməd Musiqi Kollecinin ictimai həyatında fəal iştirakına görə rəhbərlik tərəfindən bir neçə dəfə fəxri fərmanla mükafatlandırılıb. 2011-ci ildə Milli musiqi alətləri ifaçılarının respublika festivalında III dərəcəli, 2014-cü ildə III Respublika müsabiqəsində I dərəcəli diplomla təltif olunub.

III Respublika müsabiqəsindəki çıxışı ona uğur gətirib. Xalq artisti, professor Ramiz Quliyev ifasını çox bəyənib və onu Azərbaycan Radio və Televiziya Verilişləri QSC tərkibində olan Əhsən Dadaşov adına "Xatirə" ansamblına apararaq bədii rəhbər, xalq artisti Adil Bağırova təqdim edib. Adil Bağırov onun ifaçılıq məharətini yüksək dəyərləndirib və ansambla tar ifaçısı qəbul edib.

Hazırda Azərbaycan Milli Konservatoriyası tərkibində Musiqi Kollecinin IV kurs tələbəsi olan Məhəmməd kolleci bitirdikdən sonra Azərbaycan Milli Konservatoriyasına daxil olmaq arzusu ilə yaşayır.

Sifai SƏFƏROVA

Azərbaycan müəllimi.- 2014.- 26 dekabr.- S.7.