Bakı Slavyan Universitetinin

beynəlxalq əlaqələri genişlənir

Bakı Slavyan Universiteti hər zaman Azərbaycanda təhsilin inkişafına öz töhfəsini verməkdədir. Bu təhsil ocağının bir sıra xarici ölkə universitetləri ilə sıx əlaqələri var. Bu günlərdə BSU-nun rektoru, AMEA-nın müxbir üzvü, professor Kamal Abdullayevin rəhbərlik etdiyi nümayəndə heyəti Türkiyənin İstanbul şəhərindəki Kadir Has Universitetinin qonağı olub. Universitetlə tanışlıqdan sonra dəvətə görə təşəkkür edən professor Kamal Abdullayev türkiyəli həmkarını Bakı Slavyan Universitetinə dəvət edib. Kadir Has Universitetinin rektoru, prof.dr. Mustafa Aydın da öz növbəsində tanışlıqdan məmnunluğunu ifadə edib və universitetlər arasında qarşılıqlı əlaqələrin bütün mümkün istiqamətlərinin müzakirə olunmasının vacibliyini vurğulayıb.

Görüşdə Bakı Slavyan Universiteti ilə Türkiyənin Kadir Has Universiteti arasında anlaşma memorandumu imzalanıb. Sözügedən müqaviləyə görə, universitetlər arasında bakalavr və magistratura səviyyəsində tələbələrin, eyni zamanda müəllim və tədqiqatçıların mübadiləsi nəzərdə tutulub. Bundan başqa, Bakı Slavyan Universiteti ilə Kadir Has Universiteti arasında birgə tədqiqatlar aparılacaq və layihələr gerçəkləşdiriləcəkdir, birgə yay məktəblərinin təşkili də universitetlər üçün prioritet məsələlərdəndir.

Sonda Bakı Slavyan Universitetinin rektoru, professor Kamal Abdullayev səmimi qəbul üçün Kadir Has Universitetinin rektoru, professor dr. Mustafa Aydına təşəkkürünü bildirib.

Onu da qeyd edək ki, Kadir Has Universiteti geniş beynəlxalq əlaqələri və yüksək səviyyəli kadr hazırlığına görə Türkiyədə xüsusi nüfuza malik universitetlərdəndir.

Şakir CƏFƏROV

Azərbaycan müəllimi.- 2014.- 7 fevral.- S.4.