AMEA Nizamnamə Komissiyasının yekun iclası

Azərbaycan Milli Elmlər Akademiyasının (AMEA) Rəyasət Heyətində AMEA Nizamnamə Komissiyasının yekun iclası keçirildi.

İclası giriş sözü ilə Nizamnamə Komissiyanın sədri, AMEA-nın vitse-prezidenti, akademik İsa Həbibbəyli açaraq komissiyanın fəaliyyəti ilə bağlı məlumat verdi. Akademik İsa Həbibbəyli AMEA-nın Nizamnaməsinin yenidən işlənilməsi barədə AMEA Rəyasət Heyətinin 18 sentyabr 2013-cü il tarixli qərarının yerinə yetirildiyini bildirdi, bu müddətdə xeyli sayda təklif və mülahizələrin komissiyaya təqdim olunduğunu xatırladaraq qarşıda duran vəzifələrdən danışdı. Qeyd edildi ki, akademiyanın Nizamnaməsinin daha təkmil variantı yeniləşdirilməli, ölkəmizin və elmimizin müasir tələbləri səviyyəsinə uyğunlaşdırılmalı və burada bir neçə prinsipial məsələyə aydınlıq gətirilməlidir ki, bu da Azərbaycanda elmin inkişafının, onun prioritet istiqamətlərinin müəyyənləşdirilməsində mühüm əhəmiyyətə malikdir.

Ölkə Prezidenti cənab İlham Əliyevin elm və təhsilə diqqət və qayğısını önə çəkən akademik İsa Həbibbəyli akademiya üzvlərinin də fəal yaradıcılıq istiqamətlərinin müəyyən edilməsinə, ölkəmizdə elmin inkişafının daha da yüksəldilməsinə, o cümlədən dünya elminə inteqrasiya proseslərinin sürətləndirilməsinə zəmin yaradıldığını xüsusi vurğuladı. O, bu məqsədlə yeni dövrdə akademiyada aparılan islahatlarda, bu ali elmi qurumun işinin məcrasının müsbət mənada dəyişərək yeni mərhələyə qədəm qoymasında, bəzi prioritet sahələrin yaradılmasında AMEA rəhbərliyinin, şəxsən akademik Akif Əlizadənin böyük əzmkarlıqla fəaliyyət göstərdiyini nəzərə çatdırdı. Akademik İsa Həbibbəyli dedi ki, akademiyada aparılan islahatlar, əhəmiyyətli dəyişikliklər bir sıra mətləbləri ortaya çıxarmışdır ki, bu sırada AMEA Nizamnaməsinin bəzi əlavə və dəyişikliklərlə yenidən qəbul edilməsi zərurəti də dayanır. Bu məqsədlə yaradılmış Nizamnamə Komissiyasının və İşçi qrupunun fəaliyyətini yüksək dəyərləndirən akademik komissiyaya daxil olmuş təklif və mülahizələrin diqqətlə təhlil edildiyini nəzərə çatdırdı, bu zaman ölkə qanunvericiliyi çərçivəsində Rusiya, Polşa, Belarus, Qazaxıstan, Çexiya, Bolqarıstan, Özbəkistan və bir sıra qabaqcıl Avropa ölkələrinin elmi qurumlarının Nizamnamə təcrübələrinin öyrənilməsi diqqət mərkəzində olmuşdur.

Komissiyanın üzvü, AMEA-nın akademik-katibi, müxbir üzv Rasim Əliquliyev akademiyada yeni sənədlərin qəbulu və bəzilərinin yenidən işlənməsinin vacib əhəmiyyət kəsb etdiyini bildirərək bunu akademiyanın inkişafında yeni mərhələnin qarşıya çıxardığı bir məsələ kimi dəyərləndirdi. XXI əsrin ideologiyasının Azərbaycana da sürətlə nüfuz etdiyini qeyd edən Rasim Əliquliyev texnoparkların yaradılmasının, biliklər iqtisadiyyatının formalaşdırılmasının, yeni dünya çağırışlarına qoşulmağın vacibliyini önə çəkdi, qloballaşma mühitində elmlərin qarşısında mühüm vəzifələrin qoyulduğunu diqqətə çatdırdı. O, bəzi əlavə və dəyişikliklərlə yenidən formalaşmalı olan Nizamnamənin böyük əhəmiyyət kəsb edəcəyini bildirdi, dövlət tərəfindən qəbul edilən qanunların inikası olan sənəddə elmin maliyyələşdirilməsi, informasiya-telekommunikasiya texnologiyalarının tətbiqi və s. kimi məsələlərə də yol açılacağına ümid etdiyini nəzərə çatdırdı.

Müzakirədə komissiyanın üzvləri - akademiklər Asəf Nadirov, Vaqif Fərzəliyev, müxbir üzv Pərviz Məmmədov, fizika-riyaziyyat elmləri doktoru Əminağa Sadıqov, Hüquqi təminat şöbəsinin rəisi, hüquq üzrə fəlsəfə doktoru Azər Namazov da çıxış etdilər. İclasda elmin maliyyələşdirilməsi, akademiyanın "Mərkəzi icra hakimiyyəti orqanı" statusu alması, ümummilli lider Heydər Əliyevin "Elmlər Akademiyasına Azərbaycan Milli Elmlər Akademiyası adının verilməsi haqqında" 15 may 2001-ci il tarixli Fərmanına əsasən 15 may tarixinin ölkədə "Elm günü" kimi təsis olunması, magistr sisteminin yaradılması və s. məsələlər müzakirə edildi. Həmçinin bölmələrin adlarına və strukturuna yenidən baxılması, yeni bölmələrin təşkili təklif olundu.

Sonda akademik İsa Həbibbəyli yekun sözü ilə çıxış edərək əlavə və dəyişikliklərin yer aldığı Nizamnamənin yenidən işlənərək son variantının 10 gün müddətinə AMEA-nın prezidenti, akademik Akif Əlizadəyə təqdim olunacağını bildirdi.

Ağahüseyn ŞÜKÜROV,

AMEA Nizami adına Ədəbiyyat

İnstitutunun Mətbuat xidmətinin rəhbəri

Azərbaycan müəllimi.- 2014.- 7 fevral.- S.2.