Bakı Slavyan Universiteti Rusiyanın Ural Federal

Universitetində Azərbaycanşünaslıq Mərkəzi açıb

Azərbaycanşünaslığın inkişafı, xarici ölkələrin nüfuzlu ali məktəblərində təhsil alan gənclərin Azərbaycanın ictimai-siyasi və sosial-mədəni həyatı, iqtisadi yüksəlişi ilə bağlı həqiqətlərlə tanış edilməsi, xalqımızın qədim tarixi və zəngin mədəniyyətinin, dili və ədəbiyyatının bu ölkələrdə təbliği və tədrisi beynəlxalq əlaqələri daim genişlənən Bakı Slavyan Universitetinin çoxşaxəli fəaliyyətinin əsas istiqamətlərindən biridir. Universitetin rektoru, AMEA-nın müxbir üzvü, professor Kamal Abdullayevin təşəbbüsü ilə bu gün Rusiya, Ukrayna, Belarus və Bolqarıstanın aparıcı universitetlərində BSU tərəfindən yaradılmış Azərbaycan tədris-mədəniyyət mərkəzləri uğurla fəaliyyət göstərir, bu mərkəzlər vasitəsilə xarici ölkə gənclərinə Azərbaycan dili tədris edilir, universitetlər arasında müəllim-tələbə mübadiləsi, təcrübələr təşkil olunur, azərbaycanşünaslığın tədqiqi istiqamətində elmi layihələr həyata keçirilir.

Rusiya Elmi gününə təsadüf edən fevralın 8-də Rusiyanın yüksək elmi potensiala malik ən nüfuzlu təhsil ocaqlarından biri kimi tanınan Rusiya Federasiyasının birinci prezidenti B.Yeltsin adına Ural Federal Universitetində Bakı Slavyan Universiteti tərəfindən yaradılmış Azərbaycanşünaslıq Mərkəzinin təntənəli açılış mərasimi keçirilmişdir.

Mərkəz 2012-ci ildə BSU-nun rektoru K.Abdullayev və UrFU-nun rektoru V.Koşkarov tərəfindən imzalanmış əməkdaşlıq müqaviləsinə uyğun olaraq fəaliyyətə başlamışdır.

Sverdlovsk vilayətinin paytaxtı Yekaterinburq şəhərinin mərkəzində, UrFU-nun Sosial və Siyasi Elmlər İnstitutunun binasında yerləşən Azərbaycanşünaslıq Mərkəzinin açılışında universitetin beynəlxalq əlaqələr üzrə prorektoru, həmin institutun direktoru, professor M.Xomyakov, Bakı Slavyan Universitetinin tədris işləri üzrə prorektoru, professor A.Hacıyev və tərbiyə işləri üzrə prorektoru, dosent O.Səmədov, Azərbaycan Respublikasının Yekaterinburq şəhərindəki Baş Konsulluğunun konsulları M.Əhmədov və İ.İskəndərov, Ümumrusiya Azərbaycan Konqresinin Ural şöbəsinin sədri Ş.Şıxlinski, Sverdlovsk vilayətinin qubernatoru yanında Millətlər İşləri üzrə Məşvərət Şurasının üzvü və işçi qrupunun rəhbəri N.Tümenseva, UrFU Sosial və Siyasi Elmlər İnstitutunun Beynəlxalq münasibətlər departamentinin direktor müavini A.Buynasov, Avropa araşdırmaları kafedrasının müdiri, professor A.Nesterov, Ukrayna, Tacikistan, Gürcüstan və Başqırdıstan milli icmaları regional şuralarının sədrləri, Sverdlovsk vilayəti ictimaiyyətinin və Azərbaycan diasporunun nümayəndələri, burada təhsil alan azərbaycanlı tələbələr, Azərbaycan dili tədris olunan V.Tatişev adına 108 nömrəli gimnaziyanın müəllim və şagirdləri iştirak etmişlər.

BSU-nun prorektoru, professor A.Hacıyev tədbir iştirakçılarını Bakı Slavyan Universitetinin rektoru, professor K.Abdullayevin adından salamlayaraq onun təbriklərini Ural Federal Universitetinin rəhbərliyinə və mərasimə dəvət olunmuş qonaqlara çatdırdı. Qeyd edildi ki, Bakı Slavyan Universiteti fəaliyyətə başlayan Mərkəzə xüsusi diqqətlə yanaşmış, onu Azərbaycan Respublikasının dövlət atributları ilə, elmi və tədris ədəbiyyatı, xalqımızın qədim tarixi və zəngin mədəniyyətinə dair məlumatlarla, müasir texniki avadanlıqla təmin etmişdir. Gələcəkdə Mərkəz vasitəsilə universitetlər arasında müəllim və tələbə mübadiləsinə, birgə elmi araşdırmalara, müştərək layihələrin gerçəkləşməsinə xüsusi önəm veriləcəkdir.

UrFU-nun Sosial və Siyasi Elmlər İnstitutunun direktoru, professor M.Xomyakov BSU tərəfindən və Ümumrusiya Azərbaycan Konqresinin fəal iştirakı ilə yaradılan Azərbaycanşünaslıq Mərkəzinin təkcə iki ali məktəb arasında əməkdaşlıq əlaqələrinin deyil, həm də xalqlar arasında dostluq münasibətlərinin möhkəmlənməsində mühüm rol oynayacağına əmin olduğunu bildirdi, onun BSU tərəfindən qısa bir müddətdə tərtib edilərək Azərbaycana maraq göstərən rusiyalı tədqiqatçıların və tələbələrin istifadəsinə verilməsini yüksək qiymətləndirdi.

Azərbaycan Respublikasının Yekaterinburq şəhərindəki Baş Konsulluğunun konsulu İ.İskəndərov və Ümumrusiya Azərbaycan Konqresinin Ural şöbəsinin sədri Ş.Şıxlinski Ural Federal Universitetində fəaliyyətə başlayan Azərbaycanşünaslıq Mərkəzinə gələcək elmi araşdırmalarda uğurlar dilədilər.

Açılış mərasiminin yüksək səviyyədə təşkili və keçirilməsi Mərkəzin yaxın gələcəkdə Azərbaycanı təbliğ və tədqiq edən müasir tədris məkanına və maraqlı mədəniyyət guşəsinə çevriləcəyinə əminlik yaradır.

BSU-nun Mətbuat xidməti

Azərbaycan müəllimi.- 2014.- 14 fevral.- S.4.