2014-cü il Gənclər üçün

Prezident mükafatçıları

Bu günlərdə elm, mədəniyyət, ədəbiyyat, təhsil və ictimai sahələrdə xüsusi fərqlənən bir qrup şəxsə Prezident İlham Əliyevin 1 fevral 2014-cü il tarixli sərəncamı ilə 2014-cü il Gənclər üçün Prezident Mükafatları verilib. Mükafat fevralın 5-də "Buta Palace"da qaliblərə təqdim olunub. Onları daha yaxından tanıyaq.

"Mükafata layiq görülməyim

mənim üçün xüsusilə dəyərlidir"

Şahin İSMAYILOV,

Azərbaycan Tələbə Gənclər

Təşkilatının (ATGT) sədri

1986-cı il fevralın 7-də Bakı şəhərində anadan olub. İlk təhsilini Əmircan qəsəbəsindəki 84 nömrəli tam orta məktəbdə alıb. 2004-2008-ci illərdə Azərbaycan Dillər Universitetinin (ADU) regionşünaslıq və beynəlxalq münasibətlər fakültəsində fransaşünaslıq ixtisası üzrə bakalavr, 2008-2010-cu illərdə həmin ixtisas üzrə magistr təhsili alıb. Hər iki təhsil pilləsini fərqlənmə diplomu ilə başa vurub. 2011-ci ildə ADU-nun sosial psixologiya üzrə fəlsəfə doktoru proqramına qəbul olunub. Hazırda həmin proqram üzrə təhsil alır.

Universitetdə təhsil aldığı vaxtdan bu günə kimi fəal ictimai fəaliyyətlə məşğuldur. 2005-ci ilin may ayından ali və orta ixtisas təhsili müəssisələrində formalaşdırılmağa başlanan Tələbə Gənclər Təşkilatının (TGT) Azərbaycan Dillər Universitetində ilk fəal üzvlərindən olub.

Şahin İsmayılov tələbə-gənclər təşkilatlarının vahid platformasının və şəbəkəsinin yaradılması təşəbbüsü ilə çıxış edib. 2009-cu ildə təsis qurultayında ATGTİ-nin sədri seçilib. 2012-ci il iyunun 2-də 88 tələbə gənclər təşkilatının 600-ə yaxın nümayəndəsinin iştirakı ilə ilk dəfə olaraq birbaşa elektron səsvermə ilə 5 namizəd arasından səslərin böyük əksəriyyətini toplayaraq ikinci dəfə ATGT-nin sədri seçilib. İttifaqa rəhbərlik etdiyi illər ərzində ATGTİ 500-dən çox iri yerli və beynəlxalq layihə həyata keçirib. Qurum Avropa Tələbələr Birliyinin (ATB) tamhüquqlu üzvü seçilib.

Şahin İsmayılov 2011-ci il aprelin 21-də bir qrup gənclə birlikdə Prezident İlham Əliyevin qəbulunda olub. Bu görüşdə o, tələbələrin sosial vəziyyətinin yaxşılaşdırılması və fəallığının artırılması istiqamətində bir sıra təkliflərlə çıxış edib. "Azərbaycan gəncliyi 2011-2015-ci illərdə" Dövlət Proqramının hazırlanması üzrə işçi qrupun üzvü olub. Prezident İlham Əliyevin sərəncamı ilə 23 aprel 2012-ci il tarixində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının, 4 aprel 2013-cü il tarixində isə Azərbaycan Respublikasının Prezidenti yanında Gənclər Fondunun Müşahidə Şurasının üzvü seçilib və hazırda bu qurumlarda fəaliyyətini davam etdirməkdədir. 2011-ci ildə Bakı Şəhər Gənclər və İdman Baş İdarəsi tərəfindən ilin ən yaxşı layihəsini hazırlayıb təqdim etdiyinə görə "Yaxşıların yaxşısı", 2012-ci ildə Gənclər və İdman Nazirliyi tərəfindən "İlin ən ictimai fəal gənci" nominasiyası üzrə mükafatlara layiq görülüb. Bir sıra xarici ölkələrdə keçirilən beynəlxalq layihələrin iştirakçısı olub.

- Cənab Prezident İlham Əliyevin "Azərbaycan gəncliyi 2011-2015-ci illərdə" Dövlət Proqramı çərçivəsində imzaladığı sərəncamla təsis edilən və gənclərin elm, mədəniyyət, ədəbiyyat və incəsənət, təhsil, ictimai fəaliyyət sahələrində nailiyyətlərə təşviq etmək məqsədi daşıyan "Gənclər üçün Prezident Mükafatı" dövlətimizin və şəxsən Prezidentimizin Azərbaycan gəncliyinə göstərdiyi diqqət və qayğının növbəti nümunəsidir. Mükafatın hər il 2 fevral - Gənclər Günündə öz fəaliyyətləri ilə seçilən gənclərə təqdim edilməsi, gənclərin potensialının reallaşdırılması, onların yaradıcılıqda, təhsildə və ictimai sferada daha yüksək nəticələr göstərməsi baxımından ciddi stimul yaradır. Düşünürəm ki, mükafat eyni zamanda ona layiq görülən gənclərin məsuliyyətini də artıracaq və hər birinin öz sahəsində daha böyük həvəslə çalışmasına təkan verəcək.

Mən bu mükafata ictimai sahədəki fəaliyyətimə görə layiq görülmüşəm. Tələbə olduğum illərdən ictimai fəaliyyətlə məşğulam, bir sıra mükafatlar, təltiflər almışam, ancaq bu mükafata layiq görülməyim mənim üçün xüsusilə dəyərlidir. Dövlət gənclər siyasətinin reallaşması, gənclərimizin ictimai işə cəlb edilməsi istiqamətində göstərdiyim fəaliyyətin cənab Prezidentimiz İlham Əliyev tərəfindən qiymətləndirilməsi mənə böyük stimul oldu. Düşünürəm ki, bu mükafat tək mənə yox, həm də ətrafımda olan xeyli sayda tələbəyə də böyük motivasiya oldu və onlar da gələcəkdə "Gənclər üçün Prezident Mükafatı"na layiq görülmək üçün səylə çalışacaqlar. Mən mükafatın gətirdiyi məsuliyyəti dərk edərək cənab İlham Əliyevin göstərdiyi etimada layiq olmaq üçün gənclər siyasətinin reallaşması və Azərbaycan gəncliyinin daha da inkişafı istiqamətində əlimdən gələn dəstəyi göstərəcəyəm.

"Etimadı doğrultmağa çalışacağam"

Pərvin NURƏLİYEVA,

ADPU-nun müəllimi, Azərbaycan

Yazıçılar Birliyinin üzvü, gənc yazıçı

1984-cü ildə Bakı şəhərində anadan olub. 2006-cı ildə Azərbaycan Dövlət Pedaqoji Universitetinin filologiya fakültəsini bitirib. 2009-cu ildə həmin universitetin Azərbaycan ədəbiyyatı ixtisası üzrə magistratura pilləsinə daxil olub və 2012-ci ildə fərqlənmə diplomu ilə bitirib. Hazırda ADPU-da qiyabi doktorantura təhsili alır, fəlsəfə doktoru dissertasiyası üzərində çalışır. 2006-cı ildən ADPU-da çalışır, 2012-ci ildən isə Azərbaycan ədəbiyyatı tarixi kafedrasına müəllim vəzifəsinə seçilib.

2010-cu ildən Azərbaycan Yazıçılar Birliyinin Mədəniyyət və Turizm Nazirliyi ilə birgə layihəsi olan "Gənc Ədiblər Məktəbi"nin məzunudur. Elə həmin ildə AYB-nin üzvü olub və Prezidentin xüsusi təqaüdünə layiq görülüb. Ədəbi mühitə gəldiyi ilk vaxtlarda mətbuatda esselər, kiçik hekayələr, publisistik məqalələrlə çıxış edib. Yazıları "Azərbaycan", "Ulduz", "Literaturnıy Azerbaydjan" dərgilərində, "525-ci qəzet", "Zerkalo" qəzetlərində işıq üzü görüb. 2011-ci ildə Pərvin Gənclər və İdman Nazirliyinin "Gənclər" mükafatına layiq görülüb. 2012-ci ildə isə Azərbaycan Yazıçılar Birliyinin "Təhsil" nəşriyyatı ilə birgə layihəsi olan "Müəllifin ilk kitabı" adlı seriyadan "Qar yağacaq" nəsr kitabı işıq üzü görüb. Oxucuların marağına səbəb olan bu kitab müəllifinə xeyli uğur gətirib. 2013-cü ildə Pərvin bir sıra ədəbi mükafatlar da alıb. "Qar yağacaq" kitabına görə Mədəniyyət və Turizm Nazirliyinin "Qızıl kəlmə", Rəsul Rza adına ədəbiyyat fondu tərəfindən "Rəsul Rza Beynəlxalq mükafatı"na layiq görülüb. Onun "Balerina" povesti isə ölkəmizdə keçirilən Milli Kitab Mükafatının ikincisi olub və əsər ayrıca kitab şəklində işıq üzü görüb. O, dəfələrlə xaricdə Azərbaycan gəncliyini təmsil edib. 2011-ci ildə Moskvada Gənc Yazarların I Beynəlxalq seminarında uğurla iştirak edib. Ruscaya tərcümə edilmiş hekayələri müxtəlif ölkələrdən olan seminar iştirakçılarının böyük marağına səbəb olub. "Samir üçün" və "Qar yağacaq" hekayələri müxtəlif almanaxlarda və Rusiyanın ədəbi qəzetlərində işıq üzü görüb.

Pərvin 2012-ci ildə Litvada keçirilən "Gənclik və sosial media" forumunda, Astanada keçirilən "Türk dünyası Dərgilər Konqresi"ndə iştirak edib. Türkiyənin Avrasiya Yazarlar Birliyinin üzvüdür. Türkcəyə tərcümə olunmuş hekayələri müxtəlif türk dərgilərində işıq üzü görüb.

O, həm də Latviyanın Beynəlxalq Yazarlar və Publisistlər Birliyinin üzvüdür, ruscaya tərcümə olunmuş hekayələri dünyanın 40 ölkəsində yayımlanan "Proza" almanaxlarına daxil edilib. 2013-cü ildə Türkiyədə Akçağ yayım evində "Balerina" adlı türkcə kitabı xalq yazıçısı Anarın ön sözü ilə işıq üzü görüb. Bədii yaradıclığı ilə yanaşı Pərvin rus və türk dillərindən tərcümələr də edir. Eyni zamanda o, müxtəlif səhnə əsərlərinə aid resenziyaların da müəllifidir.

- Hələ yay aylarından mətbuatda "Gənclər üçün Prezident Mükafatı"nın təsis edilməsi haqda məlumatları oxuyanda xeyli sevinmişdim. Bunu Azərbaycan gəncliyi üçün böyük hadisə hesab edirəm. Bu gün ölkəmizdə bütün sahələrdə gedən inkişaf göz önündədir. Memarı və qurucusu ümummilli liderimiz Heydər Əliyev olan müasir Azərbaycan günbəgün inkişaf edir, çiçəklənir. Bütün bu inkişafın da əsas tərkib hissəsini gənclərə münasibət, qayğı, istedadlı gənclərin üzə çıxarılması, onların gələcəkdə ölkəyə lazımlı kadr kimi hazırlanması təşkil edir. Bir Azərbaycan gənci kimi məni də bütün bu məsələlər sevindirir və irəliləməyimiz üçün yaradılan bu imkanlardan faydalanmağa çalışıram. Bu il mükafatlandırılan gənclərdən biri də mən oldum. Əlbəttə, bu istər yazıçı taleyimdə, istərsə də ümumiyyətlə karyeramda çox böyük uğurdur, əlamətdar hadisədir. Amma ən başlıcası bu, dövlətimizin, ölkə Prezidenti cənab İlham Əliyevin gənclərə qayğısının, diqqətinin, etdimadının daha bir nümunəsidir. Mən də bundan sonrakı fəaliyyətimdə bu etimadı doğrultmağa, ölkəmizin, millətimizin adına layiq olmağa çalışacağam.

"Yaradıcı gənclərimizə diqqət və

qayğının daha bir bariz nümunəsi"

Timur ƏSGƏROV,

Bakı Xoreoqrafiya Məktəbinin yetirməsi,

Sankt-Peterburqdakı "Marinsk" teatrının solisti

1990-cı il martın 31-də Bakıda hərbiçi ailəsində anadan olub. İlk təhsilini Gəncədəki M.Hüseynzadə adına 4 nömrəli tam orta məktəbdə alıb. Timur Əsgərov 1998-ci ildən peşəkar opera sənətindədir. Onun bu sənətə marağı orta məktəbdən başlayıb. III sinifdə oxuyarkən məktəbin nəzdindəki rəqs dərnəyinə gedib. Onu daha çox bal rəqsləri maraqlandırıb. Tezliklə ailə Bakıya köçüb və Timur təhsilini Bakı Xoreoqrafiya Məktəbində davam etdirib. 2008-ci ildə BXM-nı bitirən Timur 2008-2009-cu illərdə M.F.Axundov adına Dövlət Akademik Opera və Balet Teatrında, 2009-2011-ci illərdə isə T.Şevçenko adına Ukrayna Milli Akademik Opera və Balet Teatrında işləyib. 2011-ci ilin yanvarından isə Rusiyanın dünya şöhrətli "Marinsk" teatrının solistidir. Timur "Marinsk" balet truppası ilə Amerika, İtaliya, Almaniya, Meksika, Çin və b. ölkələrdə qastrol səfərlərində olub. O, Rusiyada fəaliyyət göstərdiyi cəmi 3 mövsümdə bir sıra xarici qastrol səfərlərində dünya baletinin onlarca ən mürəkkəb nümunələrini hazırlayaraq tamaşaçılara çatdıra bilib. 2014-cü il yanvarın 28-dən fevralın 3-dək "Marinsk" balet truppası tərkibində Vaşinqtonda "Kennedi-mərkəz"də çıxış edib. Fevralın 9-da isə Timur Arif Məlikovun "Məhəbbət əfsanəsi" baletində baş rolda çıxış edib.

O, XII Beynəlxalq balet müsabiqəsində qızıl medala layiq görülüb.

Timur Əsgərov gənclər üçün Prezident Mükafatına layiq görülməsi xəbərini Amerikada olduğu qastrol səfərində alıb. Timurun atası Vaqif Əsgərov bizimlə söhbətində dövlətimizin başçısının gənclərə göstərdiyi diqqət və qayğını çox yüksək qiymətləndirdi:

- Əlbəttə, Timurun Prezident Mükafatına layiq görülməsi xəbəri bizi çox sevindirdi. Bu mükafatın təsis olunması Azərbaycan Respublikasının Prezidenti cənab İlham Əliyevin yaradıcı gənclərimizə göstərdiyi yüksək diqqətin parlaq təzahürüdür. Dövlət başçımızın gənclər siyasətinin dolğun təcəssümüdür. Timurun belə yüksək mükafata layiq görülməsi üçün mən, ilk növbədə, Prezident İlham Əliyevə dərin minnətdarlığımı bildirirəm. Mən Timurun böyük səhnədə parlamasında ona dəstək olmuş ilk müəllimlərinə - Bakı Xoreoqrafiya Məktəbinin direktoru, əməkdar müəllim Nilufər Kərimovaya, xalq artisti Rəfiqə Axundovaya, Tamilla Məmmədovaya da öz minnətdarlığımı çatdırmaq istəyirəm.

"Bu, Azərbaycan elminə və

təhsilinə verilən mükafatdır"

Flora HACIYEVA,

BDU-nun nanomaterialların kimyəvi fizikası

kafedrasının müəllimi, böyük elmi işçi

1985-ci il yanvarın 26-da Tovuz şəhərində anadan olub. 1990-2000-ci illərdə buradakı N.Tusi adına orta məktəbdə oxuyub və təhsilini fərqlənmə attestatı ilə, 2004-cü ildə isə Bakı Dövlət Universitetinin kimya fakültəsini analitik kimya ixtisası üzrə fərqlənmə diplomu ilə başa vurub.

2006-cı ildən Bakı Dövlət Universitetinin nanomaterialların kimyəvi fizikası kafedrasında çalışır. F.Hacıyeva 2007-ci ildə dissertanturaya qəbul olunub, O, həmin ildən başlayaraq son illər dünyada çox geniş inkişaf edən nanotexnologiya sahəsində elmi tədqiqat işləri aparır. 2010-cu ildə 25 yaşında "Polipropilen, polivinildenflüorid və kadmium sulfid əsasındakı nanokompozisiyaların quruluşunun formalaşması və xassələrinin tədqiqi" mövzusunda dissertasiya işini müdafiə edərək kimya elmləri üzrə fəlsəfə doktoru elmi dərəcəsi alıb. Onun elmi tədqiqat işlərinin nəticələri "Tomson Reyters" sıyahısına daxil olan beynəlxalq jurnallarda dərc olunub və beynəlxalq konfrans və simpoziumlarda müzakirə və məruzə edilib.

Flora Hacıyeva nanotexnologiya sahəsi üzrə bir neçə beynəlxalq (STCU, SRDF, Saudia Arabia,Tempus və sair) və ölkədaxili qrant layihələrinin iştirakçısı və bir beynəlxalq layihənin rəhbəri olub. Ayrı-ayrı illərdə müxtəlif müsabiqələrin və yarışmaların qalibi olaraq diplom və sertifikatlara layiq görülüb. 2008-ci ildə Ulyanovsk şəhərində keçirilən "Opto, nanoelektronika, nanotexnologiyalar və mikrosistemlər" adlı beynəlxalq konfransda ən yaxşı məruzəyə görə diplomla, 2008-ci və 2009-cu illərdə atom-qüvvət mikroskopunda aldığı nəticələrə görə Rusiyanın Elm və Texnologiya Mərkəzi tərəfindən diplomlarla təltif olunub. F.Hacıyeva müxtəlif illərdə nanotexnologiya sahəsində keçirilən beynəlxalq konfrans, ali kurslar, seminar və treninqlərin iştirakçısı olub.

Flora Hacıyeva MDB ölkələrinin Gənc Alimlərinin Ekspert Şurasının üzvü, Bakı Dövlət Universitetinin Gənc Alimlər Şurasının sədridir. Hazırda "Yarımkeçirici nanohissəciklərlə modifikasiya olunmuş polimer kompozit strukturların sintezi, quruluşu və xassələri" mövzusunda doktorluq dissertasiyası üzərində işləyir. Bununla yanaşı, elmi tədqiqat işlərinin təhsil sahəsinə tətbiqi sahəsində də xeyli uğurlar qazanıb. Gənc tədqiqatçı Bakı Dövlət Universitetində kimya, fizika, biologiya və ekologiya fakültələrinin bakalvr və magistr pillələrində nanotexnologiya üzrə açılan ixtisaslar üçün fənn proqramlarının hazırlanmasında da fəal iştirak edir. O, kimya fakültəsinin bakalavr təhsil pilləsi üçün "Nanokimya və nanotexnologiyanın əsasları" və ekologiya fakültəsinin magistr təhsil pilləsi üçün "Nanotexnologiyanın ekologiyada tətbiqi" fənn proqramlarının müəllifidir. Hazırda ekologiya fakültəsi üçün magistr hazırlığı Avropa Birliyinin TEMPUS layihəsinin iştirakçısıdır. F.Hacıyeva nanotexnologiya sahəsində elmi innovasiyaların təhsil mühitinə transferi məsələləri ilə məşğul olur.

Flora Hacıyeva İslam Təhsil, Elm və Mədəniyyət Təşkilatının (İSESKO) maliyyələşdirdiyi "The development of technology of formation quantum nanowires in polymer matrices" (Polimer matrislərdə kvant nanonaqillərinin alınma texnologiyasının işlənməsi) qrant layihəsinin qalibi olub. 2012-ci ildə nanotexnologiyalar sahəsində qazandığı uğurlara görə MDB ölkələrinin "Debütlərin birliyi" beynəlxalq mükafatına layiq görülüb. Hazırda BDU-nun nanomaterialların kimyəvi fizikası kafedrasının müəllimi, nanoaraşdırmalar laboratoriyasında böyük elmi işçi vəzifəsində çalışır.

- Mən belə yüksək mükafata layiq görüldüyüm üçün, ilk növbədə, Azərbaycan dövlətinə, Azərbaycan Respublikasının Prezidenti möhtərəm İlham Əliyevə dərin minnətdarlığımı bildirirəm. Respublikamızda dövlət gənclər siyasətinin formalaşdırılması ümummilli lider Heydər Əliyevin adı ilə bağlıdır. Ulu öndər gənclərlə bağlı məsələləri həmişə dövlət siyasətinin əsas tərkib hissələrindən biri hesab edir, gənclərin imkan və bacarıqlarını yüksək qiymətləndirir, onların problemlərinin həlli istiqamətində həyata keçirilən tədbirlərə xüsusi önəm verirdi. Məhz onun 1 fevral 1997-ci il tarixli sərəncamı ilə 2 fevral Azərbaycan Respublikasında Gənclər Günü kimi təsis edilib.

Qloballaşmanın vüsət aldığı və informasiya cəmiyyətinin sürətlə formalaşdığı müasir dövrdə Azərbaycan Respublikasında sosial-iqtisadi, elmi-mədəni, təhsil və digər sahələrdə gənclərin daha fəal iştirakını təmin etmək istiqamətində aparılan işlərin yeni səviyyəyə yüksəldilməsi məqsədi ilə ulu öndərin yolunu uğurla davam etdirən möhtərəm Prezidentimiz İlham Əliyev tərəfindən çoxsaylı sərəncam və fərmanlar verilib, o cümlədən 2011-ci il 7 iyul tarixli 1621 nömrəli Sərəncamla "Azərbaycan gəncliyi 2011-2015-ci illərdə" Dövlət Proqramı təsdiq edilib və 2013-cü il 2 iyul tarixli 934 nömrəli Fərmanla "Gənclər üçün Prezident Mükafatı" təsis olunub. Məhz Prezident İlham Əliyevin böyük əməyi və səyi nəticəsində Azərbaycan gəncliyi bu gün artıq cəmiyyətin inkişafında ciddi rolu olan fəal sosial təbəqəyə çevrilib.

Bu gün universitetin Gənc Alimlər Şurasının sədri kimi mənə göstərilən diqqət və qayğıya, əldə etdiyim bu nailiyyətlərə görə həm universitet rəhbərliyinə, həm də Gənclər və İdman Nazirliyinə təşəkkür edir və minnətdarlığımı bildirirəm. Hesab edirəm ki, mənə verilən bu mükafat universitet elminə, ümumiyyətlə Azərbaycan elminə və təhsilinə verilən mükafatdır və mən bu etimadı doğrultmaq üçün bundan sonra da bütün səy və bacarığımla çalışacağam.

"Mükafata layiq görüldüyümə

görə çox sevinirəm"

Rafiq SƏFƏROV,

AMEA Geologiya İnstitutunun aparıcı elmi işçisi

1984-cü il sentyabrın 16-da Bakı şəhərində anadan olub. 1991-ci ildə Əmircan qəsəbəsində yerləşən 84 nömrəli məktəbin I sinfinə gedib və 2001-ci ildə Yasamal rayonunda yerləşən 1 nömrəli Respublika fizika-riyaziyyat və informatika təmayüllü liseyi bitirib. Həmin ildə Bakı Dövlət Universitetinin geologiya fakültəsinə qəbul olunub və 2005-ci ildə universitetin bakalavr pilləsini geofizika ixtisası üzrə bitirib. 2005-ci ildə BDU-nun geologiya fakültəsinə magistr pilləsi üzrə qəbul olub və 2007-ci ildə həmin fakültəni "seysmologiya və seysmometriya" ixtisası üzrə fərqlənmə diplomu ilə bitirib.

2005-2012-ci illərdə AMEA Geologiya İnstitutunun "Geotektonika və geodinamika" şöbəsində böyük laborant, kiçik elmi işçi, elmi işçi, böyük elmi işçi vəzifələrində çalışıb. 2013-cü ildən şöbənin aparıcı elmi işçisidir. 2008-2011-ci il tarixlərində Geologiya İnstitutunun aspirantı olub, geofizika ixtisası üzrə "Azərbaycan ərazisində müasir geodinamik şəraitin və seysmik təhlükənin GPS məlumatları əsasında tədqiqi" mövzusunda dissertasiya işini tamamlayıb və müzakirəyə təqdim edib.

2011-2012-ci illərdə Yaponiya Beynəlxalq Seysmologiya və Zəlzələ Mühəndisliyi İnstitutu, Yaponiya Milli Siyasi Tədqiqatlar İnstitutu və Yaponiya Beynəlxalq Əməkdaşlıq Agentliyi tərəfindən təşkil olunmuş "Seysmologiya, zəlzələ mühəndisliyi, sunami və təbii fəlakətlərin nəticələrinin azaldılması" mövzusunda 52-ci illik təlim kursunda iştirak edib və Nagoya Universitetində magistr təhsili alıb. Beynəlxalq təlim kurslarında və seminarlarda beynəlxalq və yerli qrant və layihələrdə iştirak edib. AMEA Geologiya İnstitutunun nəzdində fəaliyyət göstərən Nüvə Sınaqlarının Hərtərəfli Qadağan olunması Müqaviləsi Təşkilatının (CTBTO) Azərbaycan Milli Məlumat Mərkəzinin tədqiqatçısıdır. Eyni zamanda pedaqoji fəaliyyətlə də məşğul olur. Hazırda Bakı Dövlət Universitetinin seysmologiya və yer təkinin fizikası kafedrasında "Yerin fizikası" fənnini tədris edir.

- Fürsətdən istifadə edərək, mənə verilən mükafata və göstərilən etimada görə Azərbaycan Respublikasının Prezidenti cənab İlham Əliyevə öz dərin minnətdarlığımı bildirirəm. Cənab Prezidentin gəncliyin inkişafı məqsədi ilə təsdiq etdiyi Dövlət Proqramlarının və eyni zamanda, onun şəxsi qayğısı, diqqəti və himayəsinin nəticəsidir ki, gənclərimizin hər sahədə əldə etdikləri nailiyyətlər, qazandıqları uğurların sayı artmaqdadır. Mənim elmi fəaliyyətimdə qazandığım uğurlar da bu qayğı və diqqətin nəticəsidir. Gənclər üçün Prezident Mükafatına layiq görülməyimə görə çox sevinirəm və mənim üzərimdə zəhməti, əməyi olan valideynlərimə, müəllimlərimə, Bakı Dövlət Universiteti geologiya fakültəsinin professor-müəllim heyətinə, AMEA-nın rəhbərliyinə, elmi rəhbərimə minnətdaram. Bundan sonrakı elmi fəaliyyətimdə də Azərbaycan elminin inkişafı, onun beynəlxalq inteqrasiyası üçün aktiv və fəal olmaqla bacarıqlarımı əsirgəməyəcəyəm. Prezident Mükafatına layiq görülən bütün gəncləri təbrik edir və onlara gələcək fəaliyyətlərində uğurlar arzu edirəm.

"Adımı siyahıda görəndə böyük

sevinc və qürur hissi duydum"

İlyas İSMAYILLI,

Azərbaycan Skautlar Assosiasiyasının rəhbəri

1989-cu il martın 10-da Sumqayıt şəhərində anadan olub. 2005-ci ildə Bakıdakı 291 nömrəli "Araz" ekologiya liseyini bitirib, həmin il Bakı Dövlət Universitetinin hüquq fakültəsinə daxil olub. 2009-cu ildə həmin universiteti fərqlənmə diplomu ilə bitirib. 2009-2010-cu illərdə Azərbaycan Silahlı Qüvvələrində xidmət edib. 2010-cu ildə Bakı Dövlət Universitetinin hüquq fakültəsinin kommersiya hüququ ixtisasına qəbul olunub və 2012-ci ildə həmin fakültəni bitirib.

2006-2009-cu illərdə Bakı Dövlət Universitetinin Tələbə Gənclər Təşkilatının üzvü olub. 2006-cı ildən Azərbaycan Skautlar Assosiasiyasının Beynəlxalq Komissarının köməkçisi, 2009-2012-ci illərdə Azərbaycan Skautlar Assosiasiyasının beynəlxalq komissarı vəzifəsinə seçilib. 2006-cı ildə Misirdə təşkil olunan mədəni mübadilə proqramında iştirak edib, 2007-ci ildə İngiltərədə keçirilən Dünya Skautlarının toplantısında Azərbaycan kontingentinin komanda lideri təyin edilib. 2007-ci ildə Avrasiya Skaut Regionunun konfransında, 2008-ci ildə Ümumdünya Skaut Konfransında nümayəndə kimi iştirak edib, Avrasiya regionu adından hesablama palatasına üzv seçilib. Azərbaycan - Norveç skautları arasında əməkdaşlığın koordinatoru (2008-2009), Azərbaycan - Türkiyə skautları arasında əməkdaşlığın koordinatoru (2008-2013) seçilib. Müxtəlif illərdə ayrı-ayrı ölkələrdə keçirilmiş skaut konfranslarında iştirak edib. 2012-ci il dekabrın 28-də Azərbaycan Skautlar Assosiasiyasının rəhbəri seçilib. İlyas İsmayıllı bir sıra yerli və beynəlxalq tədbirlərdə Azərbaycanı layiqincə təmsil edib.

- Gənclər üçün Prezident Mükafatı ilə təltif olunmağımı ilk dəfə eşidəndə sevincimdən buna inanmadım, əmin olmaq üçün özüm Azərbaycan Respublikası Prezidentinin saytına daxil olub sərəncamlara baxdım. Öz adımı siyahıda görəndə çox böyük sevinc və qürur hissi duydum. Qeyd etmək istəyirəm ki, bu mükafat tək mənim zəhmətim nəticəsində olmayıb, bütün təşkilatımızın fəaliyyətinə, əməyinə verilən qiymətdir. Fəaliyyətimizin dövlətimiz tərəfindən yüksək qiymətləndirilməsi bir daha sübut edir ki, Azərbaycan üçün görülən hər bir iş ölkə rəhbərliyi tərəfindən nəzərə alınır. Gənclər üçün Prezident Mükafatı ilə təltif olunmaq şərəfinə nail olmağıma görə Azərbaycan Respublikasının Prezidenti cənab İlham Əliyevə, valideynlərimə, dostlarıma, Azərbaycan Skautlar Assosiasiyasının bütün üzvlərinə təşəkkürümü bildirmək istəyirəm. Onlarsız bu nailiyyətə çatmaq mümkün olmayacaqdı.

Səhifəni hazırladı:

Oruc MUSTAFAYEV

Azərbaycan müəllimi.- 2014.- 21 fevral.- S.6.