Abdulla Şaiqin mənzil-muzeyində

Mirzə Şəfi Vazehin xatirəsi anıldı

İyunun 24-də Abdulla Şaiqin mənzil-muzeyində Azərbaycan ədəbiyyatının dünya şöhrətli klassiki, maarifçi şair Mirzə Şəfi Vazehin anadan olmasının 220 illiyi münasibətilə "dəyirmi masa" keçirildi.

Tədbirdə Abdulla Şaiqin mənzil-muzeyinin əməkdaşlarının ev sahibliyi ilə Azərbaycan Dövlət Mədəniyyət və İncəsənət Universitetinin müəllimi, dosent, sənətşünaslıq üzrə fəlsəfə doktoru Minəxanım Əsədova, Azərbaycan Dövlət Pedaqoji Universitetinin müəllimi, dosent, filologiya üzrə fəlsəfə doktoru, şairə Təranə Yusifli Turan, AMEA Nizami adına Ədəbiyyat İnstitutunun Yeni dövr Azərbaycan ədəbiyyatı şöbəsinin aparıcı elmi işçisi, filologiya üzrə fəlsəfə doktoru Arzu Hacıyeva, Ədəbiyyat nəzəriyyəsi şöbəsinin böyük elmi işçisi, filologiya üzrə fəlsəfə doktoru Könül Nəhmətova, Səməd Vurğunun mənzil-muzeyinin əməkdaşları Səidə Abdullayeva və Esmira Xankişiyeva və digər qonaqlar iştirak edirdilər.

Abdulla Şaiqin nəvəsi, mənzil-muzeyin direktoru Ülkər Talıbzadə qonaqları salamlayaraq Mirzə Şəfi Vazehin yubileyinin burada keçirilməsinin təsadüfi olmadığını söylədi. Bildirdi ki, bu iki şəxs çox yaxındır. Abdulla Şaiq dərsliklər tərtib, klassikləri tədqiq edib, Mirzə Şəfi Vazeh də Abdulla Şaiqin tədqiq etdiyi nümayəndələrdəndir. Hər ikisi maarifçi şair, tərcüməçi olublar, eyni istiqamətdə çalışıblar. Sonra Mirzə Şəfi Vazehin şəxsiyyətini və yaradıcılığını işıqlandıran slayd-şou izlənildi.

"Dəyirmi masa"da Abdulla Şaiqin mənzil-muzeyinin elmi işçiləri Günel Rəsulova, Humay Teymurova, Elminaz Məmmədli məruzələrlə çıxış etdilər. Məruzələrdə Mirzə Şəfi yaradıcılığı öz dolğun ifadəsini tapdı. Gənc tədqiqatçılar Mirzə Şəfinin Avropada məhşurlaşması faktına ətraflı nəzər saldılar. Şairin təsəvvüfi görüşlərinin işıqlandırılması "dəyirmi masa" iştirakçılarının xüsusi diqqətini çəkdi. Həmçinin məruzəçilərin öz çıxışlarını ədəbi bir formada, kompozisiya şəklində təqdim etmələri də çox bəyənildi. Gənc tədqiqatçıların məruzələri ətrafında maraqlı diskussiya aparıldı. Tədbir iştirakçıları məruzələrə öz münasibətlərini bildirməklə yanaşı, geniş polemika ilə mövzuları davam etdirdilər.

Məruzələrdən sonra Mirzə Şəfi Vazehin sözlərinə yazılmış romans səsləndirildi. Abdulla Şaiqin mənzil-muzeyinin ənənəsinə uyğun olaraq söhbət çay stolunun ətrafında aparılmaqla tədbir yekunlaşdırıldı.

Könül NƏHMƏTOVA

Azərbaycan müəllimi.- 2014.- 4 iyul.- S.12.