Ən yaxşi məktəblərimiz

23 nömrəli tam orta məktəb

Təhsil ocağı 1899-cu ildə təsis edilib. 1995-ci ildə təhsil müəssisəsinə Azərbaycanın Milli Qəhrəmanı Tahir Həsənovun adı verilmiş və bu mərasimdə ulu öndərimiz Heydər Əliyev şəxsən iştirak etmişdir.

Ölkə Prezidenti cənab İlham Əliyevin sərəncamı ilə keçirilən "Ən yaxşı ümumtəhsil məktəbi" müsabiqəsinin qalibi olan Tahir Həsənov adına 23 nömrəli məktəb özünəməxsus koloriti, ənənələri, yüksək təlim keyfiyyəti ilə hər zaman ön sıralarda olub. Təhsil müəssisəsi 2009-cu ildən "elektron məktəb" statusu alaraq pilot məktəblər sırasına daxil olub.

Məktəbdə təhsil alan 1801 şagirdin təlim-tərbiyəsi ilə 118 nəfər yüksək ixtisaslı mütəxəssis məşğul olur. Onlardan 4 nəfəri əməkdar müəllim, 25 nəfəri "Ən yaxşı müəllim" müsabiqəsinin qalibidir. 5 nəfər "Qabaqcıl təhsil işçisi" döş nişanına layiq görülüb.

Hər il məktəbi bitirən məzunların 99 faizi təhsilini respublika, eləcə də dünyanın müxtəlif ölkələrinin nüfuzlu universitetlərində davam etdirir. ABŞ, Kanada, İsveçrə, Türkiyə, Çexiya, Böyük Britaniya və digər ölkələrdə oxuyanların 25 faizi "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində təhsil alır. Təkcə ötən ilin məzunlarından 32 nəfəri təhsilini xariici ölkələrin ali məktəblərində davam etdirir.

Son 3 ildə məktəbin məzunlarından 6 nəfəri qızıl, 2 nəfəri gümüş medala layiq görülüb. Məktəbin yetirmələrinin 50 faizi qəbul imtahanlarında 500, 11 nəfəri isə 600-dən yuxarı bal toplayıb.

Təhsil ocağında keçirilən müxtəlif bilik yarışları, intellektual oyunlar, müsabiqələr şagirdlərin maraq dairəsini daha da genişləndirir. "Breyn-rinq" "Nə, harada, nə zaman" kimi oyunlar, Kiçik Akademiyanın fəaliyyəti şagirdlərin istedad və qabiliyyətini üzə çıxarmaqda, onların potensialını daha da inkişaf etdirməkdə mühüm rol oynayır. Kiçik Akademiyada şagirdlər müxtəlif elmi işlərə cəlb olunur, tədqiqatlarının nəticələrini yoldaşları ilə bölüşürlər.

Qeyd etmək lazımdır ki, məktəb respublika və beynəlxalq əhəmiyyətli layihələrdə də yaxından iştirak edərək böyük uğurlar qazanır. Əkbər Rəşidov və Firuzə Məmmədova "İNEPO-EUROASIA" Beynəlxalq "Ətraf Mühitin Mühafizəsi" Layihə Olimpiadasında I yerə və Qran-priyə layiq görülüb. Aytac Talıblı Kiprdə keçirilən ekoloji layihənin qalibi olub. Məryəm Zöhrabbəyova 2013-cü ildə Moskvada keçirilən "Russkiy yazık: raznıye kulturı - yedinıy mir" olimpiadasında I yerə layiq görülüb. Pedaqoji kollektivin üzvləri arasında kurikulumlar üzrə təlimçilər, metodik vəsait, dərslik müəllifləri olanlar, eləcə də elmi-kütləvi, dövri mətbuatda metodik yazılarla çıxış edənlərin sayı az deyil.

Təhsil ocaqları həmişə öz adlı-sanlı məzunları ilə fəxr edir. 23 nömrəli məktəbin də adını ucaldan yüzlərlə məzunu var. Onlardan biri də Heydər Əliyev Fondunun prezidenti, İSESCO və UNESCO-nun xoşməramlı səfiri, Milli Məclisin deputatı Mehriban xanım Əliyevadır. Məhz onun təşəbbüsü ilə məktəb binasında yüksək səviyyədə yenidənqurma və təmir işləri aparılmışdır.

287 nömrəli "Zəkalar" liseyi

Lisey 1992-ci ildən fəaliyyət göstərir. 44 sinifdə təhsil alan 1093 nəfər şagirdin təlim-tərbiyəsi ilə 70 nəfər müəllim məşğul olur. Müəllimlərdən 2 nəfəri fəlsəfə doktorudur. 2 nəfəri əməkdar müəllim, 6 nəfəri "Ən yaxşı müəllim" müsabiqəsinin qalibidir. 3 nəfəri isə "Qabaqcıl təhsil işçisi" döş nişanına layıq görülüb. Bütün bunların nəticəsidir ki, təhsil sistemində müasir yanaşmaların tətbiqi ilə əlaqədar müsabiqələrdə fəal iştiraklarına, metodik ustalıq və pedaqoji səriştə nümayiş etdirdiklərinə, pedaqoji prosesdə müasir təlim metodlarını və yeni pedaqoji texnologiyaları səmərəli və yaradıcı tətbiq etdiklərinə görə müəllimlər Təhsil Nazirliyinin, BŞTİ-nin, Həmkarlar İttifaqının müxtəlif diplom və fəxri fərmanları ilə təltif olunub.

Lisey iki dəfə-2008 və 2013-cü illərdə "Ən yaxşı ümumtəhsil məktəbi" müsabiqəsinin qalibi olub. Liseyin şagirdləri mütəmadi olaraq fənn olimpiadalarının respublika turunda uğurla çıxış edirlər. Belə ki, son 5 ildə təhsil ocağının 5 nəfər şagirdi II, 9 nəfəri III, 12 nəfəri isə IV yerə layiq görülüb.

Məzunlardan Əli Əliyev 2011-ci ildə Tələbə Qəbulu üzrə Dövlət Komissiyası tərəfindən keçirilən ali məktəblərə qəbul imtahanlarında 700 bal toplayaraq respublika birincisi olub. Əli hazırda İngiltərədə təhsil alır. Bundan başqa, məzunlardan Şahlar Məmmədov Kanadada, Toğrul Süleymanov Fransada, Elbəy Bayramlı Türkiyədə və onlarla məzun dünyanın müxtəlif ölkələrində təhsillərini davam etdirirlər. Liseyi bitirən məzunlardan 13 nəfəri Prezident təqaüdçüsüdür.

TQDK-nın ali və orta ixtisas təhsili məktəblərinə qəbulun nəticələrinin elmi-statistik təhlilinə görə son 10 ildə liseyin məzunlarının ali məktəblərə qəbul üzrə göstəricisi respublikanın 10 ən yaxşı məktəbi sırasında olub. Son 5 ildə məzunlardan 47 nəfəri 600-dən yuxarı bal toplayıb. Qəbul faizi 2009-cu ildə 75%, 2010-cu ildə 82%, 2011-ci ildə 88%, 2012-ci ildə 92%, 2013-cü ildə isə 93% olub.

Liseyin şagirdləri müxtəlif müsabiqə və intellektual, eləcə də idman yarışlarında iştirak edərək yüksək nəticələr əldə edirlər. Liseyin V sinif şagirdi Abdulla Qədimbəyli yaşıdları arasında idmanın şahmat növü üzrə ikiqat Avropa və dünya çempionudur.

Liseyin şagirdləri bir sıra tədbirlərdə müvəffəqiyyətlə iştirak edirlər. "Yaşıl gələcək" Respublika ekoloji inşa müsabiqəsində 300-ə yaxın iştirakçı arasında liseyin IX sinif şagirdi Nəriman Əliyev I yeri tutub və ideyası yüksək qiymətləndirilib. "Azərbaycan dilini sevək, sevdirək" müsabiqəsinin final turunda "Ölkəşünaslıq" nominasiyası üzrə VIII sinif şagirdi Altay İsmayılov II və "Bədii qiraət" nominasiyası üzrə IX sinif şagirdi Höküməxanım Əliyeva III yerə layiq görülüblər.

2014-cü ildə keçirilən "Sabahın alimləri" müsabiqəsində "Ekologiya" nominasiyası üzrə liseyin IX sinif şagirdi Cəmil Mustafazadə və Nəriman Əliyev II yeri tutublar.

Cari tədris ili ərzində "İstedadların hazırlığı laboratoriyası" layihəsi çərçivəsində keçirilən Respublika olimpiadasının final turunda Bakı şəhəri üzrə 30 nəfər şagirddən 10 nəfəri "Zəkalar" liseyinin şagirdi idi. Həmin şagirdlərdən 6 nəfəri olimpiadada qalib olub. Onlardan Rəşad Qasımov I, Gülcan İsmayılzadə, Emin Nəsibov, Eldar Mustafayev II , Fidan Əsgərova və Zeynəb Şıxıyeva isə III yerləri qazanıblar.

Keyfiyyətli təhsilin nəticəsi olaraq liseyi bu il bitirən məzunlardan Əli Əliyev qızıl, Günel Məmmədova və Qoşqar Qədimbəyli isə gümüş medala layiq görülüblər.

"Elitar" gimnaziya

İlyas Əfəndiyev adına "Elitar" gimnaziya 2002-ci ildən fəaliyyət göstərir. Təhsil Nazirliyinin tabeliyində olan müəssisə gənc nəslin təhsili və onların müasir həyata hazırlanması sahəsində əldə etdiyi nailiyyətlərlə respublikanın öndə gedən məktəblərindən biri kimi tanınır. Gimnaziya Azərbaycan Respublikası Prezidenti İlham Əliyevin sərəncamı ilə 2007-2008-ci tədris ilində keçirilən "Ən yaxşı ümumtəhsil məktəbi" müsabiqəsinin qalibi olub. Təhsil ocağı 2009-cu ildə əsaslı təmir edildikdən sonra müasir avadanlıq və əyani tədris vəsaitləri ilə təchiz olunub.

Gimnaziyada 1102 şagirdin təlim-tərbiyəsi ilə 82 müəllim məşğul olur. Onlardan 2 nəfəri əməkdar müəllim, 3 nəfəri fəlsəfə doktorudur. 2 nəfəri isə "Qabaqcıl təhsil işçisi"döş nişanı ilə təltif olunub.

2010-2013-cü illər ərzində "Elitar" gimnaziya TQDK-nın ali məktəblərə qəbul imtahanlarındakı elmi-statistik məlumatlarına görə, ən yüksək nəticə göstərən tədris ocaqlarından biri olub. Bunun nəticəsidir ki, 2011-2013-cü illər ərzində gimnaziyanın məzunlarından 23 nəfəri 600-dən çox bal toplayaraq respublikanın və dünyanın ən nüfuzlu ali məktəblərinə daxil olub. Bu gün məzunlar Türkiyə, İngiltərə, Amerika Birləşmiş Ştatları, Avstriya, Kanada, Rusiya, Çexiya və digər ölkələrdə respublikamızı layiqincə təmsil edirlər. Gimnaziyanın məzunlarından 8 nəfəri Prezident təqaüdçüsüdür.

Təhsil müəssisəsinin şagirdləri mütəmadi olaraq respublika daxilində və beynəlxalq səviyyədə keçirilən müxtəlif layihələrdə, idman yarışlarında və yaradıcılıq müsabiqələrində uğurla iştirak edirlər. Belə ki, şagirdlərdən Erkin Ələkbərlinin rəsm əsəri dünyanın 57 ölkəsinin iştirak etdiyi beynəlxalq rəsm müsabiqəsində gümüş medala layiq görülüb. Bundan başqa, IX sinif şagirdi Emin Eminzadə İtaliyada keçirilən beynəlxalq musiqi festivalında Qran-pri mükafatına layiq görülüb. Sonra Emin dünya şöhrətli italyan müğənni Robertino Loretti tərəfindən İtaliyaya dəvət alıb və əfsanəvi tenor orada gənc həmyerlimizə bir neçə günlük xüsusi dərslər keçib.

Fənn olimpiadalarında çıxış edən gimnaziyanın şagirdləri bu il də böyük uğurlara imza atıblar. Belə ki, şagirdlərdən İsrail Osmanov fizika, Cəvahir Abbasova riyaziyyat, Hüriyyə Cəbiyeva isə ingilis dili fənləri üzrə məktəblilərin fənn olimpiadalarının yekun mərhələsində mümkün 40 balı toplayaraq I yerə layiq görülüb. Bundan başqa, Təhsil Nazirliyinin təşkil etdiyi "İstedad olimpiadası"nda 8-ci sinif şagirdi İsrail Osmanov fizika, VII sinif şagirdi Cəvahir Abbasova isə riyaziyyat fənni üzrə yüksək nəticələr nümayiş etdirərək "İstedadların hazırlığı laboratoriyası"na cəlb edilib. 8-ci sinif şagirdi İsrail Osmanov "İlin ən yaxşı 10 şagirdi" siyahısına daxil edilərək xüsusi kubokla mükafatlandırılıb.

Şagirdlər hər il ümummilli lider Heydər Əliyevin anadan olmasının ildönümü münasibətilə keçirilən "Heydər Əliyev uşaqların gözü ilə" inşa müsabiqəsində uğurla çıxış edərək yüksək yerlərə layiq görülürlər. Belə ki, gimnaziyanın şagirdi Nəzifə Nağıyeva bu il müsabiqədə III yeri tutub. Bundan başqa, şagirdlərdən İsrail Osmanov və Emin Əzimov "İNEPO-EUROASİA" Beynəlxalq "Ətraf Mühitin Mühafizəsi" Layihə Olimpiadasında "İdeal enerji" layihəsi ilə gümüş medal qazanmışdır.

Gimnaziyanın şagirdləri idman yarışlarında da bir sıra uğurlar qazanıblar. X sinif şagirdi Məcid Sofiyev idmanın taekvando növü üzrə yeniyetmələr arasında keçirilən respublika və dünya birinciliyində II və III yerlərə layiq görülüb. VI sinif şagirdi Barat Quliyev isə Türkiyədə keçirilən qılıncoynatma üzrə beynəlxalq turnirdən gümüş medalla qayıdıb. Gimnaziyanın şagirdlərdən ibarət basketbol komandası Türkiyədə keçirilən beynəlxalq yarışlarda 2 il dalbadal I yeri tutub.

2013-2014-cü tədris ili ərzində gimnaziyanın şagirdləri "Sərhədsiz riyaziyyat" Beynəlxalq riyaziyyat olimpiadasında iştirak edib. Olimpiadanın 2 - qış və yaz mərhələsi Bakıda keçirilmiş və şagirdlər 3 qızıl, 4 gümüş, 16 bürünc medal qazanmışlar. Bolqarıstanda keçirilən və 11 ölkənin nümayəndələrinin iştirak etdiyi final turunda şagirdlər respublikamızı layiqincə təmsil edərək 2 bürünc medalla vətənə qayıdıblar.

18 nömrəli tam orta məktəb

Məktəbin 100-dən artıq yaşı var. Hazırda məktəbdə 1688 şagird təhsil alır. Bu şagirdlərin təlim-tərbiyəsi ilə 156 müəllim məşğul olur. Məktəbdə dərslər Azərbaycan və rus dilində tədris olunur.

Müəllimlərdən 3 nəfər fəlsəfə doktoru, 3 nəfər əməkdar müəllimdir. 2 nəfər isə "Qababcıl təhsil işçisi" döş nişanı ilə təltif olunub. Bundan başqa, 7 nəfər müəllim "Ən yaxşı müəllim" müsabiqəsinin qalibidir. Məktəb 1999-cu ildə paytaxtdakı məktəblər arasında yaradıcı fəaliyyəti ilə fərqlənən "Ən yaxşı təlim-tərbiyə müəssisəsi" kimi II yerə, 2002-ci ildə isə I yerə layiq görülüb. Tədris ocağı 2009-cu ildə Azərbaycan Respublikası Prezidentinin sərəncamı ilə "Ən yaxşı ümumtəhsil məktəbi" müsabiqəsinin qalibi olub. Müxtəlif illərdə məktəbin məzunları qəbul imtahanlarında yuksək nəticələr əldə ediblər. 2012-2013-cü tədris ilində məktəbi bitirən məzunlardan 59%-i respublikamızın nüfuzlu ali təhsil müəssisələrinə daxil olaraq tələbə adını qazanıb. Onlardan Mirhadi Həbibov 675 balla Azərbaycan Dövlət Neft Akademiyasına qəbul olub.

Təhsil ocağının şagirdləri respublikada keçirilən müxtəlif müsabiqə, bilik və idman yarışlarında, fənn olimpiadalarında uğurla çıxış edirlər. Belə ki, Yasamal Rayon Gənclər və İdman İdarəsinin təşkilatçılığı ilə keçirilən ulu öndər Heydər Əliyevin anadan olmasının 91-ci ildönümünə həsr olunan "Xəmsə" intellektual oyununda məktəbin komandası II yeri qazanıb. 2012-ci ildə fənn olimpiadalarının respublika turunda Orxan Vəliyev Azərbaycan tarixi fənnindən I yerə layiq görülüb.

M.Müşfiq adına 18 nömrəli tam orta məktəbdə çalışan müəllimlər bilik səviyyələrini və peşəkarlıqlarını artırmaq məqsədilə müntəzəm olaraq təlim kurslarına cəlb olunur, treninqlərdə, təhsil sahəsinin aktual məsələlərinə həsr olunan seminarlarda iştirak edirlər. Məktəbin ingilis dili müəllimi Fatimə Məmmədova bu ilin 15-23 mart tarixlərində Böyük Britaniyanın Saint Mary"s Universitetində təlim səfərində olub, əldə etdiyi biliklər əsasında məktəb müəllimləri üçün treninq təşkil edib.

Məktəbin çox geniş imkanlara malik maddi-texniki bazası var. 2012-ci ildə Prezident İlham Əliyevin sərəncamı əsasında məktəbdə yenidənqurma işləri aparılıb, bütün sinif otaqları müasir kompüter, noutbuk, Smart lövhə və digər avadanlıqlarla təchiz olunub. Bundan başqa, yeni idman korpusu, 167 nəfərlik akt zalı, geniş qiraətxana şagirdlərin ixtiyarına verilib. 2012-ci il sentyabr ayının 15-də məktəbin açılışında Azərbaycan Respublikasının Prezidenti cənab İlham Əliyev iştirak edib, müəllim və şagirdlərlə görüşərək öz tövsiyələrini verib.

"Məktəb şagirdin dostudur" təhsil ocağının əsas devizidir. Məktəbdə tərbiyə işi 3 konsepsiya əsasında həyata keçirilir. I konsepsiya hər il oktyabr ayının 5-6-sı ənənəvi Müşfiq günlərinin keçirilməsi, II konsepsiya "Tarixi unutmaq haqqımız yoxdur" devizi altında şəhidlərin xatirəsinin anılması, III konsepsiya isə məktəbi bitirən məzunlarla "Xatirələr sorağında" adlı görüşün keçirilməsidir. Təhsil müəssisəsində 2013-cü ilin oktyabr ayında Turanbankın "Korporotiv Sosial Məsuliyyət" proqramı çərçivəsində "Azərbaycanın tarixi abidələri uşaqların gözü ilə" rəsm müsabiqəsi keçirilib, istedadlı şagirdlər qiymətli hədiyyələrlə mükafatlandırılıblar. Təhsil ocağında hər ay fənn aylıqları keçirilir, "açıq dərs"lər, müxtəlif viktorina, konfrans və "dəyirmi masa"lar təşkil olunur. Görülən bütün işlər məktəbin www.mekteb18.com saytında öz əksini tapır. Məktəbdə alman dilinin mükəmməl öyrənilməsi üçün 2009-cu ildə Almaniyanın Höte İnstitutu ilə müqavilə imzalanıb. Portnyor layihənin davamı olaraq hər tədris ilinin sonunda şagirdlər təlimlərdə olurlar. Bu tədris ilində də məktəbin müəllimləri Səkinə Əhmədova və Təranə Hacıyevanın rəhbərliyi altında 6 şagird Gürcüstanın Çxneti rayonunda, 5 şagird isə Almaniyanın Frankfurt şəhərində keçirilən təlim kurslarında iştirak edib. Keçən tədris ilində isə məktəbin X sinif şagirdi Sevil Dəmirli Almaniyanın Frankfurt şəhərində keçirilən təlimlərdə yüksək nəticə göstərərək həmin şəhərdə yerləşən universitetdə ödənişsiz təhsil almaq hüququ əldə edib.

132-134 nömrəli təhsil kompleksi

Bakının mərkəzində yerləşən 132-134 nömrəli təhsil kompleksi ulu öndər Heydər Əliyevin "Təhsil millətin gələcəyidir" və cənab Prezident İlham Əliyev tərəfindən səslənən "İnkişaf məqsədimizdir" fikirlərini əsas ana xətt kimi götürür. Eyni zamanda, Heydər Əliyev Fondu tərəfindən həyata keçirilən "Yeniləşən Azərbaycana yeni məktəb" layihəsi sanki Azərbaycan təhsilinə bir çağırışdır.

132-134 nömrəli təhsil kompleksinin çox qədim və maraqlı tarixi vardır. 1861-ci ildə Bakıda ilk dəfə fəaliyyətə başlayan "Müqəddəs Nina" adlı xeyriyyə cəmiyyətinin nəzdində qızlar məktəbi açılır. 1886-cı ildə qızlar gimnaziyası statusu alan bu tədris ocağı hazırda 132-134 nömrəli təhsil kompleksi yerləşən binaya köçürülür. Sonralar uzun illər bu binada 132 və 134 nömrəli məktəblər fəaliyyət göstərib.

2010-cu ildə cənab Prezident İlham Əliyevin xüsusi göstərişi ilə təmir, bərpa və yenidənqurma işlərindən sonra məktəblər birləşdirilərək artıq 132-134 nömrəli təhsil kompleksi kimi fəaliyyətə başlayıb. Hazırda yeni tədris ili üçün kompleksdə 2400 şagirdin təhsil alması nəzərdə tutulur.

132-134 nömrəli təhsil kompleksi fransız modeli olan "Ana məktəb"dən və liseydən ibarət tam orta təhsili həyata keçirən yeni tipli dövlət müəssisəsidir. Kompleks Azərbaycan Respublikası Təhsil Nazirliyinin birbaşa tabeliyində fəaliyyət göstərir.

Təhsil kompleksi şagirdin demokratiya, milli zəmin, azərbaycançılıq və Avropa təfəkkürünü özündə cəmləşdirməyi bacaran bilikli, bacarıqlı şəxsiyyət kimi yetişdirilməsinə xidmət edir.

Kompleksin I pilləsi - məktəbə hazırlıq fransız modeli olan "Ana məktəb" Azərbaycanda ilk dəfə tətbiq edilən beynəlxalq, inteqrativ bir layihədir. Bu layihə uşaqların erkən yaş dövründən psixoloji inkişafını əsas götürərək onlarda liderlik qabiliyyətinin üzə çıxarılmasını, xarici dillərin öyrədilməsini, məktəbə hazırlığını təmin edir.

Təhsil kompleksində xarici dillərin öyrədilməsi prioritet sayılır. Hazırda kompleksdə beş xarici dil tədris olunur: ingilis, fransız, rus, ərəb və italyan. Əsas məqsəd multilinqvistika və multikulturalizm, yəni çoxdillilik və çox mədəniyyətlilikdir. Təhsil ocağı bu xarici ölkələrlə sıx əlaqələr yaradır, müxtəlif layihələr həyata keçirir. Eyni zamanda, ingilis və fransız dillərində bilinqvistik təlim həyata keçirilir.

Kompleks UNESCO Assosiativ Məktəblər şəbəkəsinə daxildir.

Kompleks dövlət başçısının sərəncamına əsasən keçirilən "Ən yaxşı ümumtəhsil məktəbi" müsabiqəsinin qalibidir.

Təhsil kompleksinin şagirdləri ali məktəblərə qəbul üzrə birinci onluqda yer tutur. Dünyanın müxtəlif ali məktəblərində təhsil alan şagirdlərin sayı ildən-ilə artmaqdadır. Onlar Amerika, Fransa, Çexiya, İsveçrə, Rusiya, Ukrayna, Türkiyə, BƏƏ və s. ölkələrin ali məktəblərində təhsil alır. Son illərdə kompleksi bitirən şagirdlərdən 13 nəfəri qızıl və 1 nəfəri gümüş medala layiq görülmüşdür. Bu tədris ili IX sinfi bitirən 12 şagird fərqlənməyə layiq görülüb, 7 nəfər XI sinif şagirdi isə qızıl medala namizəddir.

Bu il "İNEPO-EUROASİA" Beynəlxalq "Ətraf Mühitin Mühafizəsi" Layihə Olimpiadasında iştirak edən 2 şagird qalib olaraq qızıl medala layiq görülüb. Kompleksin şagirdləri "Sabahın alimləri" müsabiqəsində 3 ildir ki, iştirak edirlər və müxtəlif nominasiyalar üzrə qalib olublar.

2013-cü ildə Fransanın Strasburq şəhərində keçirilən Avropa Parlamentı "EURONEST SCOLA" layihəsində kompleksin 6 şagirdi uğurla iştirak edərək sertifikat alıb.

Məktəbdə yüksək professionallıq göstərən müəllimlər çalışır. Onlardan 3 nəfəri fəlsəfə doktoru, 6 nəfəri əməkdar müəllim və 14 nəfəri " Ən yaxşı müəllim" müsabiqəsinin qalibidir. Maraqlı faktdır ki, müəllimlərdən 24 nəfəri məhz bu məktəbin məzunudur.

Kompleks müəllimlərinin peşəkarlığının artırılması məqsədilə təcrübə mübadiləsi üçün onlar xarici ölkələrə göndərilir. Bu, dünya təcrübəsini öyrənmək üçün çox əhəmiyyətlidir. Müəllimlərin bir çoxu müxtəlif beynəlxalq layihələrdəki iştirakına görə sertifikatlar almışlar. Beynəlxalq layihələrə qoşulmaq əsas məqsədlərdən biridir. Hazırda IB proqramına qoşulmaq üçün ciddi iş aparılır.

Hər bir təhsil müəssisəsinin ən böyük nailiyyəti onun məzunlarıdır. Burada keçən ildən "Məşhur məzunlar" adlı layihəyə başlanılıb. Layihənin əsas məqsədi məktəbi bitirən tanınmış, nüfuzlu, ziyalı məzunların şərəfli ömür yollarını gənc nəslə layiqincə çatdırmaqdan ibarətdir. "Məşhur məzunlar" layihəsinin ilk tədbiri bu məktəbi qızıl medalla bitirmiş görkəmli şərqşünas alim Aida İmanquliyevaya həsr olunmuşdur. İkinci tədbirdə isə Milli Qəhrəman Riad Əhmədovun ömür yolundan bəhs olunub.

Təhsil kompleksinin prioritet sahələrindən biri valideynlərlə aparılan işdir. Məktəbdə hazırda Hami şurasının işi genişlənməkdədir. Kompleksdə şagird özünüidarəetmə orqanı - şagird prezident və məktəb parlamenti fəaliyyət göstərir.

Məktəbdə psixoloji xidmət ən vacib sahədir. Psixoloji xidmətlə bağlı M.V.Lomonosov adına MDU-nun Bakı filialı ilə bağlanan müqavilə həm şagird, həm də müəllim kollektivinə çox kömək edir.

Şagirdlərin yaradıcı istedadını üzə çıxarmaq üçün "Məktəb filarmoniyası" layihəsi üzərində artıq iki ildir ki, iş gedir. Bu il həmin layihə təqdim ediləcək.

"Elektron kitabxana" layihəsi üzrə iş gedir. Eyni zamanda, təhsil kompleksində müxtəlif layihələrin həyata keçirilməsi üçün fandreyzinqlə əlaqədar ciddi iş aparılır.

Kompleks yenidənqurma işlərindən sonra bu gün üçün bütün müasir tələblərə ən yüksək səviyyədə cavab verən çox zəngin maddi-texniki bazaya malikdir. Burada lokal telestudiya fəaliyyət göstərir.

Kompleks artıq neçə ildir ki "Elektron məktəb" layihəsinə qoşulmuşdur. Kompleks Nizamnaməsinə uyğun olaraq, hər ay fənlər üzrə bütün şagirdlərin qiymətləndirilməsi həyata keçirilir. Valideynlər "Elektron məktəb" layihəsi çərçivəsində xüsusi kodla sistemə daxil olub övladlarının qiymətləri ilə tanış ola bilirlər.

2013-cü ildə kompleksdə Təhsil Nazirliyinin dəstəyi və "Samsung" şirkəti tərəfindən "Samsung Smart School" layihəsi həyata keçirilib.

Məktəbdə istedadlı uşaqların üzə çıxarılması, onlarda elmə marağı artırmaq üçün Kiçik Akademiyanın işi təqdirəlayiqdir.

ADA-da təqdimatı keçirilən, İtaliya - Azərbaycan Assosiasiyasının birgə nəşri olan "Via della Seta" - "İpək yolu" jurnalında kompleks haqqında geniş məqalə dərc olunub. Fərəhləndirici haldır ki, bu məqalədə 132-134 nömrəli təhsil kompleksini "Gələcəyin məktəbi" adlandırıblar.

Kompleksin www.132-134.com saytı fəaliyyət göstərir.

Hazırladılar: Hicran ƏKBƏROVA,

Niyazi RƏHİMOV

Azərbaycan müəllimi.- 2014.- 11 iyul.- S.4.