Bülbül adına Orta İxtisas Musiqi

Məktəbinin şagirdi Beynəlxalq

müsabiqələr və festivallar qalibidir

Atabəy İsmayılov 1998-ci ildə Fizuli rayonunun Horadiz qəsəbəsində anadan olub. O, Bakıdakı Bülbül adına Orta İxtisas Musiqi Məktəbinin şagirdidir. Hazırda əməkdar müəllim Əflaruz Məmmədovun sinfində tar ixtisası üzrə təhsil alır. İlk uğuru 2010-cu ildə N.Əliverdibəyov adına Gənc ifaçıların V Ümumşəhər müsabiqəsində I yerə layiq görülməsi olub. 2012-ci ildə dahi sənətkar Bülbülün anadan olmasının 115 illik yubileyinə həsr olunan festivalda böyük istedad və bacarıq nümayiş etdirərək I yerə layiq görülən yeniyetmə həmin il İtaliyanın Roma şəhərində Azərbaycan - İtaliya diplomatik əlaqələrinin 20 illiyinə həsr olunan "Azərbaycan- mədəniyyət ruzgarı" adlı konsertdə iştirak edib. M.V.Lomonosov adına MDU-nun Bakı filialında və "ÜNS" yaradıcılıq mərkəzində keçirilən tədbirlərdə uğurla çıxış edib. 2013- cü ildə Fransanın Strasburq şəhərində tarın UNESCO-nun qeyri-maddi mədəni irs siyahısına salınması münasibətilə keçirilən "Qafqazın mirvarisi" adlı konsertdə Azərbaycanı layiqincə təmsil edib. O, Azərbaycan Respublikası Ailə, Qadın və Uşaq Problemləri üzrə Dövlət Komitəsinin dəstəyi ilə keçirilən 1 iyun - Uşaqları Beynəlxalq Müdafiə Gününə həsr olunan "İstedadlı uşaqlar festivalı-2013"-ün qalibi olaraq diplom və kubokla, Azərbaycan Bəstəkarlar İttifaqı tərəfindən müasir Azərbaycan bəstəkarlarının əsərlərinin ifasına görə fəxri fərmanla mükafatlandırılıb. 2013-cü ildə ümummilli lider Heydər Əliyevin anadan olmasının 90 illik yubileyinə həsr olunmuş II Respublika müsabiqəsində fəal iştirakına görə Qran-Pri mükafatına layiq görülüb.

Beynəlxalq müsabiqələrdə və festivallarda əsl istedad nümayiş etdirən Atabəyin adı "Azərbaycanın gənc istedadlarının "Qızıl kitabı"na yazılıb və o, Azərbaycan Respublikasının Prezidenti İlham Əliyev cənablarının müvafiq sərəncamı ilə xüsusi aylıq təqaüdə layiq görülüb.

Qeyd edək ki, yeniyetmə 2014 -cü il 2 fevral - Azərbaycan Gəncləri Günü münasibətilə keçirilən tədbirdə musiqi sahəsində qazandığı uğurlara görə fəxri fərman və kubokla mükafatlandırılıb. Mayın 3-də isə Sankt-Peterburq Filarmoniyasında ulu öndər Neydər Əliyevin anadan olmasının 91-ci ildönümünə və Heydər Əliyev Fondunun yaranmasının 10 illiyinə həsr edilmiş möhtəşəm konsertdə çıxışı maraqla qarşılanıb.

Beynəlxalq müsabiqə və festivallarda Azərbaycanı uğurla təmsil edən, dəfələrlə müvəffəqiyyət qazanan, çoxlu sayda diplom və mükafatlar sahibi olan Atabəyin ən böyük uğurları hələ qabaqdadır.

Sifai SƏFƏROVA

Azərbaycan müəllimi.- 2014.- 6 iyun.- S.4.