III respublika müsabiqəsi

qaliblərinin yekun konserti

Azərbaycan Dövlət Filarmoniyasında uşaq və gənclər arasında xalq çalğı alətləri ifaçılarının III respublika müsabiqəsi qaliblərinin yekun konserti keçirilib. Konsertdə çıxış edən mədəniyyət və turizm nazirinin müavini Sevda Məmmədəliyeva və Üzeyir Hacıbəyli adına Bakı Musiqi Akademiyasının professoru, xalq artisti Ramiz Quliyev müsabiqənin əhəmiyyətindən söz açıblar. Bildirilib ki, Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin təşkilatçılığı ilə keçirilən müsabiqədə əsas məqsəd Azərbaycanda musiqi təhsilinin inkişaf etdirilməsi, xalq çalğı alətlərinin təbliği, gənc istedadların üzə çıxarılması, onların peşəkarlıq səviyyələrinin yüksəldilməsidir.

2 turdan ibarət olan müsabiqədə 6 ixtisas (tar, kamança, kanon, qarmon, balaban, saz) və 3 yaş qrupu (10-12 yaş, 13-15 yaş, 16-18 yaş) üzrə respublikada fəaliyyət göstərən uşaq musiqi və incəsənət məktəblərindən, musiqi kolleclərindən, Azərbaycan Milli Konservatoriyasından, Respublika İncəsənət Gimnaziyasından, Bülbül adına Orta İxtisas Musiqi Məktəbindən, Qafqaz Universitetindən şagird və tələbələr iştirak ediblər. Müsabiqənin əsasnaməsinə uyğun olaraq, birinci turda etüd, Azərbaycan və dünya bəstəkarlarının pyesləri, həmçinin saz və aşıq havaları, ikinci turda isə irihəcmli əsərlər, muğam, ənənəvi saz və aşıq havaları ifa olunub. Müsabiqə çərçivəsində müvafiq ixtisaslar üzrə ustad dərsləri də keçirilib. Birinci turda müvəffəqiyyətlə iştirak etmiş 150 şagird və tələbə ikinci turda iştirak etmək hüququ qazanıb. Müsabiqədə fərqlənənlər Mədəniyyət və Turizm Nazirliyinin I, II, III dərəcəli diplomlarına və laureat adına layiq görülüblər.

Sonda qaliblərin yekun konserti maraqla qarşılanıb.

Azərbaycan müəllimi.- 2014.- 20 iyun.- S.11.