Nümayəndə heyətimiz

Belarusdan qayıdıb

Bu ilin 6-14 iyun tarixlərində Azərbaycan Respublikası Təhsil Nazirliyinin nümayəndə heyəti Belarusun Minsk vilayətindəki Zubryonok Milli Uşaq Mərkəzində keçirilən "Sərhədsiz dostluq" X Beynəlxalq gənclər forumunda iştirak edib.

Forum MDB hökumət başçıları tərəfindən təsdiq olunmuş gənclər siyasəti istiqamətində 2020-ci ilədək Beynəlxalq Əməkdaşlıq Strategiyasının həyata keçirilməsi üzrə 2014-2015-ci illər üçün Fəaliyyət Planının icrası çərçivəsində reallaşdırılıb. Forumun açılış mərasimində rəmzi məşəli Belarus təhsil nazirinin müavini Viktor Yerjik və Azərbaycan məktəblisi Elgün Yusifov yandırıb. Tədbirdə Azərbaycan haqqında geniş təqdimatlar keçirilib, adət-ənənələrimizin təbliği məqsədilə milli rəqslərimiz nümayiş etdirilib, poeziya nümunələri söylənilib, iştirakçılara mədəniyyətimizi əks etdirən suvenirlər təqdim olunub. Forumun müxtəlif bölmələrində azərbaycanlı şagirdlər ölkəmizlə bağlı həqiqətləri həmyaşıdlarına çatdırıblar.

Forumun iştirakçıları Belarusun təhsil naziri Sergey Maskeviç ilə görüşüblər. Azərbaycan Respublikası Təhsil Nazirliyi adından Sergey Maskeviçə hədiyyələr təqdim olunub, ölkələrimizin təhsil əlaqələri barədə söhbət aparılıb. Foruma qatılan nümayəndələr həmçinin müvafiq mədəni-kütləvi tədbirlərə qatılıb, Belarusun tarixi abidələrini ziyarət ediblər.

Təhsil Nazirliyinin Tərbiyə və məktəbdənkənar müəssisələrlə iş şöbəsinin baş məsləhətçisi Elnur Əlizadə, "Təhsil" Respublika İdman Mərkəzinin direktor müavini Elvin Məmmədxanov, Bakı şəhəri 23 nömrəli tam orta məktəbin şagirdi Fidan Rəhimova, 160 nömrəli klassik gimnaziyanın şagirdi Əli Məmmədov və 1 nömrəli tam orta məktəbin şagirdi Elgün Yusifov artıq vətənə qayıdıb. Azərbaycanı təmsil edən nümayəndə heyəti forumla bağlı təəssüratlarını qəzetimizin oxucuları ilə bölüşüb:

Elnur ƏLİZADƏ,

Təhsil Nazirliyinin Tərbiyə və məktəbdənkənar

müəssisələrlə iş şöbəsinin baş məsləhətçisi

- Məktəblilərimizin belə bir forumda iştirak etməsi bizim üçün çox sevindirici oldu. Orada iştirak etmək üçün seçim turunda hər məktəbdən iki-üç namizəd göstərilməklə 20 məktəb müəyyən edildi. Namizəd göstərilən hər bir şagirdlə nazirlikdə təqribən 10-15 dəqiqə xüsusi söhbət aparıldı. Yekunda seçdiyimiz üç məktəblidən biri - 23 nömrəli tam orta məktəbin şagirdi Fidan Rəhimova oldu. Fidan həm də çox bacarıqlı rəssamdır. Dəfələrlə respublika və beynəlxalq səviyyəli müsabiqələrin qalibi olub. Hətta İngiltərə şahzadəsi Endryu Bakıya gələrkən Fidanın əl işlərinə heyran olub və Fidana xüsusi hədiyyə təqdim edib.

Elgün Yusifov 15 yaşına kimi Rusiyanın Nijni-Novqorod şəhərində yaşasa da, bir il əvvəl ailəliklə Bakıya gəlib. Hazırda 1 nömrəli tam orta məktəbdə oxuyur. Elgün çox vətənpərvər gəncdir. Fəxrlə qeyd etmək istərdim ki, milli kinomuza, teatrımıza Yusifovlar ailəsi xüsusilə bağlıdır. Elgün kompüter texnologiyaları üzrə, bu işin əsl mütəxəssislərindən də üstün səviyyədədir desəm, yanılmaram. O, həm də dərs əlaçısıdır, oxuduğu məktəbin fəxridir.

Əli Məmmədov 160 nömrəli klassik gimnaziyanın şagirdidir. Çox qabiliyyətli bir gənc olan Əli dəfələrlə Təhsil Nazirliyinin keçirdiyi "Təmiz şəhər" ekoloji layihənin qalibi olub, bir neçə ekoloji forumların diplomlarını alıb. Biz onu gələcəyin təcrübəli bir siyasətçisi kimi görürük.

Belarusda ilk gün bizim təqdimatımız oldu. Biz Bakı haqqında, ölkəmiz haqqında, mədəniyyətimiz haqqında xüsusi kliplərlə doqquza yaxın təqdimat hazırlamışdıq. Səhnədə olduğumuz iki saata yaxın müddətdə biz ölkəmiz haqqında elə bir təəssürat yarada bildik ki, forumda iştirak edənlərin hamısının diqqəti bizə yönəldi.

Forumda Azərbaycandan olan biz -5 nəfər nümayəndə də daxil olmaqla , 9 ölkədən (Latviya, Litva, Rusiya, Qazaxıstan, Qırğızıstan, Azərbaycan, Tacikistan, Moldova və Belarus) cəmi 54 nəfər iştirak edirdi. Rusiyadan iki nümayəndə heyəti gəlmişdi. Biri Sankt-Peterburq, digəri isə Yoşkar-Ola şəhərindən idi. Forumda iştirak etdiyimiz 11 gündə bizdən başqa qalan 49 nəfər iştirakçının hər birinin dilindən eşitdik ki, kaş bircə yol Bakını görə bilək.

Biz forum iştirakçılarına Azərbaycanı o qədər sevdirə bildik ki, onlar ölkəmizi əfsanəvi bir ölkə kimi təsəvvür etdilər. Forumun sonuncu günü bütün ölkələrin nümayəndələri öz ləhcələrinə uyğun Azərbaycan kəlməsini bizə baxıb xüsusi bir məhəbbətlə söyləyirdi. Bizim müsbət enerjimiz sanki bütün iştirakçılara keçmişdi. Yeganə ölkə idik ki, bütün iştirakçıların hər birinə ölkəmizlə bağlı suvenirlər təqdim etdik.

Əli MƏMMƏDOV,

Bakı şəhər 160 nömrəli klassik

gimnaziyanın 11-ci sinif şagirdi

- Forumda müxtəlif ölkələrdən gələn gənclər toplanmışdı. Sözsüz ki, bizim məqsədimiz də Azərbaycan gənclərini layiqincə təmsil etməkdən ibarət idi və biz Azərbaycan nümayəndələri respublikamızın gənclərinə, ölkəmizin inkişafına, onun qədim tarixinə, mədəniyyətinə dair geniş təqdimatlar hazırlamışdıq. Milli geyimlərimizdə etdiyimiz təqdimatlar böyük rəğbətlə qarşılanırdı. Forum iştirakçıları ölkəmizin belə yüksək səviyyədə inkişafını gördükdə heyran qalırdılar. Təqdimat zamanı başqa dövlətlərin gənc nümayəndələri bizə çoxlu suallar verirdilər ki, bu da onların bizim ölkəmizə olan marağının bir növ göstəricisi idi.

Təqdimatdan sonra forum iştirakçılarına hədiyyələr, Azərbaycan haqqında kitablar, broşurlar bağışladıq. Həmçinin Azərbaycan milli mətbəxinin incisi olan şəkərburaları, paxlavaları masalarda yerləşdirdik. Hər bir iştirakçının bizim milli təamlardan daddıqdan sonra məmnuniyyətlə "çox dadlıdır"- deyərək bizə təşəkkür etməsi də bizi fərəhləndirdi.

Belarusun təhsil naziri Maskeviç Sergey Aleksandroviçə bizim ölkəmiz haqqında kitab təqdim etdim. Forumda bizə, ölkəmizə olan beynəlxalq marağı gördüm və özümü orada daha da məsuliyyətli bir insan kimi hiss etdim. Bir daha qürur duydum ki, mən özümü yox, Azərbaycanı təmsil edirəm.

Mən öz adımdan və forumda iştirak edən digər nümayəndələrimizin adından bizim üçün bu imkanı yaratdığına görə, bu işdə bizə dəstək olan, Təhsil Nazirliyinə, onun əməkdaşlarına, məktəbimizin direktoru Faina xanım Ələkbərovaya xüsisi təşəkkürümü bildirirəm.

Elgün YUSİFOV,

Bakıdakı 1 nömrəli tam orta

məktəbin 11-ci sinif şagirdi

- Mən forumdan çox xoş təəssüratlarla qayıtmışam. Biz orada "Sərhədsiz dostlar" beynəlxalq forumunda respublikamızı təmsil etdik. Bu forum biz gənclərə gələcək inkişafımız üçün çox şey öyrətdi. Mən orada Belarusun təhsil nazirinə özümü maraqlandıran bir sual verdim. Soruşdum ki, Belarusda iki rəsmi dil var: Belarus və rus dili. Məni maraqlandıran odur ki, Belarus məktəblərində hansı dilin tədrisi üstünlük təşkil edir?

Təhsil naziri mənə təəssüflə cavab verdi ki, məktəblərdə Belarus dilinin tədrisi 25 faiz, rus dilinin tədrisi isə 75 faiz təşkil edir.

Forumda bizdən başqa qalan 8 iştirakçı dövlətin hər birinə Azərbaycanı layiqincə tanıda, sevdirə bildik. Bizə ən yaxın Qazaxıstan və Qırğızıstan nümayəndələri oldu. Onlarla biz bir-birimizə qardaş kimi baxırdıq. Dillərimiz və adətlərimiz bir-birinə çox uyğunlaşdığından elə ilk gündən başlayaraq bir yerdə gəzirdik. Biz üç respublikanın nümayəndələri hərəmiz öz dilimizdə danışanda bir-birimizi sərbəst başa düşürdük.

İnşallah, orta məktəbi bitirdikdən sonra "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində İngiltərəyə gedib neft-kimya üzrə təhsil almaq, daha sonra vətənimə qayıdıb onun daha da inkişaf etməsinə kömək etmək arzusundayam.

Fidan RƏHİMOVA,

Bakıdakı 23 nömrəli tam

orta məktəbin 11-ci sinif şagirdi

Foruma gedəndə ilk günlər həyəcanlı idim. Sonra təzə-təzə dostlar tapdım. Biz öz təqdimatlarımızda Bakı haqqında, Azərbaycan mədəniyyəti haqqında danışdıq. Orada hazırladığımız divar qəzetinə şəkilləri mən çəkirdim.

İlk iki gündə nümayəndələrimizə münasibətdən belə başa düşdüm ki, forum iştirakçıları respublikamızın bu qədər inkişaf etdiyini qəbul etməyə heç də hazır deyillər. Ancaq təqdimatlarımızdan sonra digər iştirakçı dövlətlərdən olan uşaqlar bizə yaxınlaşıb çoxlu suallar verməyə başladılar. Onların hamısı Azərbaycana qonaq gəlməyə can atırdı. Biz öz təqdimatlarımızla bütün forum iştirakçılarının diqqətini Azərbaycana yönəldə bildik.

Zubryonoka gedərkən Azərbaycanla bağlı çəkdiyim iki əl işimi də özümlə götürmüşdüm. Bizim nümayəndə heyətimizin adından həmin iki əsərimi Zubryonokun rəhbərinə və Belarusun təhsil nazirinə təqdim etdik.

Azərbaycana ürəkdolusu sevinclə qayıtmışam.

Orta məktəbi bitirdikdən sonra Bakıda ali təhsil almaq, arxitektor sənətinə yiyələnmək istəyirəm. Arzum budur ki, gələcəkdə Azərbaycanda arxitektoru özüm olacağım çox möhtəşəm bir kitabxana binası inşa edilsin.

Ellada UMUDLU

Azərbaycan müəllimi.- 2014.- 20 iyun.- S.5.