Yeniyetmə şahmatçılarımız dünya

çempionatında 10 medal qazanıblar

13-27 iyun tarixlərində Yunanıstanın Kavala şəhərində məktəblilər arasında şahmatın rapid və blits növü üzrə dünya, klassik şahmat üzrə isə Avropa çempionatları keçirilir.

Komandanın rəhbəri beynəlxalq dərəcəli hakim, Azərbaycan Şahmat Federasiyasının baş katibi İbrahim Məmmədovdan aldığımız məlumata görə, çempionatda Avropanın 28 ölkəsindən 400-dən artıq gənc və yeniyetmə şahmatçı mübarizə aparır.

14-16 iyunda rapid üzrə keçirilən dünya çempionatında Azərbaycan yığma komandası 6 yaş qrupu üzrə oğlan və qızlardan ibarət 28 şahmatçı ilə təmsil olunub. Onlar bu yarışda 3 qızıl, 4 gümüş və 3 bürünc olmaqla 10 medal qazanıblar.

İsveçrə sistemi üzrə keçirilən çempionat 9 turdan ibarət olub. Respublika İxtisaslaşdırılmış Olimpiya Ehtiyatları Uşaq-Gənclər Şahmat Məktəbinin yetirmələrindən Aytən Əmrayeva 16-17 yaş qrupunda I yeri, Nərmin Məmmədova 13-15 yaş qrupunda II, Xanım Balacayeva isə 12-13 yaş qrupunda II yeri tutmuşlar. Bakı şəhəri 2 nömrəli Uşaq-Gənclər Şahmat Məktəbinin yetirmələrindən Kənan Qarayev 12-13 yaş qrupunda I, Vüqar Əsədli II, Əhməd Əhmədzadə 10-11 yaş qrupunda II yerə, Rüstəm Bünyadov 14-15 yaş qrupunda, Nurtac Heydərli isə 6-7 yaş qrupunda III yerə çıxıb.

Mingəçevir şəhər Uşaq-Gənclər Şahmat Məktəbinin yetirməsi Aysel Səlimova 7 yaşadək qrupda I, Bakı şəhəri 3 nömrəli Uşaq-Gənclər Şahmat Məktəbinin yetirməsi Mətin Salamov 8-9 yaş qrupunda II yeri adlarına yazdırıblar.

Rəşad RAMAZANOĞLU

Azərbaycan müəllimi.- 2014.- 26 iyun.- S.3.