AMİ-nin Mingəçevir filialında

"Açıq qapı - valideyn günü" keçirildi

Ümummilli lider Heydər Əliyevin "Azərbaycan Respublikasında təhsil sisteminin təkmilləşdirilməsi haqqında" 13 iyun 2000-ci il tarixli 349 nömrəli Fərmanına əsasən fəaliyyətə başlayan Azərbaycan Müəllimlər İnstitutu Mingəçevir filialının yaradılmasından 14 il ötür. Qısa müddət keçməsinə baxmayaraq, bu təhsil ocağı inkişaf edən Azərbaycanın təhsil sistemində özünəməxsus yer tutaraq regionda elm, təhsil və mədəniyyət mərkəzi rolunu oynayır. Fəaliyyət istiqamətində ilkin pedaqoji kadr hazırlığını və diplomdansonrakı təhsil pillələrini (təkmilləşdirmə, ixtisasartırma və yenidənhazırlanma) özündə birləşdirən AMİ-nin Mingəçevir filialında təhsil səviyyəsinin yüksəldilməsində konkret tədbirlər həyata keçirilir, maddi-texniki bazanın gücləndirilməsində müvafiq işlər görülür.

Azərbaycanın təhsil sisteminin dünya təhsil sisteminə inteqrasiya etməsi, ali təhsilin Boloniya prosesinə uyğun olaraq kredit sistemi ilə təşkili hər bir ali məktəb qarşısında müəyyən tələblər qoyur və yeni yanaşma tələb edir. Artıq 7 ildir ki, filialda tələbələr kredit sistemi əsasında təhsil alırlar. Ümumilikdə filialda 5 ixtisas üzrə 620 nəfər tələbə təhsil alır. Onlardan 541 nəfəri əyani şöbədə, 79 nəfəri isə qiyabi şöbədə.

Hazırda ölkəmizin bütün ali və orta ixtisas təhsili müəssisələrində yay imtahan sessiyasının qızğın çağıdır. İmtahan sessiyası hər bir ali məktəbin tədris vəziyyətinin və onun fəaliyyətinin keyfiyyət göstəricisidir. İmtahanların şəffaf və obyektiv keçirilməsi ali məktəb qarşısında qoyulan ən mühüm tələblərdən biridir. Hörmətli təhsil naziri cənab Mikayıl Cabbarovun 8 may 2014-cü il tarixli 558 nömrəli əmrinə əsasən, 2013/2014-cü tədris ilinin yay semestrinin təşkili və keçirilməsi üçün bütün ali məktəblərdə imtahan qərargahı yaradılmışdır. İmtahan qərargahının yaradılmasında əsas məqsəd imtahan sessiyasını mövcud qaydalara uyğun təşkil etmək, tələbələrin biliyinin qiymətləndirilməsində şəffaflığı və obyektivliyi təmin etməkdən ibarətdir. Təhsil nazirinin müvafiq əmrindən irəli gələn vəzifələrin yerinə yetirilməsi məqsədilə AMİ-nin Mingəçevir filialında da imtahan qərargahı yaradılmışdır. Eləcə də Azərbaycan Müəllimlər İnstitutunun rəhbərliyinin əmrinə əsasən imtahan sessiyasının təşkili və gedişi ilə tanış olmaq üçün valideynlərə lazımi şərait yaradılmışdır.

24 iyun 2014-cü il tarixində filialda "Açıq qapı - valideyn günü" keçirilmişdir. İmtahanların gedişini izləmək üçün valideynlər, mətbuat və ictimaiyyət nümayəndələri filiala dəvət olunmuşdular. Qonaqlar imtahanları başlanandan sona kimi müşahidə etmişlər. İmtahan auditoriyalarında olan qonaqlar tələbələrin imtahanları necə yazılı cavab vermələrinin canlı şahidi olmuşlar. Təhsil alan tələbələrin əsasən Mingəçevir şəhərini əhatə edən regionda yaşaması (620 tələbədən 400-dən çoxu Mingəçevir, Yevlax, Bərdə, Ağdaş, Göyçay, Ağdam, Tərtər, Oğuz, Ucar ) çoxlu sayda valideynin tədbirdə iştirak etməsinə imkan vermişdir.

Valideynlərin dediklərindən:

Bayram Yusifov -"Riyaziyyat və informatika müəllimliyi" ixtisası üzrə IV kurs tələbəsi Səbirə Yusifovanın valideyni:

- Ulu öndər Heydər Əliyevin regionda təhsilin inkişafı məqsədilə yaratdığı bu ali məktəb ocağı möhtərəm Prezidentimiz cənab İlham Əliyevin regionlara göstərdiyi qayğının sayəsində ildən-ilə inkişaf edir. Hər il maddi-texniki bazanın güclənməsini hiss edirik. Övladlarımızın oxuması üçün hər cür şərait var. Bu, biz valideynləri çox sevindirir və bunun üçün cənab Prezidentimizə təşəkkür edirik.

Elçin Əliyev - "Azərbaycan dili və ədəbiyyatı müəllimliyi" ixtisası üzrə II kurs tələbəsi Jalə Əliyevanın valideyni:

- Biz, tələbələrin biletləri çəkmələrindən tutmuş cavab vərəqələrinin kodlaşmasını, hətta müəllimlərin imtahan cavablarını yoxlamalarını da müşahidə etdik. Hər bir şey gözümüzün qarşısında icra olunur. Şəffaf və obyektiv. Burada tələbələrin oxuması üçün hər cür şərait yaradılıb. Bir valideyn kimi mən cənab təhsil naziri Mikayıl Cabbarova minnətdarlıq etmək istəyirəm. Çünki onun təhsil sisteminə gətirdiyi bir çox yeniliklərlə yanaşı, ən mühüm töhfələrdən biri demokratik ab-havadır.

Nəriman Abbasov - "Riyaziyyat və informatika müəllimliyi" ixtisası üzrə II kurs tələbəsi Şirinnaz Abbasovanın valideyni:

- Mən şəxsən imtahanların obyektiv və şəffaf keçirilməsinin təkcə indi deyil, qış imtahan sessiyasında da şahidi olmuşam. Qızımın həmin imtahan sessiyasından kredit borcu olsa da, mənim heç bir narazılığım yoxdur. Çünki burada hər şey tələbələrin biliyinin obyektiv qiymətləndirilməsinə yönəlib. Tələbələrdən ancaq bir şey tələb olunur - oxumaq.

Tələbələr imtahanın gedişindən razı görünürdülər.

Ç.Məmmədov - "İbtidai sinif müəllimliyi" ixtisası üzrə III kurs tələbəsi:

- İmtahanların gedişindən razıyıq. Tələbələr biliklərinin obyektiv qiymətləndirildiyini gördükdə növbəti imtahana daha həvəslə hazırlaşırlar. Həyatımızın hər yerində olduğu kimi, təhsildə də demokratik mühitin günü-gündən güclənməsini hiss edirik.

İmtahandan aldığı qiymətlə razılaşmayan tələbələr filial üzrə yaradılmış münaqişə komissiyasına, həmçinin imtahan gərargahına müraciət edirlər.

İlham Səlimov - Münaqişə komissiyasının sədri, fizika-riyaziyyat üzrə fəlsəfə doktoru:

- Artıq imtahan sessiyasının yarısı geridə qalıb. Ötən illərlə müqayisədə komissiyaya müraciət edən tələbələrin sayı azdır. Bunun bir neçə səbəbi var. Birincisi, tələbələrin imtahan cavablarının obyektiv yoxlanmasına heç bir şübhə yeri yoxdur. İkincisi, tələbələrimizin imtahan nəticələri yüksəkdir. Hər iki səbəb münaqişəli vəziyyətin bu gün olmadığını şərtləndirir. Müraciət edənlərin imtahan cavabları fənn müəllimi və digər bir mütəxəssis tərəfindən yenidən yoxlanılır və komissiyanın ümumi rəyi əsasında ya qiymət olduğu kimi saxlanılır, ya da yenidən qiymətləndirilir.

Həyata keçirilən bütün tədbirlərin mərkəzində bir məqsəd dayanır - şəffaflıq və obyektivlik. Bunu isə öz layiqli və obyektiv qiymətini alan tələbələrin çöhrəsində görmək bir o qədər çətin deyildir.

Rahilə MƏMMƏDOVA,

AMİ-nin Mingəçevir filialının Azərbaycan dili

və ədəbiyyatın tədrisi kafedrasının müdiri,

filologiya üzrə fəlsəfə doktoru

Azərbaycan müəllimi.- 2014.- 26 iyun.- S.6.