Təhsil Problemləri İnstitutunun yeni nəşri

Təhsil Problemləri İnstitutunun bu günlərdə hazırladığı "Müasir təhsilin aktual sosial-psixoloji problemləri" adlı monoqrafiyası oxucuların ixtiyarına verilib.

Respublikamızda baş verən dəyişikliklər, qloballaşma, inkişaf etmiş dünya dövlətlərinə inteqrasiya, cəmiyyətin həyatının humanistləşdirilmə və demokratikləşdirilməsi, azad bazar iqtisadiyyatının tələblərindən irəli gələn yeni düşüncəli, rəqabətəqabil, çevik təfəkkürə malik, risk etməyi bacaran şəxsiyyətlərin formalaşdırılmasını tələb edir. Eyni zamanda "milli-mənəvi və ümumbəşəri dəyərləri qoruyan və inkişaf etdirən" kadrların hazırlanması təhsil sisteminin qarşısında duran mühüm vəzifələrdəndir.

Qloballaşma, Qərbə inteqrasiya kursu nə qədər zəruridirsə, ondan qaçmaq, təcrid olunmaq nə qədər qorxuludursa, milli mənliyini, mədəniyyətini unutmaq da o qədər təhlükəlidir. Kitabda qloballaşmanın gətirdiyi pozitiv və neqativ təsirlər, onun sosial-siyasi mahiyyəti, gənclərin sosial mühitdə adaptasiyası və s. problemlərdən bəhs olunur.

Kitabda həmçinin koqnitiv fəaliyyət problemləri öz əksini tapmışdır. Azərbaycan təhsil sistemində yeni təfəkkür tərzinin daşıyıcıları olan şəxsiyyətlərin formalaşdırılması, təhsilin şəxsiyyətyönümlü olması prioritet məsələ kimi götürülür. Başlıca məsələlərdən biri də "hafizə məktəbindən" "təfəkkür məktəbinə" keçidlə bağlıdır. Kitabda bu yöndə araşdırmaların nəzəri və praktik məsələlərinə geniş yer verilir.

Kitabın digər bir istiqaməti konkret təlim-tərbiyə məsələləri ilə bağlıdır. Burada şəxsiyyətin formalaşmasında qarşılıqlı münasibətlərin rolu, ailədə məktəbəqədər yaşlı uşaqlarda gigiyenik vərdişlərin yaranması, ailədaxili münasibətlərin psixi inkişafa təsiri məsələləri də öz əksini tapmışdır. Kiçik məktəb yaş dövrü sosiallaşma, təlim müvəffəqiyyəti və şəxsiyyətin formalaşması baxımından mühüm mərhələdir. Kitabda I sinif şagirdlərinin kollektivə adaptasiyası, təhsilin humanistləşdirilməsi, ünsiyyət problemləri geniş şəkildə təqdim olunur.

Kitab praktik psixoloqlar, tələbələr, təhsil işçiləri, eləcə də psixologiya ilə maraqlanan ayrı-ayrı şəxslər üçün nəzərdə tutulmuşdur.

Almaz HƏSRƏT,

TPİ-nin Beynəlxalq əməkdaşlıq

və informasiya şöbəsinin müdiri

Azərbaycan müəllimi.- 2014.- 14 noyabr.- S.8.