Bakıda təhsil almaq

arzusu gerçək olub

Eldəniz Ələkbərzadə 1996-cı ildə Bakıda anadan olub. 1999-cu ildə ailəliklə Sankt-Peterburq şəhərinə köçüblər. Valideynləri uşaqlıqdan musiqiyə olan həvəsini görüb, onu 2004-cü ildə Sankt-Peterburq şəhərindəki Andreyev adına musiqi məktəbinin fortepiano sinfinə qoyublar. Burada təhsil aldığı müddətdə məktəbdaxili və şəhər üzrə müxtəlif tədbirlərdə, konsertlərdə solo proqramlarla çıxış edib. Dəfələrlə mükafatlara, diplomlara layiq görülüb. 2009-cu ildə Sankt-Peterburq şəhərində keçirilən "Rojdestvenskiye assamblei" adlı beynəlxalq müsabiqədə iştirak edərək II yeri tutub. 2011-ci ildə həmin musiqi məktəbini qırmızı diplomla bitirib. Həmin ildə Sankt-Peterburq Konservatoriyası nəzdində M.P.Musorqski adına Musiqi Kollecinə qəbul olub. 2011-ci ildə "Peterburqskaya vesna" adlı müsabiqədə iştirak edərək I yerə layiq görülüb.

Bakıda təhsil almaq, doğma vətənini möhtəşəm səhnələrdə təmsil etmək uşaqlıqdan onun ən böyük arzusu olub. Bakı Musiqi Akademiyasının rektoru, professor Fərhad Bədəlbəylinin və Azərbaycan Milli Konservatoriyasının rektoru, xalq artisti Siyavuş Kəriminin köməyi ilə, təhsil nazirinin 16.01. 2013-cü il tarixli məktubu əsasında o, M.P. Musorqski adına Musiqi Kollecindən fortepiano ixtisası üzrə Azərbaycan Milli Konservatoriyası tərkibində Musiqi Kollecinə köçürülüb.

Kollecdə təhsil aldığı müddətdə də Eldəniz müxtəlif tədbirlərdə iştirak edib. Belə ki, 18-19 dekabr 2013-cü il tarixlərində görkəmli pedaqoq, pianoçu və ictimai xadim H.Neyqauzun anadan olmasının 125 illik yubileyinə həsr olunmuş gənc pianoçuların ümumşəhər festivalında istedad və məharətini nümayiş etdirərək diplomla təltif olunub. 24-26 aprel 2014-cü il tarixlərində İSESCO-nun və Gənclər və İdman Nazirliyinin dəstəyi ilə keçirilən İslam Dünyası Gənclərinin klassik musiqi ifaçılarının III Beynəlxalq festival müsabiqəsində III yerə layiq görülərək laureat adını qazanıb.

Hazırda o, təhsilini Azərbaycan Milli Konservatoriyası tərkibində Musiqi Kollecinin III kursunda qabaqcıl təhsil işçisi Azadə Bədəlbəylinin sinfində davam etdirir.

Sifai Səfərova

Azərbaycan müəllimi.- 2014.- 28 noyabr.- S.10.