"Millət vəkili olmaq istəyirəm"

Bakıdakı 132-134 nömrəli təhsil kompleksinin

X sinif şagirdi Nərmin Heydərova ilə söhbət

22 yanvar 1999-cu ildə Bakı şəhərində anadan olub. Atası iqtisadçı, anası rus dili müəllimidir. 2005-2006-cı illərdə Bakıdakı F. Rzayev adına 150 nömrəli tam orta məktəbdə təhsil alıb. 3-cü sinifdən təhsilini 132-134 nömrəli təhsil kompleksində davam etdirməyə başlayıb. Hazırda həmin məktəbin 10 "b" sinfində oxuyur, sinif nümayəndəsidir. Kiçik yaşlarından incəsənətin bir çox sahələri ilə də maraqlanır. Fortepiano sahəsində uğurları da olub. Özünün dediyinə görə indi müxtəlif mövzularda şəkillər çəkməyi xoşlayır. Ailədə özündən başqa bir qardaşı var ki, o da Azərbaycan Turizm İnstitutunun tələbəsidir.

Nərminlə tanışlığımızın müddəti əslində o qədər də çox deyil. Onunla ilk ünsiyyətimiz bu yaxınlarda şagirdlərin mütaliəsi ilə bağlı apardığımız araşdırma zamanı olub. Nərmin suallarımıza məntiqli, eyni zamanda özünəməxsus cavabları, ən əsası pozitivliyi ilə bizdə özünə qarşı diqqət və maraq oyatmışdı. Dərs əlaçısı və sinif nümayəndəsi olan bu gənc qızla daha yaxından tanış olmaq, şagird kimi keçirdiyi təhsil həyatının əsas məqamları, maraq dünyası ilə bağlı onunla söhbətimiz, düşünürük ki, oxucularımız üçün də maraqlı olar.

"Səhərimi idmanla açıram"

- Günümü planlaşdırmağı mənə kiçik yaşlarımdan anam öyrədib, buna görə ona minnətdaram. Düşünürəm ki, hər bir şagird gününü nə qədər uğurlu planlaşdırarsa, bir o qədər də dərslərində nailiyyətlər əldə edər. Mən də günümü özüm üçün belə planlaşdırmışam: Səhərimi idmanla açır, səhər yeməyindən sonra məktəbə gedirəm. Şanslıyam ona görə ki, məktəblə yaşadığım ev arasındakı məsafə çox qısadır və bu da mənə məktəbə vaxtında və rahat şəkildə gəlib çatmağa imkan verir. Məktəbdə olduğum bir neçə saatı səmərəli keçirməyə çalışıram. Sinifdə müəllimlərimizlə keçilən dərslərin mövzusuna uyğun maraqlı debatlar təşkil edirik, yoldaşlarımla birlikdə müzakirələr aparırıq. Dərs prosesində "sakit bir şagird" obrazında olmağı xoşlamıram, əksinə, öyrəndiklərimi və bildiklərimi nümayiş etdirməyə can atıram, müəllimlərimlə fikirlərimi paylaşıram. Dərslərim bitdikdən sonra evə gəlib bir qədər dincəlirəm. Sonra seçdiyim ixtisas qrupu üzrə əlavə hazırlığa gedirəm. Axşam isə məktəbdə müəllimlərimiz tərəfindən verilən ev tapşırıqlarını yerinə yetirməyə başlayıram. Mənim üçün ən vacib məhz dərslərimə yüksək səviyyədə hazırlaşmaqdır. Çalışıram ki, hər zaman dərslərimə hazırlıqlı olum, müəllimlərimin mənə olan etimadını doğruldum. Bilirsiniz, istər məktəbdəki dərslərə hazırlıq, istərsə də ali məktəbə qəbulla bağlı əlavə hazırlıq mənim son nəticədə mükəmməl təhsil almağıma şərait yaradır. Həftənin demək olar ki, 5 gününü bu rejimə uyğun qururam. Dərs günləri ərzində əsasən günüm monoton olaraq təkrarlanır.

Bütün fənləri sevirəm və dərslərimə fərq qoymadan eyni səviyyədə hazırlaşır və bundan zövq alıram. Bunun üçün ilk növbədə müəllimlərimə minnətdaram ki, onlar mənə tədris etdikləri fənlərə qarşı maraq yaradıblar. Ən çox sevdiyim fənlər riyaziyyat və ingilis dilidir.

İnsan məqsədinə çatmaq üçün mütləq əziyyət çəkməlidir. Mənim də hədəflərim var. Məktəbi qızıl medalla bitirərək ali məktəblərə qəbul imtahanlarında maksimum nəticə - 700 bal toplayıb arzuladığım "ADA" Universitetinin beynəlxalq münasibətlər fakültəsinə daxil olmaq istəyirəm.

Təkcə dərsə hazırlıqlı olmağımla kifayətlənmir, bununla işimi bitmiş hesab etmirəm. Məktəbin ictimai işlərində də fəal olmağa çalışıram. Mütəmadi olaraq mütaliə ilə məşğul olduğumdan deyilənə görə gözəl diksiyaya, nitqə malikəm. Bir çox tədbirlərdə çıxıslarım olub. Artıq neçə illərdir bilik və bacarığımı məktəblilərin fənn olimpiadasında sınayıram. Riyaziyyat, Azərbaycan dili və ədəbiyyat, ingilis dili fənləri üzrə I, II, III yerləri tutmuşam. Bu ilin 3 may tarixində ümummilli lider Heydər Əliyevin anadan olmasının 91-ci ildönümü münasibəti ilə Heydər Əliyev adına Müasir Təhsil Kompleksində keçirilən VII İntellekt Olimpiadasında I yerə layiq görülmüşəm. Daha sonra Bakı Slavyan Universitetində təşkil olunan konfransda "Heydər Əliyev və müasir tariximiz" mövzusunda elmi tezislərlə çıxış etmişəm.

"Musiqiyə qulaq asarkən özümü

tamamilə dincəlmiş hiss edirəm"

- Ailəmizdə valideynlərimin müxtəlif sahələrlə maraqlanmaları mənim də hər zaman diqqətimi çəkib. Məsələn, atamın fortepianoda gözəl ifa etməsi məndə də həmin alətdə çalmağa maraq yaradıb və məhz bundan sonra musiqiyə çox vaxt ayırmağa başladım. Bu gün mən musiqisiz yaşaya bilmərəm. Çünki musiqiyə qulaq asarkən özümü tamamilə dincəlmiş hiss edirəm.

Dil öyrənməyə marağım isə anamdan keçib. İxtisasca rus dili müəllimi olması mənim bu dili mükəmməl bilməyim üçün təkan olub. Bundan başqa ingilis, fransız, ərəb dillərini bilirəm. Hazırda qardaşımdan ispan dilini öyrənməyə çalışıram.

Təsviri incəsənətə marağım isə tamamilə öz içimdən gəlir. Rəsmlə kiçik yaşlarımdan məşğul oluram. Bir çox sərgilərdə iştirak edərək müvəffəqiyyət qazanmışam. Mənim üçün bunlardan ən yaddaqalanı 2011-ci ildə Çexiyada keçirilən sərgidə nümayiş etdirdiyim rəsm əsəri idi. Təqdim etdiyim rəsm əsərində Azərbaycanın milli ornamentlərindən biri olan butadan istifadə edərək qədim musiqi alətlərimizin və tarixi abidələrimizin təsvirini vermişdim. Həmin əsər o zaman III yerə layiq görüldü.

"Kinoteatra getməyi sevirəm"

- Dünyagörüşümü artırmaq və öz həyatımı yaşamaqdan da geri qalmamaq üçün isə həftəsonunu tamamilə özümə ayırır, əsasən kinoteatra getməyi sevirəm. Sevdiyim janrda və ya xoşladığım aktyor, aktrisaların filmlərini böyük həvəslə izləyirəm. Hər bir gənc kimi mən də alış-veriş etməyi sevirəm və dəbdən geri qalmamağa çalışıram.

Atamla axşamlar Dənizkənarı Milli Parka gəzməyə çıxırıq. Anamla isə tamam fərqli münasibətdəyik, sanki rəfiqəyik. Demək olar ki, hər anımı onunla keçirirəm. O mənim idealımdır, ilham qaynağımdır.

Özümə dayaq və nümunə kimi yaşca məndən böyük qardaşımı görürəm. Onunla maraqlarımız demək olar ki, eynidir: birlikdə futbola gedərək oyunları izləyirik.

"Bu arzu məndə tam məqsədə çevrilib"

- Gələcəkdə millət vəkili olmaq üçün namizədliyimi irəli sürəcəyəm.

Bu fikirə ilk gəldiyim günü indiyə kimi xatırlayıram. 3-cü sinifdə oxuyurdum, qış ayları idi. Televizorda ümummilli lider Heydər Əliyevin millət vəkilləri ilə görüşünü seyr edirdim. Həmin görüşdə qadın millət vəkillərimizin azad söz haqqının olması ilə bağlı öz fikirlərini tamamilə sərbəst şəkildə bildirmələri, ulu öndərin onları diqqətlə dinləməsi mənim marağıma səbəb oldu. Bir anlıq özümü onların arasında hiss etdim və dedim, məhz bura mənim yerimdir - Milli Məclis! Bəlkə də bu çoxlarına qəribə gələ bilər. Həmin yaşda olan uşaqlar adətən həkim, polis və ya müəllim olmaq istəyir. Mən isə tam fərqli olaraq deputat olmaq istəyimi dilə gətirdim. O gündən artıq illər keçib, lakin mən uşaqlıq arzumdan vaz keçməmişəm. Zamanla bu arzu məndə tam məqsədə çevrilib.

Mənim üçün hələlik əlçatmaz olan istəyimin gələcəkdə reallaşacağına ümidvaram.

Samirə KƏRİMOVA

Azərbaycan müəllimi.- 2014.- 10 oktyabr.- S.4.