Beynəlxalq musiqi festivallarının qalibi

Yusif Nadir oğlu Yusifov 24 may 1997-ci ildə Bakı şəhərində anadan olub. 2007-ci ildə 24 nömrəli Uşaq Musiqi Məktəbinə klarnet ixtisası üzrə birinci sinfə qəbul olunub. İlk gündən qeyri-adi istedadı ilə fərqlənib. O, təcrübəli müəllim Vaqif Məmmədovun rəhbərliyi ilə öz səyi və musiqi istedadı sayəsində yüksək nəticələrə nail olub, rayon, şəhər və respublika səviyyəli tədbir və beynəlxalq müsabiqələrdə uğurla çıxış edib.

İlk uğuruna 2008-ci ildə ulu öndər Heydər Əliyevin anadan olmasının 85-ci ildönümünə həsr olunmuş musiqi müsabiqəsində imza atıb. Gənc yeniyetmə 2011-ci ildə Azərbaycan Respublikasının dövlət müstəqilliyinin 20 illiyinə həsr olunan uşaq musiqi və incəsənət məktəbləri şagirdlərinin nəfəsli və zərb alətləri üzrə II Respublika müsabiqəsində yüksək səviyyədə çıxış etdiyinə görə I dərəcəli diploma layiq görülüb və müsabiqənin laureatı adını qazanıb. Həmin il Rusiyanın Samara şəhərində MDB ölkələrinin Uşaq Musiqi Akademiyasında Yusif yüksək göstəricilər nümayiş etdirdiyinə görə akademiyanın diplomu və qiymətli hədiyyələrlə mükafatlandırılıb. TÜRKSOY Beynəlxalq Türk Mədəniyyəti Təşkilatının dəstəyi ilə 2012-ci ildə Türkiyənin Konya, Nigde və Kayseri şəhərlərində Türkiyə Uşaq Simfonik Orkestrinin keçirdiyi konsertlərdə yeniyetmə ifaçı da iştirak edib. Həmin il Yusif İslam Dünyası Gənclərinin (20 yaşadək) Bakıda keçirilən klassik musiqi ifaçılarının 1-ci Beynəlxalq festival-müsabiqəsinin laureatı olub (II yer). O, 2013-cü ildə Azərbaycan Respublikası Təhsil Nazirliyi Bülbül adına Orta İxtisas Musiqi Məktəbinin təşkilatçılığı ilə keçirilən nəfəs və zərb alətləri ifaçılarının ümumşəhər festivalının da laureatı olub.

Çoxlu sayda diplomlar sahibi olan Yusif Yusifovun adı Azərbaycan Respublikasının Prezidenti İlham Əliyev cənablarının müvafiq sərəncamı ilə 2012-ci ildə Azərbaycanın gənc istedadlarının "Qızıl kitabı"na yazılıb və o, xüsusi aylıq təqaüdə layiq görülüb.

Hazırda Y.Yusifov Bakıdakı 136 nömrəli tam orta məktəbin 11-ci sinfində təhsil alır və bundan sonra da ölkəmizi beynəlxalq musiqi festivallarında təmsil edəcəyini söyləyir.

Azərbaycan müəllimi.- 2014.- 31 oktyabr.- S.6.