Beynəlxalq olimpiada və müsabiqələrin

qızıl, gümüş mükafatçısı

İsveçrənin Lozanna Federal Texnologiya Məktəbində magistr təhsili alan İlqar Ramazanlı ilə söhbət

İlqar Ramazanlı 1992-ci ildə Bakı şəhərində anadan olub. 2009-cu ildə Bakı Özəl Türk Liseyini bitirib. Bakalavr təhsilini Türkiyənin Ankara şəhərində - Orta Doğu Texnik Universitetinin kompüter mühəndisliyi və riyaziyyat fakültələrində alıb. 2009-cu ildə Almaniyada keçirilən Beynəlxalq Riyaziyyat Olimpiadasında bürünc, 2009-cu ilin mayında Serbiyada keçirilən Balkan Riyaziyyat Olimpiadasında gümüş, 2009-cu ilin yanvarında Qazaxıstanda Beynəlxalq Jautıkov Olimpiadasında qızıl, 2012-ci ildə Bolqarıstanda tələbələr arasında keçirilən Beynəlxalq Riyaziyyat Müsabiqəsində qızıl medala layiq görülüb. Bundan başqa, 2011-2012 -ci illərdə Rumıniya, Ukrayna, İspaniyada tələbələr arasında beynəlxalq proqramlaşdırma müsabiqələrində də fərqlənib. Hazırda "Azərbaycan gənclərinin 2007-2015-ci illərdə xarici ölkələrdə təhsili üzrə Dövlət Proqramı" çərçivəsində İsveçrənin Lozanna Federal Texnologiya Məktəbində (Ecole Polytechnique de l'Universite de Lausanne - EPFL) riyaziyyat üzrə magistr təhsili alır.

- Orta məktəb illərində daha çox hansı fənlərə maraq göstərirdiniz?

- Məktəb illərində daha çox riyaziyyat fənninə maraq göstərmişəm. Bu fənn üzrə bir neçə fənn olimpiadalarında iştirak etmişəm. 2007-ci ildə Respublika riyaziyyat fənn olimpiadasında II, 2008-ci ildə III yeri tutmuşam. Bundan əlavə, "YOS" Türkiyə universitetlərinə qəbul imtahanında 80 suala 80 doğru cavab verərək birincilərdən olmuşam. İxtisas seçimimə isə daha çox riyaziyyata olan marağımın köməyi olub.

- Olimpiadaların şagirdlərin təhsilində və gələcək karyerasında rolunu necə qiymətləndirirsiniz?

- Olimpiadalar şagirdlərin orta məktəbdən artıq ciddi şəkildə elmlə məşğul olmasına fürsət yaradır. Buna görə də olimpiadaların şagirdlərin təhsilində çox ciddi yeri olduğunu vurğulamaq istəyirəm. Lakin elm yolunda irəliləyən bir insanın sadəcə olimpiadalarla kifayətlənməsi, özünü yalnız yarışmalarla məhdudlaşdırmasının çox doğru olmadığını düşünürəm. Ali təhsil və bundan sonrakı pillələrdə qarşılaşacağımız tədqiqat problemlərinin də ən azı olimpiadalar qədər əhəmiyyətli olduğunu vurğulamaq istəyirəm. Bəzən olimpiadalarda çox da böyük uğur qazana bilməyən, lakin elmi tədqiqatlarda böyük uğurlara imza atmış alimlərə də rast gəlmək mümkündür. Buna görə də olimpiadalarda böyük uğur qazanmayan şagirdlərin heç də ruhdan düşməsinə ehtiyac olmadığını düşünürəm.

- Xaricdə təhsil almağa necə qərar verdiniz?

- Xaricdə təhsil almaq istəyimdə bir neçə amil başlıca rol oynadı. İlk öncə onu vurğulayım ki, məndən bir yaş böyük olan qardaşım Əhməd də Ankaraya ODTU-da təhsil almağa getmişdi. Bundan əlavə, təhsil aldığım dövrdə lisey yoldaşlarımın çoxu xaricdə təhsil almağa maraq göstərirdi. Beləliklə də mən də bakalavr təhsilimi Ankarada ODTU-da almağa qərar verdim. ODTU-dakı təhsilimi başa çatdırdıqdan sonra isə təhsilimi Avropada elmin daha da inkişaf etdiyi bir universitetdə davam etdirməyi özüm üçün qətiləşdirdim. Hazırda buraya gəlməyim də Dövlət Proqramının dəstəyi ilə həyata keçirilir. Bu proqram Azərbaycanın ən istedadlı gənclərinin xarici ölkələrin nüfuzlu universitetlərində dərin bilik və təcrübə qazanmasına imkan yaradır. Mən Dövlət Proqramı çərçivəsində tələbələrin seçim prosesini çox bəyənirəm.

- Ölkəmizdə təhsil sahəsində aparılan islahatlara münasibətiniz...

- Azərbaycan təhsilində baş verən son müsbət dəyişikliklərlə bağlı demək istərdim ki, xaricdə təhsil almaq üçün tələbələrə hərtərəfli dəstək göstərilməsi həqiqətən də çox faydalı və sevindirici bir amildir. Bir çox xidmət növlərinin elektronlaşdırılması da Təhsil Nazirliyinə müraciət edən insanların işlərinin asanlaşmasına kömək edir. Bir Azərbaycan vətəndaşı olaraq təhsilimizdə bu cür inkişafı, mütərəqqi addımları görmək bizlərə çox xoş təsir bağışlamaqdadır.

- Tələbə həyatınız necə keçir?

- Açıq desəm, tələbə həyatım əsasən dərs oxumaqla keçir. Çox nadir hallarda isə dostlarımla futbol oynamağa fürsət tapa bilirəm, lakin hər fürsət düşdükcə yeni bir ölkəyə - səyahət etməyi, tanımadığım ölkələri gəzib-görməyi çox sevirəm.

- Azərbaycan diasporası ilə əlaqələriniz. Ölkəmizi, mədəniyyətimizi uzaq ölkədə təmsil edə bilirsinizmi?

- Azərbaycanın İsveçrədəki səfirliyi Bern şəhərində yerləşir. Səfirliyimiz ölkədəki bütün azərbaycanlıları qeydiyyata alaraq bayramlarda, müxtəlif tədbirlərdə tələbələri və digər həmvətənlərimizi bir araya gətirir. Ümid edirik ki, mədəniyyətimizi yetərincə təmsil edə bilirik. İsveçrədə Azərbaycana olan münasibət isə normaldır, ölkəmizi tanıyan, mədəniyyətimizə maraq göstərən insanlar az deyil.

- Xaricdə təhsilin hansı üstünlüklərini qeyd edə bilərsiniz?

- İlk öncə, xaricdə təhsil almaqla beynəlxalq təhsil sistemlərində nələrin öyrənildiyi ilə tanış olmaq mümkündür. Hansı yeni texnologiyalar öyrənilir, hansı yeniliklər üzərində çalışmalar aparılır. Bütün bunlarla tanışlığın zəruri olduğunu və əhəmiyyət kəsb etdiyini vurğulamaq istərdim. Bundan əlavə, bir çox fərqli millətlərdən olan qrup yoldaşlarım vasitəsi ilə müxtəlif mədəniyyətlər ilə də tanış olmaq mümkündür.

- Oxuduğunuz ali məktəb barədə məlumat verərdiniz...

- Oxuduğum universitet ( EPFL) İsveçrədə yerləşən texniki ixtisaslar sahəsində dünyanın ən güclü universitetlərindən biridir, əsası 1853-cü ildə qoyulub. Universitetdə müəllim-tələbə münasibətlərinin çox mehriban olduğunu vurğulaya bilərəm. Mənə dərs deyən professorlardan Janos Pachın (kombinatorlu həndəsə), Emre Telataın (informasiya nəzəriyyəsi), Friedrich Eisenbrandın (kombinatorial optimallaşdırma) adlarını çəkə bilərəm, onlarla istənilən məsələ ilə əlaqədar danışa bilərsən. Bu şəxslərin hər biri öz tədqiqatları ilə dünyanın ən məşhur professorlarındandır.

Bizim universitetdə dünyanın müxtəlif ölkələrindən çoxlu sayda tələbə təhsil alır. Qeyd etməliyəm ki, universitetdə əcnəbi tələbələrə münasibət çox gözəldir, hər bir əcnəbi tələbə bir mədəniyyətlə tanışlıq deməkdir. Universitetdə əsasən dərslər bitdikdən sonra 2-3 həftəlik bir fasilə olur. Həmin müddət ərzində tələbələr semestr müddətində öyrəndikləri bilikləri yeniləşdirə bilərlər. Bu fasilədən sonra isə imtahan sessiyası başlayır. İmtahanlar bəzən yazılı, bəzən isə şifahi şəkildə olur.

- Gələcək planlarınız barədə nə deyə bilərsiniz?

- Təhsilimi başa çatdırdıqdan sonra da elm yolu ilə davam etməyi planlaşdırıram. Hər hansı bir universitetdə və ya tədqiqat mərkəzində elmi tədqiqatlar aparmaq niyyətim var. Zənnimcə, riyaziyyat digər elm sahələri və texnologiyaların inkişafına olan təsirinə görə istər Azərbaycanda, istərsə də dünyanın digər ölkələri üçün çox önəmlidir.

Oruc MUSTAFAYEV

Azərbaycan müəllimi.- 2014.- 19 sentyabr.- S.9.