Azərbaycan Dillər Universiteti

yeni tədris ilinə yeniliklərlə başlayır

Tam təmir olunmuş yataqxana, əməkhaqqı artımı, xaricə göndərilən tələbələr

Azərbaycanda təhsilin keyfiyyətinin ən inkişaf etmiş ölkələr səviyyəsinə yüksəlməsi, dövlətin təhsilə diqqət və qayğısı bu sahənin dünya səviyyəsinə yüksəlməsinə imkan verib. Təhsilə daim böyük önəm vermiş ümummilli lider Heydər Əliyevin ideyaları Azərbaycan Prezidenti İlham Əliyev tərəfindən uğurla həyata keçirilir. Dövlətimizin təhsilə göstərdiyi böyük diqqət və qayğısı ildən-ilə artır. Azərbaycanda təhsilə olan diqqət, Azərbaycan üçün təhsilin inkişafı prioritet sahədir. Bu səbəbdən bu gün Azərbaycan təhsil sistemində ciddi islahatlar aparılır. Azərbaycan Dillər Universiteti hər zaman bu islahatların önündə gedən ali təhsil müəssisəsidir.

Tələbələrin sayı altı mindən çoxdur

Azərbaycan Dillər Universiteti (ADU) 2014-2015-ci tədris ilinə yeniliklərlə qədəm qoyur. Bu il ADU-nun bakalavr pilləsinə 1500-ə yaxın tələbə, magistratura pilləsinə isə 200-ə yaxın tələbə qəbulu olub, doktorantura pilləsinə isə tezliklə baş tutacaq qəbulla bağlı müvafiq işlər görülüb. Hər il yüksək səviyyədə həyata keçirilən bu proses nəticəsində Azərbaycan Dillər Universiteti ölkə universitetləri içərisində aparıcı təhsil müəssisələrindən birinə çevrilib. Bu isə Azərbaycan Prezidenti İlham Əliyevin təhsilə göstərdiyi diqqət və qayğının nəticəsidir. Bu tədris ilində ADU tələbələrinin sayı 6000-ni keçib. Bu rəqəm qısa zaman kəsiyində universitetdə aparılan islahatların, yürüdülən uğurlu təhsil siyasətinin nəticəsidir. Kredit sisteminin tam tətbiqi, mobilliyin təmin olunması, tələbə yönümlü təhsilin təşkili ilə ADU Avropa standartlarına yaxınlaşmaq istiqamətində mühüm addımlar atıb.

Maddi-texniki baza müasir standartlar səviyyəsindədir

ADU-nun sahib olduğu geniş imkanlar nəticəsində hər il universitetdə gözəçarpan və çox vacib yeniliklər baş verir. Yeni tədris ilində də universitetdə yeniliklər aparılıb. Belə ki, hər il olduğu kimi, yeni tədris ilində universitetin hər üç korpusunda əsaslı təmir işləri aparılır, hər üç bina maddi-texniki bazası yenilənmiş formada tələbələrin ixtiyarına verilir. Universitetin ikinci korpusunda tədbirlərin, iclasların keçirilməsinə xidmət göstərən, əsaslı təmir nəticəsində tam müasir yeni standartlara cavab verən akt zalı yenidən istifadəyə verilib. Bu gün ADU öz xarici qonaqlarını böyük fəxr hissi ilə universitetlə, buradakı təhsil sistemi ilə tanış edir. ADU-nun ayırdığı maddi vəsait əsasında və Amerika Birləşmiş Ştatlarının ölkəmizdəki səfirliyinin dəstəyi ilə təmir edilib yeniləşmiş, maddi-texniki bazası dəyişdirilmiş, yeni texnologiyalarla, əlavə kommunikasiya imkanları, ən müasir texnika ilə təmin edilmiş 2008-ci ildə açılan İnformasiya Resurs Kompleksi, o cümlədən İnformasiya Resurs Kompleksinin Amerika Mərkəzi yenidən istifadəyə verilir. Bu gün Azərbaycan Dillər Universiteti burada fəaliyyət göstərən İnformasiya Resurs Kompleksi və "Açıq kitabxana" vasitəsilə kitabxana mühitini, universitetdə kitab fəlsəfəsini ən yüksək səviyyədə həyata keçirən ali məktəb kimi təqdim oluna bilər. İlk dəfə universitet tarixində ADU-da məhz İRK-nin nəzdində yeni telestudia açılır. Müəllimlər və tələbələr telestudia vasitəsilə ilə universitetin daxilində çıxış edə, öz mühazirə və mülahizələrini söyləyə, tələbələrlə söhbət edə, öz sözlərini çatdıra biləcəklər.

Tam təmirli tələbə yataqxanası

Bu dərs ilində tədris binaları ilə yanaşı, ADU-nun tələbə yataqxanası yaşayış üçün lazım olan hər növ avadanlıqlarla təchiz, sanitar-gigiyenik normalara uyğun, ən yüksək səviyyədə təmir edilib tələbələrin istifadəsinə verilib.

Professor-müəllim işçi heyətinin əməkhaqları artırılıb

Azərbaycan Respublikasının Prezidenti İlham Əliyevin Azərbaycan təhsil sisteminin adambaşına maliyyələşməsinə keçməsi ilə əlaqədar verdiyi qərar əsasında universitetdə fəaliyyət göstərən professor-müəllim, o cümlədən işçi heyətinin əməkhaqları artırılıb. İşçilərin sosial rifahının yüksəlməsi, onların maddi durumunun yaxşılaşdırılması istiqamətində addım atılaraq maaşlar Azərbaycanda ali məktəblər sırasında ən yüksək səviyyəyə çatdırılıb. Bu gün ADU əməkdaşları müxtəlif vəzifələr üzrə 500-1500 AZN arası əməkhaqqı alırlar.

Beynəlxalq proqramlar həyata keçirilir

Azərbaycanın təhsil sahəsində beynəlxalq əməkdaşlığa xüsusi önəm verməsindən irəli gələrək ADU-nun beynəlxalq əlaqələri, qoşulduğu beynəlxalq proqramlar nəticəsində həm maddi, həm də ictimai baxımdan xeyli inkişaf etmişdir. Rəqabətə davamlı universitet olan ADU-da tələbələrin dünya dillərinə marağını artırmaq, onları ölkələrarası əlaqələrin inkişafında vasitəçi kimi yetişdirmək üçün proqramlar həyata keçirilir. Bu proqramlar nəticəsində ADU tələbələri bu gün artıq bir sıra ölkələrin ali məktəblərində oxuyurlar və Azərbaycan Dillər Universitetinə xaricdən tələbələr gəlirlər. ADU-dan tələbələr bu tədris ili üçün Fransa, Koreya, Norveç, İtaliya, Yaponiya, Çin kimi ölkələrdə təhsillərini davam etməyə yollanırlar.

Heç də təsadüfi deyil ki, Azərbaycanda ilk dəfə olaraq hər zaman ilklərə imza atan Azərbaycan Dillər Universitetinin pedaqoji fakültəsinin tələbəsi Nərmin İsmayılova bu il ADU ilə yanaşı, Böyük Britaniyanın Esseks Universitetini də fərqlənmə diplomu ilə başa vuran ilk azərbaycanlı tələbə oldu.

Azərbaycan Dillər Universiteti yeni tədris ilinə həmçinin digər yeniliklərlə də qədəm qoyur. Belə ki, ADU-da növbəti dərs ilindən macar dilinin tədris olunması nəzərdə tutulub.

Beləliklə, ADU hər zaman olduğu kimi, formaca yenilənən, məzmunca aparılan islahatları ilə öndə gedən, aparıcı tələbələr üçün geniş perspektivli üfüqlər açan, müəllimlər üçün yeni-yeni imkanlar yaradan ali təhsil müəssisəsi olaraq yeni tədris ilinə də uğurla başlayır.

Azərbaycan müəllimi.- 2014.- 26 sentyabr.- S.8.