Müsabiqə qalibləri ölkə

Prezidentinə minnətdarlıq edirlər

Azərbaycan Respublikası Prezidentinin 21 dekabr 2015-ci il tarixli sərəncamları ilə 2014-2015-ci tədris ilində keçirilmiş “Ən yaxşı ümumi təhsil müəssisəsi” və “Ən yaxşı müəllim” müsabiqələrində müvəfəqiyyət qazanmış 50 məktəb və 100 müəllim mükafatlandırılıb. Müsabiqələrdə qalib gələn məktəblərin hər birinə 10 min manat, müəllimlərin hər birinə isə 5 min manat məbləğində birdəfəlik pul mükafatları verilib. Mükafat alan məktəblərin rəhbərlərindən və müəllimlərdən bir qrupu ilə əlaqə saxlayıb bu böyük uğurları ilə bağlı təəssüratlarını bizimlə bölüşmələrini xahiş etdik.

İkinci dəfə qalib olmaq

sonsuz qürur hissidir

Sahibə ABBASOVA,

Bakı şəhəri 54 nömrəli

tam orta məktəbin direktoru

Ciddi rəqabət şəraitində və bir neçə mərhələdən ibarət keçirilən müsabiqələrdə qaliblər sırasına düşmək hər bir təhsil müəssisəsi və müəllim üçün böyük uğur və şərəf işi hesab olunur. Bizim məktəbimiz artıq ikinci dəfədir ki, belə bir uğura imza atır, şərəfə nail olur. Belə mötəbər bir müsabiqədə birinci dəfə qələbə qazanmaq əgər böyük sevincdirsə, ikinci dəfə qalib olmaq sonsuz qürur hissidir. Bu hissi bizə, məktəbimizin kollektivinə yaşatdığına görə möhtərəm Prezidentimizə dərin minnətdarlığımızı bildiririk.

Məktəbimizin uğurları az deyil. Belə ki, son 3 ildə buraxılış imtahanlarının nəticələrinə görə IX siniflər üzrə müvəffəq qiymət alanlar 91%, XI siniflər üzrə isə 98% olmuşdur. Məktəbi bitirənlərdən 70%-i hər il ali məktəblərə qəbul olunur.

Son 3 ildə qəbul olan şagirdlərin 26%-i 500-700 arası bal toplamışdır.

Son 4 tədris ilində 4 medalçımız olub. Onlarn 4-ü də yüksək balla ali məktəblərə qəbul olmuşdur. 1 nəfər Prezident təqaüdçüsüdür.

Qarşıdan gələn 31 Dekabr - Dünya Azərbaycanlılarının Həmrəylik Günü və Yeni il münasibətilə cənab Prezidentimiz başda olmaqla xalqımızı təbrik edir, yeni ildə yeni-yeni uğurlar arzulayıram.

Göstərilən qayğıya cavab olaraq çalışacağıq ki, gələcəyimizin təminatçısı olan gənclərimizin layiqli vətəndaş kimi yetişməsi üçün bundan sonra da bütün bilik və bacarığımızı əsirgəməyək.

Müsabiqədə qələbə bizə də nəsib oldu

Təranə SƏLİMOVA,

Qəbələ şəhər 2 nömrəli

tam orta məktəbin direktoru

Bu il “Ən yaxşı ümumi təhsil müəssisəsi” müsabiqəsinin qalibi, respublikamızın 50 ən yaxşı təhsil müəssisəsindən biri olmaq şərəfi bizə də nəsib oldu. Ömrünü gələcəyimiz olan şagirdləri yolunda şam kimi əridən müəllimlərimizin fədakar əməyinə bundan böyük qiymət ola bilməz. Qəbələ şəhər 2 nömrəli tam orta məktəbinin “Ən yaxşı ümumi təhsil müəssisəsi” müsabiqəsinin qalibi olması təkcə müəllim kollektivini deyil, şagirdlərimizi, valideynlərimizi, Azərbaycan dövlətinə, təhsilinə dəyər verən hər bir qəbələlini qürurlandırdı. Bütün bunlara görə muəllimlərimiz adından Prezidentimizə minnətdarlıq edirik.

Qəbələ şəhər 2 nömrəli tam orta məktəb üçün 2014-2015-ci tədris ili uğurlu olmuşdur. Belə ki, ali məktəbə sənəd vermiş 46 nəfərdən 19-u ölkəmizin nüfuzlu ali təhsil müəssisələrinə qəbul olunmuşdur. Sevindirici haldır ki, məzunlarımızdan 2 nəfəri 600-dən, 3 nəfəri isə 500-dən yuxarı bal toplamışdır. Məzunumuz Lalə Mustafayeva məktəbi qızıl medalla bitirmişdir. Onu da qeyd edim ki, Lalə həm də fənn olimpiadalarının respublika turunda biologiya fənni üzrə birinci olmuş və qızıl medala layiq görülmüşdür. Məzunumuzun 2 qızıl medala sahib olması kollektivimizi qürurlandırır. Məktəbimizin daha bir məzunu - Fidan Aslanova 47-ci Beynəlxalq Kimya Olimpiadasının zona turunun iştirakçısı olmuş, ali məktəblərə qəbul imtahanlarında 680 bal toplayaraq Bakı Ali Neft Məktəbinin tələbəsi adına layiq görülmüşdür.

Bu gün qazandığımız hər bir uğur dövlətimizin, şəxsən Prezidentimizin təhsilə göstərdiyi yüksək qayğının nəticəsində mümkün olmuşdur.

Bu il bir müəllimimiz də

qaliblər sırasındadır

İsmayıl YUSUBOV,

Şirvan şəhəri 18 nömrəli

tam orta məktəbin direktoru

31 dekabr - Dünya Azərbaycanlılarının Həmrəylik Günü və Yeni il ərəfəsində məktəbimizin kollektivi şad xəbər aldı. Ölkə Prezidenti İlham Əliyevin sərəncamı ilə məktəbimiz “Ən yaxşı ümumi təhsil müəssisəsi” müsabiqəsinin qalibi elan olunmuş və 10000 manat pulla mükafatlandırılmışdır. Nəzərə çatdırım ki, bu, müsabiqədə məktəbimizin ikinci qələbəsidir. Gənc nəslin təlim-tərbiyəsi sahəsində qazandığımız uğurlara verdiyi yüksək qiymətə görə məktəbimizin bütün kollektivi və valideynləri adından ölkə Prezidentinə minnətdarlığımızı bildiririk.

Ötən tədris ilində məktəbimizin 11-ci sinfini 111 nəfər şagird bitirmişdir. Onlardan 84 nəfəri ali məktəbə qəbul olmaq üçün sənəd təqdim etmiş, 62 nəfəri ali məktəbə qəbul olunmuşdur. Onlardan 1 nəfəri qızıl medal, digər 1 nəfəri isə gümüş medal almışdır. Bundan başqa, 2 məzunumuz kimya, fizika fənləri üzrə respublika olimpiadasının qalibi olmuş, 1 məzunumuz isə Beynəlxalq Kimya Olimpiadasında bürünc medal qazanmışdır. Ali məktəbə qəbul olunan məzunlarımızdan 17 nəfəri 500-dən çox bal toplamışdır.

Nəzərə çatdırım ki, bu il məktəbimizin coğrafiya müəllimi Pərvanə Heydərova da “Ən yaxşı müəllim” müsabiqəsinin qalibləri sırasındadır. Belə müsabiqələr müəllimləri, pedaqoji kollektivimizi daha yaxşı işləməyə ruhlandırır, böyük qələbələr qazanmağa sövq edir.

Müsabiqə obyektiv və şəffaf keçirildi

Rafiq ƏLİYEV,

Ağdam rayonu Quzanlı qəsəbə

tam orta məktəbinin direktoru

Rəhbərlik etdiyim Ağdam rayonu Quzanlı qəsəbə tam orta məktəbi ikinci dəfədir ki, “Ən yaxşı ümumi təhsil müəssisəsi” müsabiqəsində iştirak edir. Nəzərə çatdırım ki, bu il həmin müsabiqəyə daha inamla qoşulduq və əldə etdiyimiz nailiyyətlər bizi müsabiqənin qalibi etdi. Məktəbimizin fəaliyyətini yüksək səviyyədə dəyərləndirdiyi üçün bütün pedaqoji kollektivimiz adından ölkə Prezidenti İlham Əliyevə öz təşəkkürümüzü və minnətdarlığımızı bildiririk və dövlət başçımızı əmin edirik ki, bundan sonra da bütün fəaliyyətimizi təhsil islahatının tələbləri əsasında quracağıq.

Xüsusilə qeyd etmək istəyirəm ki, müsabiqə obyektiv və şəffaf keçirildi. Məktəbimiz istər qəbul imtahanlarında, istərsə də digər müsabiqə və yarışlarda uğurla iştirak edir. Bütün bunlar məktəbin pedaqoji kollektivinin qabaqcıl təcrübəyə malik fənn müəllimlərinin öz işlərinə əsl vətəndaş mövqeyindən yanaşmasının və yüksək peşəkarlığının nəticəsidir.

Mükafatı gələcək fəaliyyətim

üçün stimul hesab edirəm

Gülnar HÜSEYNOVA,

Gəncə şəhəri 21 nömrəli tam

orta məktəbin riyaziyyat müəllimi

Hər il müsabiqənin gedişini izləyirdim. Nəhayət, bu il mən də “Ən yaxşı müəllim” müsabiqəsinə qoşuldum və qaliblər sırasına düşdüm. Müsabiqəni biz müəllimlərin fəaliyyətinə dövlətimizin verdiyi yüksək qiymət, möhtərəm Prezidentimizin təhsil işçilərinə diqqət və qayğısının ən bariz nümunəsi kimi dəyərləndirir, bizi mükafatlandırdığına görə dövlət başçısına minnətdarlıq edirəm.

Fikrimcə, bu müsabiqə müəllimləri öz üzərlərində çalışmağa, yaradıcı axtarışlar aparmağa, yeni nailiyyətlər qazanmağa sövq edən mötəbər bir yarışmadır. Müsabiqənin təşkilinə də söz ola bilməz. Çox şəffaf şəkildə keçdi. Onu da deyim ki, mən məktəbimizdə bu müsabiqədə iştirak edib qalib gələn ilk müəlliməm. Başa vurmağa hazırlaşdığımız il mənim yaddaşımda, güman edirəm ki, məhz bu hadisə ilə qalacaq. Çünki müsabiqədə qalib gəlməyim indiyədək əldə etdiyim uğurların ən böyüyüdür. Mükafatı həm də gələcək fəaliyyətim üçün stimul hesab edirəm. Gələcəkdə daha fəal olmağa, yeni təlim texnologiyalarını öyrənib öz işimdə tətbiq etməyə, yeni nailiyyətlər qazanmağa çalışacağam.

Bu sevinc hissini sözlə ifadə etmək çətindir

Cəmalə CƏFƏROVA,

Sumqayıt şəhəri 25 nömrəli tam orta məktəbin

Azərbaycan dili və ədəbiyyat müəllimi

Mən hər zaman axtarışdayam. Yeniliklərlə maraqlanır, müxtəlif səpgili təlimlərdə, layihələrdə, beynəlxalq konfranslarda, müsabiqələrdə iştirak edirəm.

Bu il “Ən yaxşı müəllim” müsabiqəsinə qatıldım. Ölkənin ən nüfuzlu müəllimlərindən olmaq, bu ada layiq görülmək, məncə, hər bir müəllimin arzusudur. Bu gün təhsil müəssisələrimizdə təhsilalanların təlim-tərbiyəsi və onların şəxsiyyət kimi həyata hazırlanmasında fədakarlıqla çalışan, öz fənnini dərindən sevdirə bilən müəllimlərimiz çoxdur. Onlarla bir sırada olmaq, mübarizə aparmaq elə də asan olmadı. Tamamilə şəffaf və obyektiv şəkildə keçən müsabiqənin qaliblərindən biri də mən oldum. Qürur duyuram. Bu sevinc hissini sözlə ifadə etmək çətindir.

Bütün sahələrdə olduğu kimi, təhsilimizdə də özünün yüksək peşəkarlıq nümunəsi ilə fərqlənən müəllimlərimiz ölkə başçısının qayğı və diqqətindən kənarda qalmır. Bu da bir həqiqətə - Prezident İlham Əliyevin təhsili dövlət siyasətinin prioritetlərindən biri kimi diqqətdə saxlaması həqiqətinə söykənir. Mən bizə göstərdiyi diqqət və qayğıya görə möhtərəm Prezidentimizə dərin minnətdarlığımı bildirirəm.

Müsabiqədə ilk dəfə iştirak edirdim

Dəyanət FƏRZƏLİYEV,

Ağcabədi rayonu Hindarx qəsəbə 1 nömrəli

tam orta məktəbin informatika müəllimi

Düşünürəm ki, müəllimlik həyatın bütün sahələrində fəallıq tələb edir. Bu baxımdan mən də özümü sınamaq məqsədi ilə dövlətimizin müəllimlərə göstərdiyi diqqət və qayğısı nəticəsində verdiyi bu şansı əldən qaçırmaq istəmədim. Bu il ilk dəfə olaraq “Ən yaxşı müəllim” müsabiqəsinə qoşuldum və qaliblər sırasına düşməyə nail oldum. Müsabiqənin bütün mərhələləri şəffaf və ədalətli təşkil olunmuşdu. Bu müsabiqə müəllimin öz bacarıqlarını nümayiş etdirməsi üçün böyük bir şansdır. Müsabiqədəki qalibiyyətimi pedaqoji fəaliyyətimin uğuru hesab edirəm.

“Ən yaxşı müəllim” müsabiqəsinin keçirilməsi müəllimlərin əməyinə verilən qiymətin bariz nümunəsidir. Bu müsabiqədə iştirak etmək üçün bizə şərait yaradan ulu öndər Heydər Əliyevin layiqli davamçısı Prezident İlham Əliyevə dərin minnətdarlığımı bildirirəm. Müsabiqədə qalib olan bütün həmkarlarımı ürəkdən təbrik edirəm.

Adımı qaliblər sırasında görəndə çox sevindim

Nicat İSMAYILOV,

Bərdə şəhəri 3 nömrəli tam orta məktəbin tarix müəllimi

Müəllim əməyinə diqqət, şəffaf seçim məni də bu il müsabiqədə iştirak etməyə həvəsləndirdi. Müsabiqədə iştirak etdim və qalib oldum. Adımı mükafatlandırılanlar sırasında görəndə çox sevindim. Bu diqqət və qayğıya görə Prezident İlham Əliyevə təsəkkürümü bildirirəm.

Bir çox təlimlərdə iştirakçı və təlimçi kimi fəaliyyət göstərmişəm. Təlimlərdə əldə etdiyim bilik və təcrübələrdən istifadə edərək dərslərimi müasir dövrün tələblərinə uyğun qurmağa çalışıram. Dərs dediyim siniflərdə şagirdlərimin qazandıqları uğurlar məndə hər zaman sevinc və qürur hissi yaradır, məni işimə daha da məsuliyyətlə yanaşmağa sövq edir. Hazırda yeni təhsil proqramına uyğun olaraq dərs dediyim siniflərdə şagirdlərin hamısı tədris prosesinə cəlb olunur. Təlim prosesinin həyatla əlaqələndirilməsi, eyni zamanda digər fənlərlə inteqrasiya xüsusi diqqətimdə olur. Tədris prosesi zamanı mənim şagirdlərə aşılamağa çalışdığım əsas məsələlər ləyaqətlə ömür sürmək, insanı qabağa çəkən dünyagörüşü formalaşdırmaq olub.

Hazırladılar: Yusif ƏLİYEV,

Niyazi RƏHİMOV

Azərbaycan müəllimi.- 2015.- 26 dekabr.- S.8.