Lütfi Zadənin azərbaycanlı tələbəsi

ABŞ-ın Kaliforniya Berkli Universitetinin tələbəsi Səbinə Şahbazzadə ilə söhbət

Səbinə Şahbazzadə 1986-cı il yanvarın 22-də Bakı şəhərində anadan olub. 2003-cü ildə Respublika İncəsənət Gimnaziyasını bitirərək Bakı Dövlət Universitetinin tətbiqi riyaziyyat və kibernetika fakültəsinin informatika ixtisasına qəbul olunub. Universiteti fərqlənmə diplomu ilə bitirdikdən sonra təhsilini davam etdirmək qərarına gəlib. Azərbaycan Dövlət İqtisad Universitetinin MBA proqramının marketinq ixtisası üzrə magistr pilləsinə qəbul olunub. 2014-cü ildən "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində ABŞ-ın Kaliforniya ştatının Berkli Universitetində (University of California, Berkeley) elektrik mühəndisliyi və kompüter elmləri (Electrical Engineering and Computer Science) fakültəsində təhsil alır. Eyni zamanda Berkli Universitetində tədqiqat proqramı üzrə professor Lütfi Zadənin rəhbərliyi altında elmi tədqiqatlarını davam etdirir. Beləliklə də rubrikamızın budəfəki qonağı dünyanın ən yüksək reytinqli universitetlərindən olan Kaliforniya Berkli Universitetinin tələbəsi Səbinə Şahbazzadədir.

"İxtisas seçimində ən

çox anamın dəstəyi olub"

Orta məktəb illərində riyaziyyat fənn olimpiadalarında iştirak etmişəm. Daha çox riyaziyyat, fizika, kimya və ingilis dili fənlərinə marağım var idi. İxtisas seçimimdə ən çox anamın dəstəyi olmuşdır. Mənim anam Şahnaz Şahbazova Azərbaycan Texniki Universitetinin dosentidir. O, 30 ildən çoxdur ki, kompüter elmləri sahəsində dərs deyir. Mən də onun ixtisasını davam etdirirəm. Xaricdə təhsil almaq marağım ailəmdən irəli gəlib. Belə ki, anamın dünyanın müxtəlif universitetlərində, konfranslarda mühazirələrlə çıxış etməsi, eləcə də həmin ali məktəblərdə təhsilin inkişaf etməsi, kompüter elmləri sahəsində yeni texnologiyaların və ideyaların yaranması məni xaricdə təhsil almağa həvəsləndirdi. Digər tərəfdən, 2012-ci ildə məndən öncə bacımın Berkli Universitetinin hüquq fakültəsinə qəbul olunması da mənim xaricdə təhsil almaq qərarımı daha da möhkəmləndirdi.

Anam Hindistan, Almaniya, ABŞ, Macarıstan və s. ölkələrdə elmi tədqiqat işlərini yerinə yetirmişdir. ABŞ-ın Kaliforniya ştatının Berkli Universitetində təhsil almağım bir valideyn kimi anamın arzusu idi.

"Təqaüdə layiq görüldüyümə

görə olduqca xoşbəxtəm"

Xaricdə təhsil almaq qərarımı reallaşdırmaq üçün Dövlət Proqramına müraciət etdim. Tələbələrin seçimi çox gözəl təşkil olunmuşdu. Seçim prosesi doğru və şəffaf yolla keçirildi. Müsahibə zamanı mənə verilən suallar məhz təhsil alacağım universitetlə bağlı idi və bütün proses 15 dəqiqədən artıq olmadı. Çox həyəcanlı idim. Təqaüdə layiq görüldüyümə görə olduqca xoşbəxtəm. Sevinirəm ki, xaricdə təhsil almaq arzum reallığa çevrilib.

Ümid edirəm ki, Təhsil Nazirliyinin son islahatları Azərbaycan təhsil sisteminə çox böyük uğur gətirəcək. İstedadlı tələbələrin dünyanın ən qabaqcıl universitetlərində təhsil almaları ölkəmizin gələcək inkişafı üçün möhkəm zəmin yaradır. Bu həm də müstəqil Azərbaycanın bütün sahələrinin etibarlı əllərdə olmasına əyani sübutdur. Gənclər xaricdə təhsil almaqla dünyanın ən son yeniliklərini vətənimizə gətirir və onun tətbiqinə çalışırlar. Dünyanın modern ənənələrinin, qabaqcıl təcrübələrinin Azərbaycana gətirilməsi yalnız xaricdə təhsil almaqla mümkündür. Bu da ki, ölkə rəhbərliyinin diqqət mərkəzində olan vacib məsələlərdən biridir. Məhz Azərbaycan dövlətinin diqqət və qayğısı sayəsində bu gün minlərlə azərbaycanlı gənc dünyanın müxtəlif ölkələrində təhsil alır.

Kaliforniyada tələbə həyatı

Yaşadığım Berkli şəhəri Amerikanın digər şəhərlərindən çox fərqlidir. Berkli şəhəri əsasən universitet kampusundan ibarətdir. Olduqca liberal və deyərdim ki, azad şəhərdir. Bu şəhərdə adaptasiya mənim üçün əvvəlcə çətin oldu, o mənada ki, Bakı ilə Berkli şəhəri arasında 12 saat fərq var. Əlbəttə ki, Bakı üçün darıxıram, Bakı mənim üçün çox əzizdir. Ancaq bir şeyi bilirəm ki, təhsilimi tamamlamalıyam, çünki məqsədim savadlı, elmli mütəxəssis olmaqdır. Təhsil həyatım olduqca maraqlı keçir, universitet həyatı, tələbəlik, dərslərin intensivliyi, fərqli bir mühit mənim üçün maraqlı və yenidir. Asudə vaxtlarımı fəal tərzdə keçirməyə çalışıram. Digər şəhərlərin gözəl, məşhur və görməli yerlərini gəzməyi və tarixi ilə maraqlanmağı çox sevirəm. Bundan əlavə, burada yerləşən Azərbaycan cəmiyyətinin təşkil etdiyi tədbirlərdə də aktiv iştirak edirəm.

Kaliforniyada olan Azərbaycan cəmiyyəti və konsulluğumuzla yaxın əlaqələrim var. Onların keçirdiyi, demək olar ki, bütün tədbirlərdə çox aktiv iştirak edirəm.

"Tələbələr daha çox praktiki

fəaliyyətə cəlb olunurlar"

Berkli Universitetində təhsilin üstünlüyü ondan ibarətdir ki, tələbələr fənləri özləri seçə bilirlər. Elmin və texnologiyanın inkişafı dərs prosesinə öz təsirini göstərir və dərslər əsasən yeni texnologiyaların tətbiqi ilə keçilir. Tələbələr daha çox praktiki fəaliyyətə cəlb olunurlar. Onlar qrup şəklində müxtəlif proyektlər üzərində çalışırlar, məhz proyektlər əsasında da işlə təmin oluna bilirlər.

Kaliforniya Berkli Universiteti kompüter elmləri üzrə dünyanın top universitetlərindən biridir və statistikaya uyğun olaraq Amerikanın bir nömrəli dövlət ali məktəbidir. Bildiyiniz kimi, XXI əsr informasiya texnologiyaları əsridir və hər bir sahədə texnologiyanın yüksək tətbiqinin şahidiyik. Yeni texnologiyaların yaranması və sürətli inkişafı mənim kompüter elminə marağımı daha da artırdı.

Professor Lütfi Zadənin yanında

Kaliforniya Berkli Universitetinin adı çəkiləndə azərbaycanlı professor Lütfi Zadə yada düşür. Buna görə də söhbətin bu yerində məşhur azərbaycanlı alim barədə danışmamaq olmaz.

Əlbəttə ki, Lütfi Zadənin Kaliforniya Berkli Universitetində işləməsi mənim Amerikada təhsil almağımın əsas səbəblərindən biri olmuşdur. Onunla şəxsi tanışlığımız 2008-ci ildə keçirilən "BakuTel" sərgisinə təsadüf etmişdir. Berkli Universitetinin kompüter elmləri fakültəsində təhsil almağımda professor Lütfi Zadənin mənə yazdığı tövsiyə və onun ABŞ-da oxuyacağım müddətdə mənim elmi rəhbərim olmağa razılıq məktubları böyük rol oynamışdır. Bildiyiniz kimi, Berkli Universitetinin kompüter elmləri fakültəsinə dünyanın müxtəlif ölkələrindən çoxsaylı müraciətlər daxil olur, lakin bu ali məktəbə qəbul olunan tələbələrin sayı məhduddur. 2012- ci ildən, yəni Amerikaya oxumağa gəldiyimdən professorla sıx münasibətdəyəm, mənim elmi rəhbərimdir. Hazırda onun rəhbərliyi altında tələbə tədqiqatçı kimi fəaliyyət göstərirəm. Professor Lütfi Zadə ilə demək olar ki, hər həftə görüşürük. Hesab edirəm ki, şanslı tələbələrdənəm ki, mənim elmi rəhbərim dünya şöhrətli azərbaycanlı alim, professor Lütfi Zadədir. Professor Lütfi Zadənin tələbəsi olmaq, onunla sıx işləmək, "dəyirmi masa"larında, onun və xarici professorların seminarlarında iştirak etmək, dünyada digər məşhur professorlarla ünsiyyətdə olmaq, onlardan dərs almaq, digər çox savadlı tələbələrlə birlikdə müxtəlif elmi proyektlərdə işləmək gənc tələbə kimi mənim üçün olduqca fərəhləndiricidir.

Onu da əlavə etmək istəyirəm ki, mənim anam 2007-2008-ci illərdə "Fulbrayt" proqramını qazanaraq bir il müddətində professor Lütfi Zadənin dəvəti ilə onun laboratoriyasında elmi tədqiqat işi yerinə yetirmişdir.

"Müəllimlər tələbələrə

qayğı ilə yanaşırlar"

Berkli Universitetində professor və tələbə heyəti arasında olduqca gözəl münasibətlər var. Müəllimlər tələbəyə hər zaman yardımçı olurlar, tələbələrin bütün suallarına ətraflı və böyük məmnuniyyətlə cavab verirlər. Hansı bir professora elektron poçtla müraciət edəndə onlar dərhal cavab verirlər. Müəllimlər tələbələrə çox qayğı ilə yanaşırlar.

Burada tələbələr öz biliklərinə güvənib imtahana girirlər. Müəllimlər tələbələrin özlərini imtahan zamanı rahat və sərbəst hiss etməsi üçün onlara şirniyyat gətirirlər. Bir dəfə imtahan verirdim, müəllimim imtahanın başlanmasını elan edəndə "hip-hop" mahnısını oxudu. Tələbələr həyəcan və streslərini atıb güldülər və rahat ab- havada imtahanın suallarına cavab verdilər. İmtahan çox şəffaf yolla keçirilir. İmtahan prosesi fəndən və professordan asılı olaraq müxtəlif formatda olur. Bəziləri sırf proyektlər əsasında, bəziləri isə yazı (esse və testlər) əsasında keçirilir. İmtahan sessiyasında nəzərəçilər olur, lakin onların funksiyası tələbələri imtahan prosesi ilə tanış etmək və prosesə riayət etməkdən ibarətdir. Tələbələr imtahanda sırf öz biliklərini nümayiş etdirirlər.

Oxuduğum universitetdə hamı əcnəbidir. Bütün ölkələrdən tələbələr var. Bütün tələbələrə münasibət eynidir.

Gələcək arzu və planlar

Çox xoşbəxtəm ki, Kaliforniya Berkli kimi nüfuzlu universitetdə təhsilimi davam etdirirəm. Bu, çox qürurverici hissdir. Arzu edərdim ki, gənclərimizin xaricdə təhsil almaq səyləri yüksəlsin və təhsil alan tələbələrimizin sayı daha da çoxalsın. Vətəndən uzaqda olarkən azərbaycanlı tələbələri görmək və hər birinin uğurlarına şahid olmaq olduqca sevindiricidir. Bir daha özlüyümdə bu qənaətə gəlirəm ki, təhsildə uğur əldə etmək, yeni biliklərə yiyələnmək üçün həvəs göstərmək və bu yolda əzmkarlıqla çalışmaq lazımdır.

Hazırda gələcək planlarım - Berkli Universitetinin kompüter elmləri fakültəsində magistr pilləsində təhsilimi davam etdirmək və bir tələbə tədqiqatçı kimi əldə etdiyim elmi nəticələrin professor Lütfi Zadənin birgə müəllifliyi ilə nüfuzlu elmi jurnallarda elmi məqalə kimi dərc olunmasına nail olmaqdır.

Oruc MUSTAFAYEV

Azərbaycan müəllimi.- 2015.- 21 fevral.- S.10.