Məktəblilərimiz Balkan Riyaziyyat

Olimpiadasında 4 medal qazanıb

Ölkəmizi müxtəlif beynəlxalq bilik yarışlarında, olimpiadalarda təmsil edən məktəblilərimizin son illər ayrı-ayrı ölkələrdən olan həmyaşıdları arasında yüksək intellektual bilik və bacarıq nümayiş etdirmələri, hər dəfə vətənə medallarla qayıtmaları təhsil sistemimizin inkişafının göstəricisidir. Bu dəfə də yeniyetmə şagirdlərimizin daha bir xoş sorağını Serbiyadan aldıq. Azərbaycan təhsilinin yetirmələri, Bakıdakı "İstək" liseyinin şagirdləri Serbiyada keçirilən Junior Balkan Riyaziyyat Olimpiadasında (JBMO 2015) uğurla çıxış edərək bir gümüş, 3 bürünc medal qazanıblar. Liseyin yetirmələri Mirəli Əhmədli gümüş, Mehdi Ağakişiyev, Anar Hüseynov və Anar Abbaslı bürünc medala layiq görülüblər. Olimpiadada Serbiya, Rumıniya, Turkiyə, Bosniya Herseqovina, Albaniya, Makedoniya, Moldova, Yunanıstan, Kipr, Bolqarıstan, Monteneqro, Azərbaycan, Qırğızıstan, Qazaxıstan, Fransa, Tacikistan və s. kimi ölkələrin nümayəndələri iştirak ediblər. Gəlin Serbiyada Azərbaycana medallar qazandırmış şagirdlərimizlə daha yaxından tanış olaq.

Mirəli Əhmədli: 2000-ci il dekabrın 9-da Gəncə şəhərində anadan olub. İlk təhsilinə şəhər 4 nömrəli tam orta məktəbdə başlayıb. Sinifdə ən yaxşı oxuyan şagirdlərdən biri olub. İbtidai sinfi bitirdikdən sonra 27 nömrəli məktəbin xüsusi istedadlar sinfində (XİS) oxuyub.

- VII sinifdən Gəncə Türk Liseyinə qəbul olundum və olimpiadaya seçim üçün məntiq imtahanında iştirak etdim. İmtahandan yüksək nəticə ilə keçdim və riyaziyyat üzrə olimpiada komandasına qəbul olundum. VIII sinifdə imtahan verərək təhsilimi, eləcə də olimpiadaya hazırlıq işlərimi Bakıdakı "İstək" liseyində davam etdirməyə başladım. İlin sonunda hər il 26-29 iyun tarixləri arasında keçirilən JBMO (Junior Balkan Mathematics Olimpiad) üçün seçimlər oldu və olimpiadaya qatılmaq hüququ əldə etdim. Serbiyaya 6 nəfərlik komanda və liderimiz olaraq Elvin Məmmədovla birlikdə getdik. Riyaziyyat olimpiadasında 4 fənn üzrə sual verilir (algebra, number theory, geometry, combinatorics). Suallar nə qədər mürəkkəb olsa da, ciddi hazırlıq nəticəsində olimpiadada gümüş medal əldə edə bildim. Bu, mənim olimpiadada ilk medalım deyildi. Ötən il də Makedoniyada keçirilən Balkan Riyaziyyat Olimpidasında bürünc medal qazanmışdım.

Anar Abbaslı: 2001-ci il yanvarın 21-də Bakı şəhərində anadan olub. 2007-ci ildə Bakıdakı 70 nömrəli tam orta məktəbin I sinfinə gedib. 2013-cü ildə Dədə Qorqud Özəl Türk liseyinə qəbul olunub. Hazırda Bakı "İstək" Liseyinin Xalqlar Dostluğu filialında təhsilini davam etdirir. 2015-ci ildə Serbiyada keçirilən Junior Balkan Riyaziyyat Olimpiadasında bürünc medala layiq görülüb.

- VI sinfin sonunda Dədə Qorqud Özəl Türk liseyinə qəbul olundum. Artıq 7-ci sinfin ortalarında məntiq imtahanı verərək olimpiadaya hazırlaşmağımın bünövrəsini qoydum. İmtahan verərək təhsilimi Bakıdakı "İstək" liseyində davam etdirməyə başladım. Elə bu zamandan etibarən komanda rəhbərimiz Elvin Məmmədov ilə olimpiada çalışmalarımızı davam etdirməyə başladıq. Nəhayət, iyunun 24-də 6 nəfərlik komanda və müəllimimiz Elvin Məmmədovla birlikdə Serbiyaya yola düşdük. Bütün iştirakçılar kimi, mən də həyəcanlı idim. Beynəlxalq səviyyəli ilk olimpiadam olduğu üçün daha çox həyəcanlı idim. Nəhayət, olimpiada suallarına uğurla cavab verərək bürünc medala layiq görüldüm. Bu uğuruma görə valideynlərimə, riyaziyyatı yorulmadan biz şagirdlərə öyrədən müəllimlərimiz Elvin Məmmədova, Tural Bədəlova, olimpiada koordinatorumuz Anar Fərmanova və mənə daim dəstək olan Yusuf Durana təşəkkür edirəm.

Mehdi Ağakişiyev: 1999-cu il dekabrın 29-da Göyçay rayonunda anadan olub. 2006-cı ildə Bakıdakı 18 nömrəli tam orta məktəbin I sinfinə gedib. 2012-ci ildə Bakı Özəl Türk Liseyinə qəbul olunub. Hazırda Bakıdakı "İstək" liseyində təhsilini davam etdirir. 2015-ci ildə Qazaxıstanda keçirilən Beynəlxalq Jautikov Olimpiadasında iştirak edib. 2015-ci ildə riyaziyyat üzrə respublika fənn olimpiadasında gümüş medala layiq görülüb. Mehdi müəllim ailəsində böyüyüb. Anası riyaziyyat müəllimidir. Qardaşı Murad hazırda Kanadada Toronto Universitetində təhsil alır.

- 2012-ci ildə imtahanla Bakı Özəl Türk Liseyinə daxil oldum. Buradakı təhsil dövründə bir neçə imtahan verərək riyaziyyat olimpiadasına seçildim. Daha sonra riyaziyyat olimpiadasına hazırlıq düşərgəsində olimpiada sinfinə seçildim. Cari ilin aprelində 26-29 iyun tarixlərində Serbiyada keçiriləcək yeniyetmələr arasında Balkan olimpiadası seçimlərinə qatıldım və komandaya daxil oldum. İyun ayının 24-də 6 nəfərlik komanda və müəllimimiz, həmçinin komanda rəhbərimiz Elvin Məmmədov ilə birlikdə Serbiyaya yola düşdük. Və nəhayət iyunun 26-da keçirilən imtahanda ailəmin və müəllimimin mənə olan inamını doğruldaraq bürünc medal qazandım. Əldə etdiyim uğura görə ailəmə və müəllimimiz Elvin Məmmədova borcluyam.

Anar Hüseynov: 2000-ci il aprelin 23-də Tovuz rayonunun Qovlar kəndində anadan olub. İlk təhsilini Qovlar kənd tam orta məktəbində alıb. Daha sonra imtahan verərək Gəncə Türk Liseyinə qəbul olunub. Anar hələ uşaqlıqdan dəqiq elmlərə daha çox maraq göstərməyə başlayıb. Riyaziyyat həmişə onun üçün ən sevimli və maraqlı fənn olub. Anar da dərsləri ilə yanaşı çalışqanlığı, əməksevərliyi sayəsində fənn olimpiadalarında uğur qazana bilib.

- VII sinfin ortalarından başlayaraq riyaziyyat üzrə olimpiada hazırlıqlarına başladım. VII sinfin sonunda əvvəlcə Qubada, daha sonra Bakıda keçirilən olimpiada komandasına seçim imtahanında fərqləndim. Artıq IX sinifdə oxuyarkən olimpiadaçıların Bakı seçmə imtahanında riyaziyyat üzrə Azərbaycan komandasına qəbul olundum və ölkəmizi beynəlxalq bilik yarışında təmsil etmək hüququ qazandım. İyunun 26-29-da Serbiyada keçirilən riyaziyyat olimpiadasına çox ciddi hazırlaşmışdım. Suallar çətin olsa da bürünc medal qazana bildim. Əlbəttə ki, olimpiadada qazandığım uğurda valideynlərimin, müəllimlərimin rolu böyükdür. Müəllimlərim yorulmadan və böyük əmək sərf edərək bizə elmlərin sirlərini öyrədiblər. Əsas istəyim müxtəlif beynəlxalq miqyaslı olimpiadalarda Azərbaycanın nailiyyətlərini daha da artırmaqdır.

Komandanın rəhbəri, "İstək" Liseyinin müəllimi Elvin Məmmədov "Azərbaycan müəllimi" qəzetinə verdiyi eksklüziv açıqlamasında şagirdlərimizin nüfuzlu Balkan Riyaziyyat Olimpiadasında uğurlu çıxışları barədə danışdı:

- Azərbaycanı builki Junior Balkan Riyaziyyat Olimpiadasında təmsil edən şagirdlərimiz bu zamana qədər sözügedən tədbirdə iştirak etmiş komandalardan ən güclüsü idi. Hər bir iştirakçımız beynəlxalq səviyyəli olimpiada hazırlığını ən yüksək səviyyədə tamamlamışdır. Olimpiadanın sual və tapşırıqlarının bir az çətin və şagirdlərimizin bəzilərinin təcrübəsiz olmasına baxmayaraq yetirmələrimiz bilik yarışmasında ölkəmizi layiqincə təmsil edərək 1 gümüş, 3 bürünc medal qazandılar. Şagirdlərimizdən yaşları nisbətən az olan Ağaəli Zeynallı və Anar Abbaslı olimpiada hazırlıqlarını daha da təkmilləşdirərək növbəti il keçiriləcək JBMO-da uğurla iştirak etmək üçün təcrübə əldə etdilər. Ümid edirəm ki, qarşıdan gələn illərdə də beynəlxalq səviyyəli olimpiadalarda şagirdlərimizin qazandıqları medalların sayı artmaqda davam edəcək.

Şagirdlərimizi, onların valideynlərini, müəllimlərini təbrik edir və uğurlarının davamını arzulayırıq.

Oruc Mustafayev

Azərbaycan müəllimi.- 2015.- 11 iyul.- S.4.