"O mənim müəllimimdir..."

Ötən günlərin söhbətidir. Qax Rayon İcra Hakimiyyəti başçısının şəhər nümayəndəsi, gənc olmasına baxmayaraq şəhərin abadlaşmasında, problemlərinin həllində məqsədyönlü işlər aparan Elbrus Tağıyevlə küçədə görüşdük. Söhbətimiz əsnasında E.Tağıyev küçənin qarşı səkisi ilə gedən qadını görcək:

- Məni bağışlayın, indi qayıdıram,- deyərək məndən aralandı.

Az sonra qayıtdı. "İncimədiniz ki?" - dedi: "O mənim həyatımda mühüm yeri olan, mənə valideynlərim qədər əziz bir insandır. Qazandığım uğurlara görə valideynlərimlə birgə həm də o xanıma borcluyam", - deyə əlavə etdi.

- Qax şəhər 4 nömrəli orta məktəbin 5-ci sinfinə keçmişdik. Sinfimizdə yaxşı oxuyan şagirdlər çox idi. Ona görə də məktəb rəhbərliyi sinfimizi diqqət mərkəzində saxlayırdı. Bir gün direktor sinfimizə tanımadığımız gənc bir müəllimlə daxil oldu. Hamımız həyəcanlı idik.

Direktor: -Məhruzə müəllim sizin sinif rəhbəriniz olacaq. Elə edin ki, müəlliminizlə birlikdə qazandığınız nailiyyətləri 11-ci sinfə qədər qoruya biləsiniz, - dedi. Direktor getdi. Amma bizim həyəcanımız keçmədi...

İlk baxışdan ciddi, sərt baxışlı Məhruzə müəllim sonradan bizim yaxın dostumuz, müəllimimiz, məsləhətçimiz, həm də böyük bacımız oldu. Sinfimizə yeni nəfəs gətirdi. Bizi daim ruhlandırdı, mübarizəyə, bir-birimizlə yarışa səslədi. Çətinə düşəndə köməyimizə yetdi. İxtisasca riyaziyyat müəllimi olsa da hər sahədə mükəmməl biliyə malik olması ilə bizim dadımıza çatdı. Əslində riyaziyyat fənnini mənə sevdirən də məhz Məhruzə müəllim oldu. Azərbaycan Dövlət İqtisad Universitetinə qəbul imtahanı zamanı ən yüksək nəticəm də elə riyaziyyat fənnindən idi. Bu yalnız mənim deyil, həm də Məhruzə müəllimin uğuru idi. 2004-cü ildə universitetin maliyyə-kredit fakültəsini müvəffəqiyyətlə bitirdikdən sonra ixtisasım üzrə rayonun müxtəlif təşkilatlarında çalışdım. Azərbaycan Respublikasının Prezidenti yanında Dövlət İdarəçilik Akademiyasında ikinci ali təhsil aldım. 2013-cü ildən bu vəzifədəyəm. Və bütün bunlara görə o gözəl insana - Məhruzə müəllimə minnətdaram.

Elbrus müəllim bir anlıq susdu. Sonra uzaqlaşan müəlliminin arxasınca baxaraq gülümsündü:

- Axı, o mənim müəllimimdir,- dedi.

E.Tağıyev sanki mənə yeni bir mövzu verdi.

Mənim Məhruzə Yusifova haqqında yazı yazmaq fikrim belə yarandı.

Qax Rayon Təhsil Şöbəsinin riyaziyyat fənni üzrə metodisti Təranə Həşimova ilə görüşdüm. Məhruzə müəllimlə bağlı yazı yazmaq istəyimi bildikdə:

- Məhruzə müəllim rayonumuzun savadlı, sənətinin vurğunu, fənninin incəliklərini dərindən bilməklə bərabər bir an belə öyrənməkdən və öyrətməkdən yorulmayan bir pedaqoqdur. Rayon təhsil şöbəsinin riyaziyyat fənni üzrə göstəricilərində M. Yusifovanın xüsusi yeri vardır. O, yorulmaq bilməyən müəllimdir. Məktəbdə və rayon miqyaslı keçirilən tədbirlərdə, bilik yarışlarında, olimpiadalarda... hər yerdə onun və yetirmələrinin izi görünür. Yalnız Qax şəhərində deyil, rayonun bütün kəndlərində onun yetirmələri var. Belə bir müəllim ilə fəxr etməyə dəyər. Məhruzə xanımla Qax şəhər 4 nömrəli tam orta məktəbdə görüşdük.

M.Yusifova 1961-ci ildə Qax şəhərində anadan olub. Şəhər 1 nömrəli orta məktəbini əla qiymətlərlə bitirib. İlk müəllimi Fatma Babayeva və riyaziyyat müəllimi Müslümət Xəlilovanın "sən yaxşı riyaziyyatçı olacaqsan, qızım" ifadəsini bir an belə unutmayan Məhruzə Yusifova sənədlərini 1978-ci ildə N. Tusi adına Azərbaycan Dövlət Pedaqoji Universitetinə verir. Həmin il imtahanlardan müvəffəq qiymətlər alan Məhruzə riyaziyyat fakültəsinin tələbəsi olur.

- 1978-ci ildə ADPU-ya qəbul olundum. Riyaziyyat müəllimi olmağın çətinliyi və gözəlliyini müəllimlərimdən öyrəndim. Başlıcası - riyaziyyatın həyatın özü olduğunu anladım. 1982-ci ildə ilk dəfə müəllim kimi rayonumuzun Almalı kəndində əmək fəaliyyətinə başladım. Az sonra Qax şəhər 4 nömrəli orta məktəbinə təyin edildim.

Həm sinif rəhbəri, həm də yuxarı sinif şagirdlərinin müəllimi oldum. İllər çox sürətlə ötüb keçdi... bu illərdə şagirdlərimlə bağlı o qədər xatirələr qalıb ki... Şagirdlərimdən "əla" alanları da olub, zəif oxuyanı da...

Amma xoşbəxt müəlliməm ki, şagirdlərim şəxsiyyət kimi həyata atılıblar. Hər dəfə onlarla rastlaşanda qürur duyuram.

Müəllim adı müqəddəsdir. Bu adın əzəmətini dərk eləmək lazımdır. Müəllim öz biliyi, şəxsiyyəti ilə şagirdlərinin qəlbinə yol tapmağı bacarmalıdır.

Məktəblərimizdə şəxsiyyətyönümlülüyün təbliğinə imkan verən kurikulum sisteminin müsbət nəticələrini gələcək göstərəcək. Bəzi dərs vəsaitlərində çatışmazlıqların olmasına baxmayaraq bu sistemin üstünlükləri çoxdur.

Məhruzə müəllim qazandığı uğurlardan, aldığı təltiflərdən, olimpiadalarda yetirmələrinin uğurlarından danışmaq istəmədi. Zəng səsi söhbətimizi sonlandırdı. Xudahafizləşib ayrıldıq. Onun "Müəllim adı müqəddəsdir" və E.Tağıyevin "o, mənim müəllimimdir"- ifadəsi sanki bir-birini tamamlayırdı. Və bu tamlıq və bütövlükdə şagirdlərinin sevimlisi - müəllim şəxsiyyəti görünürdü.

Nadir Ziyadlı Qıpçaq,

Qax şəhəri

Azərbaycan müəllimi.- 2015.- 20 iyun.- S.14.