"Birdən özümdən asılı olmayaraq

qışqırdım ki, 700 bal toplamışam"

Azərbaycan Respublikasının Prezidenti yanında Dövlət İdarəçilik Akademiyasının tələbəsi Xəyalə Əfəndiyeva ilə söhbət

Xəyalə Əfəndiyeva 1998-ci ildə Qəbələ rayonunun Vəndam kəndində anadan olub. Vəndam qəsəbə 3 nömrəli tam orta məktəbi bitirib. Məktəb illərində müxtəlif tədbirlərdə iştirak edib, eyni zamanda məktəbin folklor kollektivinin üzvü olub. Çoxlu sayda diplom və fəxri fərmanlarla təltif olunub. Qəbul imtahanlarında 700 bal toplayaraq Azərbaycan Respublikasının Prezidenti yanında Dövlət İdarəçilik Akademiyasının siyasi idarəetmə fakültəsinin hüquqşünaslıq ixtisasına daxil olub. Onunla görüşüb imtahan təəssüratlarını, ümumiyyətlə, bizi maraqlandıran sualları cavablandırmağı xahiş etdim. Bakının ən gözəl guşələrinin birində - Nərimanov parkında görüşüb həmsöhbət olduq.

- Xəyalə, necə oldu ki, bu ixtisası secdin?

- Hələ 5-ci sinifdə oxuyarkən məktəb kitabxanasının üzvü idim. Tarixi ədəbiyyatlar çox oxuyurdum, məhkəmə prosesləri ilə bağlı cinayət xarakterli filmləri seyr etməkdən zövq alırdım. Hətta seyr etdiyim filmlərin siyahısını da tutmuşdum. Qəti qərara gəldim ki, böyüyəndə hüquqşünas olacağam. Bu qələbəmi hədəfə doğru ilk uğurum adlandırmaq olar. İnşallah arzuma çatana qədər var gücümlə çalışacağam. Çünki gələcəkdə işə girmək üçün də imtahan verməliyəm. Əslində bu biz tələbələrin məsuliyyətini birə-beş artırır.

- 700 bal toplayacağına inanırdınmı?

- Ali məktəbə hazırlaşmağa başlayanda qarşıma 700 bal toplamağı məqsəd qoymuşdum. Ancaq məqsədə çatmaq üçün gərək tələb olunandan da artıq çalışasan. Mən vaxtımın çox hissəsini dərslərimə sərf edirdim. Gecəmi gündüzə qatıb çalışdım. İnanırdım ki, yüksək bal toplayıb universitetə qəbul olacağam. Ancaq etiraf etməliyəm ki, bir az tərəddüd də edirdim. Çünki bu, qəbul imtahanı idi, sınaq imtahanı yox.

- TQDK-nın sınaqlarında neçə bal toplamışdın?

- Tələbə Qəbulu üzrə Dövlət Komissiyasının keçirdiyi sınaq imtahanlarından 670-680 bal toplamışdım. Onda çox sərbəst idim, imtahan xofu yox idi. Kim deyirsə ki, imtahan zamanı həyəcan keçirməyib, o, səmimi deyil. Qəbul imtahanı zamanı nəinki bizi, bəlkə otağın divarlarını da həyəcan bürümüşdü.

- Demək həyəcan var idi...

- Çox həyəcanlı idim. Baxmayaraq ki, test suallarına mükəmməl hazırlaşmışdım. Bu hiss məni rahat buraxmırdı. Amma sualları nəzərdən keçirəndə həyacanımın yersiz olduğunu düşündüm. Sualları cavablandırarkən heç bir çətinlik çəkmədim. Ürəyimdə müəllimlərimə və mənə dəstək olan valideynlərimə təşəkkür etdim. Onların əməyi üzərimdə çox olub.

- Yüksək bal topladığını biləndə hansı hisslər keçirdin?

- "Space" telekanalında atam cavabları yoxladıqca mən dinməzcə işarə edirdim. Sonda atam dedi ki, qızım, nə oldu, neçə bal toplamısan. Dinmədim. Yenə də təkrar soruşdu: - Qızım... Atamın, anamın, qardaşımın həyəcanlı baxışlarına dözmədim və birdən özümdən asılı olmayaraq qışqırdım ki, 700 bal toplamışam.

Telefon zəngləri, təbriklər bir-birinə qarışdı. İnanın ki, sevincimin hədd-hüdudu yox idı. Valideynlərim məndən də çox sevinirdilər. Ertəsi gün sinif yoldaşlarım, müəllimlərim, direktorumuz Rahib Məmmədov, sinif rəhbərimiz Yeganə Abdurəhmanova məni təbrik etdilər. 700 bal toplayan gənclərlə görüşlər keçirildi. Qəbələ Rayon İcra Hakimiyyətinin başçısı S.Abdullayev uğurlarımı yüksək dəyərləndirdi və tələbələrlə görüşündə mənə planşet hədiyyə etdi. "Qəbələ" klubunun futbolçuları tərəfindən ali təhsil müəssisələrinə imtahan zamanı ən yüksək bal toplayan və tələbə adını qazanan üç Qəbələ sakininə hədiyyələr verildi. Mənə noutbuk hədiyyə olundu.

- Tələbə olmaq arzusu hər bir insanın ən ümdə olan arzularından biridir. İlk dərs günü özünü necə hiss edirdin, artıq şagird deyil, I kurs tələbəsi idin... Sevinirdinmi?

- Əlbəttə, sevinirdim. Orta məktəbə qədəm qoyan gündən tələbə olmaq arzusu ilə yaşayırdım. Bilik günü akademiyada keçirilən tədbirdə mənə söz veriləndə bu sözləri ucadan səsləndirdim. Çünki bu adı daşımaq mənim üçün böyük şərəf, böyük fəxarətdir. Bütün tələbələri tələbə adı qazanmaq münasibətilə təbrik etdim və onlara ali təhsil illərində uğurlar, mənalı tələbə həyatı arzuladım.

- Ölkə rəhbərinin müvafiq sərəncamı ilə Prezident təqaüdünə layiq görülmüsən, ilk təqaüdünü nəyə xərcləyəcəksən?

- Valideynlərimə hədiyyə və bədii kitablar alacağam. Qış tətilində təhsil aldığım məktəbə gedib müəllimlərimlə görüşəcəyəm.

- Gələcək arzuların...

- Tələbə adını qazandıqdan sonra insanda yeni-yeni arzular baş qaldırır. Necə deyərlər, arzular arzulara calanır. Ən böyük arzum gələcəkdə təhsilimi xaricdə davam etdirməkdir. Hazırda isə fikrimi seminarlara, mühazirələrə yönəltmişəm. Qarşıda bizi qış semestr imtahanları gözləyir. Çalışacağam ali məktəbi fərqlənmə diplomu ilə bitirim.

- Kirayəşin yaşayırsan?

- Xeyr, qardaşımla birgə ana babamın evində yaşayırıq. O da Azərbaycan Dövlət İqtisad Universitetinin tələbəsidir.

- Hər ikinizə uğurlar diləyirəm.

- Vaxt ayırıb mənimlə həmsöhbət olduğunuza görə mən də sizə və redaksiya rəhbərliyinə öz dərin təşəkkürümü bildirirəm. Sağ olun ki, bizi axtarıb arayırsınız, Təhsil Nazirliyinin rəsmi orqanı olan "Azərbaycan müəllimi" qəzetində işıqlandırırsınız. Bu, şəxsən mənim üçün olduqca qürurverici bir haldır. Bir daha sizə təşəkkür edirəm.

Sifai SƏFƏROVA

Azərbaycan müəllimi.- 2015.- 10 oktyabr.- S.9.