"Repetitor köməyi olmadan

ali məktəbə qəbul ola bilərəm"

Bakı şəhəri 220 nömrəli tam orta məktəbin uşaq evindən olan məzun və şagirdləri bu fikirdədirlər

Artıq 20 ildir ki, 220 nömrəli tam orta məktəb 1 nömrəli uşaq evi ilə əməkdaşlıq edir. Məktəbin şagirdlərinin bir hissəsi məhz bu uşaq evinin yetirmələridir. Hazırda burada 100 bu cür uşaq təhsil alır. Bu barədə məktəbin direktoru Almaz Əsgərova 1news.az-ın müxbiri ilə söhbətdə bildirib.

"Bu cür uşaqlara xüsusi diqqət və qayğı göstərilir, çünki təhsillə yanaşı, biz onlara vətənpərvərlik hissi aşılamağa borcluyuq. Biz əlimizdən gələni edirik ki, onlar valideyn qayğısı və diqqətinin olmamasını hiss etməsinlər, keyfiyyətli təhsil alsınlar və həyatda öz yerlərini tapsınlar. Bu uşaqlar bizim məktəbdə tam orta təhsil alırlar, amma bəzən 9-cu sinfi bitirdikdən sonra kolleclərə də gedirlər", - deyə məktəbin direktoru bildirir. Onun sözlərinə görə, məktəbdə 2 tipli siniflər mövcuddur. "Adi siniflər və lisey tipli siniflər. Çox vaxt biz bu uşaqları lisey tipli siniflərdə yerləşdiririk, belə ki, bu siniflərdə tələblər yüksəkdir, məşğələlər dərinləşdirilmiş proqram əsasında aparılır. Bütövlükdə məktəbdə 2200 uşaq təhsil alır". A. Əsgərova qeyd edib ki, məktəbin uşaq evinin yetirmələri olan məzunları ali təhsil müəssisələrinə daxil olurlar. Son illərdə Təbriz Qəmbərov, Yasin Abbasov, Ramiz Qənbərov, Yasəmən Ağayeva, Aynur İmanova, Azər Məmmədov yüksək bal toplayaraq ali məktəblərə daxil olublar. Özü də bu uşaqlar repetitorlarla əlavə hazırlıq keçməyiblər, bu, ilk növbədə məktəbdə yaxşı təlimin, uşaqların özlərinin intizam və məsuliyyətinin nəticəsidir. Məktəbin müəllimləri hər zaman uşaqların bilik səviyyəsini yoxlayır və onlara nəzarət edir.

Direktor qeyd edib ki, uşaq evindən gələnlər psixoloji cəhətdən digər uşaqlardan fərqlənirlər. "Bu cür uşaqlarla işləmək asan deyil. Onlarla ümumi dil tapmaq lazımdır. Buna nail olmaq lazımdır ki, onlar öz qüvvələrinə və gələcəklərinə inansınlar".

Bu il uşaq evinin yetirməsi və 220 nömrəli tam orta məktəbin məzunu olan Elvin Əlirzayev repetitor hazırlığı olmadan qəbul imtahanlarında 575 bal toplayaraq "ADA" Universitetinin beynəlxalq münasibətlər fakültəsinə daxil olub. Elvinin dediyinə görə, I sinifdən bu məktəbdə oxuyub.

"Universitetlərə qəbul zamanı şagirdlərin qazandığı müvəffəqiyyət bu məktəbdə təhsilin yüksək səviyyədə olmasının göstəricisidir", - deyə o bildirib. Elvin əmindir ki, öz üzərində işləyən istənilən şagird repetitor olmadan ali məktəbə daxil ola bilər. "Mən özüm də 500 -dən artıq bal toplayacağıma inanırdım, lakin bu qədər bal toplayacağımı düşünmürdüm. Azərbaycan dilini, tarixi, coğrafiyanı yaxşı bilirdim. Gələcəkdə magistraturada təhsilimi davam etdirmək istərdim". Bununla belə, E.Əlirzayev hesab edir ki, yüksək bal toplamaq üçün 2 il hazırlaşmaq kifayət deyil. "İndi hesab edirlər ki, X və XI siniflərdə 2 il intensiv hazırlaşmaq ali məktəbə daxil olmaq üçün kifayətdir. Əslində isə bu cür düşünməklə yüksək nəticələr əldə etmək mümkün deyil, bu cür uşaqlar çox aşağı bal toplayırlar, ali məktəbə daxil olmağa isə çox əvvəldən hazırlaşmaq lazımdır", - deyə Elvin bildirir.

Hazırda Azərbaycan Dillər Universitetinin beynəlxalq münasibətlər fakültəsinin IV kursunda uşaq evinin digər yetirməsi və 220 nömrəli tam orta məktəbin məzunu olan Yasəmən Ağayeva oxuyur. "Mən bu məktəbdə V sinifdən oxuyuram. Hesab edirəm ki, əgər birinci sinifdən bu məktəbə oxumağa gəlsəydim, uğurlarım daha çox olardı. Məni ali məktəbə daxil olmağa hazırlayan məktəb müəllimlərimə çox minnətdaram",-deyə Y.Ağayeva bildirib. O, müəllimləri tərəfindən böyük diqqət gördüyünü qeyd edib. "Mən heç vaxt özüm və digər uşaqlar arasında fərq hiss etməmişəm. Dərs vəsaitlərini həmişə ilk növbədə bizə veriblər. İndi hərdən bura gəlir, müəllimlərlə görüşürəm", - deyə Y.Ağayeva vurğulayıb. Onun sözlərinə görə, indi ən başlıca məqsədi yaxşı iş tapmaqdır. "Ali məktəbdə təhsilimi başa vurduqdan sonra sənədlərimi "ASAN xidmət"ə dövlət qulluğuna vermək istəyirəm. Özümə inanıram və ümid edirəm ki, bu arzuma çatacağam".

Uşaq evinin digər yetirməsi və 220 nömrəli tam orta məktəbin məzunu Azər Həsənov hazırda Azərbaycan Dövlət Mədəniyyət və İncəsənət Universitetinin rejissorluq fakültəsində təhsil alır. Azər Həsənov məzunu olduğu məktəbdə uşaq evinin yetirmələrinə xüsusi diqqət göstərildiyini qeyd edib. "Burada təhsil ən yüksək səviyyədədir. Mən repetitor hazırlığı olmadan ali məktəbə daxil ola bildim. Bu təhsil müəssisəsində təhsil alan uşaq, əgər o, doğrudan da oxumağına diqqət yetirirsə, çox asanlıqla ali məktəbə daxil ola bilər". Azər uşaq evlərinin yetirmələrinin üzləşdiyi çox mühüm bir problemi qeyd edib. "Xahiş edirəm bir mühüm məsələni işıqlandırasınız. Uşaq evlərinin ödənişli əsaslarla ali məktəblərə daxil olmuş yetirmələrinin təhsil haqqı yalnız o halda ləğv edilir ki, onların valideyn himayəsindən məhrum edilmələri haqda arayışları var. Axı uşaq evlərində yaşayan elə uşaqlar var ki, onlar valideyn himayəsindən məhrum deyil", - deyən Azər qeyd edib ki, bu cür uşaqlar üçün təqaüd almadan ödənişli əsaslarla oxumaq çox ağırdır.

220 nömrəli tam orta məktəbin X sinfində uşaq evinin digər yetirməsi Həmid Kazımov da təhsil alır. O bu il kollecə daxil olsa da, məktəbə qayıtmağa və təhsilini burada davam etdirməyə qərar verib.

"Burada təhsil ən güclü səviyyədədir, müəllimlər isə ən yaxşılardır. Mən kollecdə 2 il oxumaq, daha sonra isə ali məktəbə sənəd vermək istəyirdim. Orada bir neçə gün oxuduqdan sonra böyük fərq gördüm və ona görə də məktəbə qayıtmağa qərar verdim" deyən Həmid əlavə edib ki, "Əminəm ki, repetitor köməyi olmadan ali məktəbə qəbul ola bilərəm".

Azərbaycan müəllimi.- 2015.- 10 oktyabr.- S.12.