Naxçıvan Dövlət Universitetində

elmi-nəzəri seminar keçirilib

Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamının icrası məqsədilə Naxçıvan Dövlət Universitetində silsilə tədbirlər keçirilir. Belə tədbirlərdən biri də Naxçıvan Muxtar Respublikasındakı “Modul” Elektrik Stansiyasının elektrik sexinin rəis müavini Nəriman Kərimlinin universitetin memarlıq və mühəndislik fakültəsinin elektroenergitika mühəndisliyi ixtisasının tələbələri üçün keçdiyi elmi-nəzəri seminar olub.

Seminardan əvvəl universitetin rektoru, AMEA-nın müxbir üzvü Saleh Məhərrəmov çıxış edərək Ali Məclis Sədrinin 2015-ci il 27 iyul tarixli Sərəncamını təhsilin inkişafına, yüksək ixtisaslı mütəxəssis hazırlığına, regionun kadr potensialının formalaşmasına diqqət və qayğı kimi qiymətləndirib, sərəncamın tətbiqi ilə bağlı görülən işlərdən danışıb. Rektor qeyd edib ki, təhsilə göstərilən dövlət qayğısı tədrisin keyfiyyətinin yaxşılaşdırılması, yüksək nizam-intizam, ixtisas fənlərinin daha dərin mənimsədilməsi kimi mühüm vəzifələr qarşıya qoyur.

“Naxçıvan Muxtar Respublikasının enerji təminatı” mövzusuna həsr olunmuş elmi-nəzəri seminarda Nəriman Kərimli muxtar respublikada elektroenergetikanın inkisafı, alternativ enerji mənbələrindən istifadə imkanlarından bəhs edərək vurğulayıb ki, bir vaxt enerji böhranı keçirən Naxçıvan bu gün enerji ixrac edən regiona çevrilib. Azərbaycan Respublikasının ən qabaqcıl elektrik stansiyalarından olan Naxçıvan “Modul” Elektrik Stansiyasında hər birinin gücü 8,7 meqavat olmaqla 10 ədəd generator quraşdırılmışdır. Stansiyanın ümumi gücü 87 meqavatdır. Stansiya 2006-cı ildə istifadəyə verilmişdir. Stansiyada qoyulmuş hər birinin gücü 8,7 mvt olan Porsen tipli aqreqatlar qısa muddətdə işə salına və dayandırıla bilər. Stansiyanın faydalı iş əmsalı 46 faiz, 1 kvt.saat elektrik enerjisinə sərf olunan təbii qazın miqdarı 260 qramdır. Burada istehsal olunan elektrik enerjisini muxtar respublikanın elektrik şəbəkələrinə ötürmək məqsədilə 4 km uzunluqlu ikidövrəli 110 kv gərginlikli, Türkiyə Respublikasına ötürmək üçün 24 km uzunluqlu birdövrəli 110 kv gərginlikli elektrik verilişi xətti çəkilmisdir.

Sonda suallar cavablandırılıb, tədbirə fakültə dekanı, texnika üzrə elmlər doktoru Cavanşir Zeynalov yekun vurub.

Mehriban SULTAN,

NDU-nun Mətbuat şöbəsinin müdiri

Azərbaycan müəllimi.- 2015.- 24 oktyabr.- S.5.