Heydər Əliyev adına

liseydə “Şənbə görüşləri”

Oktyabrın 24-də Bakıdakı Heydər Əliyev adına liseydə təşkil olunan “Şənbə görüşləri”nin budəfəki mövzusu “Məktəb direktorunun gündəliyi” idi. Qeyd edək ki, Təhsil Nazirliyinin təşəbbüsü və təşkilatçılığı ilə keçirilən “Şənbə görüşləri” artıq ikinci dəfədir təşkil olunur və hər görüşdə təhsilimizin müxtəlif məsələləri müzakirə obyektinə çevrilir. Moderatoru Təhsil Nazirliyinin nümayəndəsi Vəfa Yaqublu olan müzakirədə nazirliyin, TPİ-nin və Bakı Şəhəri üzrə Təhsil İdarəsinin nümayəndələri, təhsil ekspertləri və məktəb direktorları iştirak edirdilər. Geniş şəkildə və səmimi keçən müzakirədə moderator tərəfindən iştirakçılara “Bu gün məktəb direktoru daha çox kimdir: menecer yoxsa pedaqoq?”, “Azərbaycanda müəllif məktəbləri nə üçün yaranmır?”, “Məktəblərdə təşkilati mədəniyyətin zəifliyi nə üçün problem kimi qəbul edilmir?” sualları ünvanlandı. Oxucularımıza iştirakçılar tərəfindən cavablandırılan suallardan əsas məqamları təqdim edirik.

Məhəbbət Vəliyeva,

Bakı Şəhəri üzrə Təhsil İdarəsinin müdir müavini:

- Fikrimcə, məktəb direktoru təhsil ocağında olan prosesləri daim diqqətdə saxlamalı, verilən tapşırıqların düzgün yerinə yetirilməsinə nəzarət etməli, yüksək pedaqoji səriştəyə, idarəçilik və təşkilatçılıq qabiliyyətinə malik olmalıdır. Buna görə də məktəb direktoru həm yaxşı menecer, həm də pedaqoq olmalıdır. Ən başlıcası isə pedaqoji sahəni gözəl bilməlidir ki, məktəbdə gedən proseslərə nəzarət edə bilsin. Təcrübə göstərir ki, məktəbdə yaxşı müəllim işləyənlər və bir qədər də təşkilatçılıq, idarəçilik qabiliyyəti olanlar sonralar direktor olduqda onlar yaxşı direktor kimi qiymətləndirilir. Lakin təkcə idarəçilik və təşkilatçılıq qabiliyyəti olub, pedaqoji sahədən məlumatı olmayanlar isə bir o qədər də yaxşı direktor olmurlar. Bəlkə də başqa sahədə idarəçilik qabiliyyəti yetərlidir, ancaq pedaqoji mühit elə bir mürəkkəb münasibətlər şəbəkəsinə malikdir ki, burada mütləq pedaqoji sahəni gözəl bilməlisən ki, düzgün mövqe tuta biləsən.

Cəsarət Valehov,

Təhsil Nazirliyinin QHT və KİV-lərlə iş sektorunun müdiri:

- Düşünürəm ki, təhsil fəlsəfəsinin özündə kritik situasiya mövcuddur. Araşdırmalar da göstərir ki, ümumiyyətlə dünyada təhsil sahəsində kritik durum var. Bu baxımdan bu gün təhsilə münasibət dəyişməlidir. Transformasiya olmalıdır. Çünki dünya dəyişirsə, bu, insana da təsir edir. Məncə, XXI əsrdə ən çətin dövr təhsildə transformasiyadır.

Müəllif məktəbləri məsələsinə gəldikdə isə, fikrimcə, sovet dövründə buna bənzər məktəblərimiz olub. Hansı ki, həmin məktəblər onun direktorunun adı ilə tanınıb. Buna misal olaraq Xaldanda Zahid müəllimin, Tovuzda Məhər müəllimin məktəblərini göstərmək olar.

Rüfət Əliyev,

Təhsil Nazirliyinin sektor müdiri:

- Direktor işləmək üçün ilk növbədə sifarişçinin tələb etdiyi ilə razılaşmaq, həmin tələbləri yerinə yetirmək lazımdır. Bundan əlavə, kadr sərbəstliyi əsasdır. Komanda direktorun bütövlüyünün bir hissəsidir. Həmçinin proqrama qarşı sərbəstlik olmalıdır. Çünki gözlənilən nəticələrə çatmaq üçün proqramın necə həyata keçirilməsini direktor bilməlidir. Direktorun maliyyə mexanizmi haqqında məlumatı da olmalıdır ki, hansı işləri görməli olacağını öncədən müəyyənləşdirsin.

Fikrət Xəlilov,

Heydər Əliyev adına liseyin direktoru:

- Təhsil ocağının idarə olunmasında məktəb direktorunun pedaqoji təcrübəsinin, təhsili yaxşı bilməsinin vacibliyini düşünürəm. Lakin, idarəetmə də vacib amillərdəndir. Əgər direktor bu iki amili özündə birləşdirə bilirsə, onda ortaya yaxşı nəticə çıxır.

Bundan başqa, direktor məktəbdə tərbiyəvi mühit yaratmalıdır. Unutmayaq ki, məktəb tədrislə bağlı, həm də tərbiyə müəssisəsidir.

Etibar Əliyev,

təhsil eksperti:

- Son dövrlər məktəb direktorlarında liderlik keyfiyyətlərinin azaldığı fikrindəyəm. Menecerin məktəbə rəhbərliyi xətti idarəetməni özündə cəmləşdirə bilər. Yaxşı pedaqoq isə qeyri-xətti idarəetməyə üstünlük verir. Bu baxımdan menecerlik idarəetmənin bir qolu ola bilər. Bundan başqa, direktor özü tərbiyəçi olmalıdır. Eyni zamanda direktor yaradıcı şəxs kimi də çıxış etməlidir. Məktəbin simasını dəyişməsi üçün onun ideyaları lazımdır.

İntiqam Cəbrayılov,

TPİ-nin əməkdaşı:

- Bugünkü məktəb direktoru müəyyən nəzəri məsələləri mütləq bilməlidir. Belə ki, metodologiyanı bilmədən, praktik məsələlərə istinad etmədən idarə etməyin mənfi tərəfləri ola bilər. Məktəb direktorunun menecerlik qabiliyyəti də olmalıdır. O, təkcə kollektivə rəhbərlik etməməlidir, həmçinin onların dərd-sərini bilməli, təhsilin məzmununa bələd olmalı, islahatların gedişatı haqqında məlumatlı olmalıdır.

Fuad Babayev,

95 nömrəli tam orta məktəbin direktoru:

- Məktəblə valideynlərin münasibəti sıx olmalıdır. Hazırda məktəblərdə yalnız 1-4 və 9-11-ci siniflərdə oxuyan uşaqların valideynlərinin məktəblə münasibətləri var. Qalan siniflər üçünsə boşluqdur. Valideynlər övladlarının necə oxuduğu ilə maraqlanmırlar. Bundan başqa, ali təhsil müəssisələri ilə məktəblər arasında da sıx münasibət olmalıdır. Belə ki, ali məktəblər ümumtəhsil məktəblərinin necə müəllim istəməsi ilə maraqlanmırlar.

Almaz Bayramova,

246 nömrəli tam orta məktəbin direktoru:

- Məktəb direktorunda lazım olan ən vacib keyfiyyət onun məktəbə və müəllim-şagird kollektivinə münasibətidir. Direktor yerli mühiti, şagird kontingentini yaxşı təhlil etməli, müəyyən qərarlar verərkən bütün bunlar nəzərə alınmalıdır. Bunun üçün direktora dinamik işləmək üçün yaxşı komanda da lazımdır.

Anar Məmmədov,

“İstək” liseyinin direktoru:

- Fikrimcə, ən böyük müəllim müşahidəçi olmalıdır. Belə ki, cəsarətsizlik bu gün bir çox məktəb direktorlarının komfort zonasına çevrilib. Pedaqoq hara gedirsə, orada müşahidə aparır. Onun metodikası biliyindən, emosionallığı məhəbbətindən doğmalıdır. Hər müəllimin pedaqoq olması çətindir.

Niyazi RƏHİMOV

Azərbaycan müəllimi.- 2015.- 31 oktyabr.- S.8.