Beynəlxalq müsabiqələr laureatı

2 qızıl medalla təltif olunub

Jalə Mayılova 2000-ci ildə Bakıda anadan olub. Rauf Hacıyev adına 15 nömrəli onbirillik musiqi məktəbində əməkdar müəllim Tamilla Məmmədovanın sinfində fortepianonun sirlərinə dərindən yiyələnir. Gənc yeniyetmə 10 yaşında olarkən Polşanın ölkəmizdəki səfirliyinin təşəbbüsü ilə keçirilən Şopen müsabiqəsində uğurlu çıxışına görə diplomla mükafatlandırılıb. 2011-ci ildə Azərbaycanın Dövlət müstəqilliyinin bərpasının 20 illiyi münasibətilə keçirilən VIII Respublika baxış-müsabiqəsində I, "Kainat" Gənclik mərkəzinin və Bakı Musiqi Akademiyasının təşkilatçılığı ilə keçirilən İslam dünyası gənclərinin 20 yaşadək klassik musiqi ifaçılarının I Beynəlxalq müsabiqəsində I yeri tutaraq qalib adını qazanıb. O, Rusiyanın Samara vilayətində təşkil olunan Uşaq Musiqi Akademiyasında Rostislav Krimerdən ustad dərsləri alıb. Mədəniyyət və Turizm Nazirliyinin təşkilatçılığı ilə keçirilən gənc pianoçuların II Respublika müsabiqəsinin laureatı adını qazanan gənc fortepianoçu Almaniyanın Münhen şəhərində keçirilən "Münhen ulduzları" müsabiqəsində həm solo, həm də ansambl nominasiyalarında məharətli çıxışına görə qızıl medalla, Ukraynada keçirilən X beynəlxalq musiqi müsabiqəsində "İnduvidualis" laureat adı ilə, Böyük Britaniya, Macarıstan, Azərbaycan, Rusiya, Ukrayna, Yaponiyadan istedadlı uşaqların qatıldığı "Budapeştin ulduzları - gənclik, ilham, istedad", "Macar oyunları", XIV Beynəlxalq festival-müsabiqədə həm solo fortepiano, həm də ansambl nominasiyalarında 2 qızıl medalla təltif olunub. 2013-cü ildə ümummilli lider Heydər Əliyevin anadan olmasının 90 illik yubileyinə həsr olunmuş Respublika müsabiqəsində I yerə, "İstedadlı uşaqlar festivalı-2013"-də diplom və kubokla, Gürcüstanda "Gənc pianoçuların beynəlxalq müsabiqəsində diplomant (2014), Rusiyanın Çelyabinsk şəhərində "Dostluğun ipək yolu-mədəniyyətlərarası dialoq" layihəsində konsert proqramında diplom və fəxri fərmanlara layiq görülüb.

Festival və konsertlərdə, müxtəlif nominasiyalı müsabiqələrdə qazandığı nailiyyətlərin bəhrəsidir ki, gənc istedadın adı 2013-cü ildə Azərbaycan Respublikasının Prezidenti İlham Əliyevin müvafiq sərəncamı ilə Azərbaycanın gənc istedadlarının "Qızıl kitabı"na yazılıb və o, xüsusi aylıq təqaüdə layiq görülüb.

Qeyd edək ki, J. Mayılovanın Azərbaycan Dövlət Filarmoniyasında, Beynəlxalq Muğam Mərkəzində, Bakı Musiqi Akademiyasında, "Kapelhans" Azərbaycan-Alman Mədəniyyət Mərkəzində, R.Behbudov adına Mahnı Teatrında, eləcə də Üzeyir Hacıbəyli, M.Rostropoviç, T.Salahovun ev-muzeylərində uğurlu çıxışları tamaşaçıları məmnun edib və alqışlarla qarşılanıb.

Sifai SƏFƏROVA

Azərbaycan müəllimi.- 2015.- 12 sentyabr.- S.14.